Trioblaidean ChalMac a' leantainn 's an soitheach as trainge aca briste

An MV Loch Seaforth ceangailte ris a' chidhe ann an Steòrnabhagh

Tha an Loch Seaforth ceangailte ris a' chidhe ann an Steòrnabhagh agus obair-càraidh a' leantainn oirre

Tha dùil ri fios madainn Diluain an tèid aig an MV Loch Seaforth a tha a' dol eadar Steòrnabhagh agus Ullapul air seòladh feasgar.

Tha i air a bhith ga càradh on bhris ramp a' chinn-toisich aice Là na Sàbaid.

Cha robh an Loch Seaforth gu bhith a' dol air ais a dh'Ullapul co-dhiù feasgar an-dè leis gun deach an seòladh a chur dheth agus dùil ri gaoith mhòir.

Nuair a ràinig i Steòrnabhagh bha luchd-siubhail còrr is uair de thìde air deic nan càraichean mus d' fhuair iad dheth.

'S ann tro dheic nan càraichean a tha luchd-siubhail air chois cuideachd a' faighinn far a' bhàta an-dràsta fhad 's a tha an drochaid-choise aca ga càradh.

Tha am bàta ceangailte ann an Steòrnabhagh agus innsidh CalMac an-diugh fhathast an seòl i feasgar.

Gheibhear fiosrachadh mu sheirbheisean na companaidh an seo.

Carbadan agus luchd-siubhail glacte air deic nan càraichean aig an Loch Seaforth agus an ramp-toisich aice briste

Bha luchd-siubhail a' feitheamh còrr is uair de thìde Là na Sàbaid mus d' fhuair iad far an t-soithich

Seo an dùbhlan as ùire do Chaledonian Mac a' Bhriuthainn a dh'innis an t-seachdain a chaidh gun robh faisg air an treas cuid den chabhlach aca a-mach à seirbheis.

Aig aon àm, bha sia bàtaichean mòra aca agus ceithir den fheadhainn bheaga an dàrna cuid briste neo a' faighinn na seirbheis bliadhnail aca.

B' fheudar dhaibh soithichean a ghluasad air feadh an lìonra airson agus gum faigheadh gach coimhearsnachd, thuirt iad, seirbheis air choireigin.

Dh'fhoillsich iad clàran-ama eadar-amail a mhaireas chun an 17mh là den Ghiblean.

Tuilleadh air an sgeulachd seo