Trioblaid an Loch Seaforth: "Tha buaidh gus a bhith aige air an sgìre"

Tha dragh ga thogail mun bhuaidh a bhios ann is aon taobh de dheic mezzanine an Loch Seaforth gu bhith dùinte fad an t-samhraidh.

Nochd trioblaid leis an deic an toiseach aig àm na Càisge.

Dhearbh CalMac Diciadain gun robh aca ris an deic a thoirt a-mach à seirbheis.

Thuirt iad gu bheil nàdar na h-obrach a' ciallachadh nach eil e comasach obair-càraidh a dhèanamh an-dràsta, is mar sin gum feum iad an deic a dhùnadh fad an t-samhraidh.

Thuirt iad gun tèid an trioblaid a chur ceart nuair a thèid an Loch Seaforth dhan doc airson seirbheis bliadhnail.

Ann am brath air na meadhanan-sòisealta, thuirt CalMac gu bheil seo a' ciallachadh nach bi e comasach dhan Loch Seaforth na h-uimhir de charbadan a ghiùlain.

A' bruidhinn air Aithris na Maidne Diardaoin, thuirt cathraiche còmhdhail Comhairle nan Eilean Siar gun toir seo droch bhuaidh air còmhdhail na sgìre anns na mìosan ri tighinn.

Thuirt Ùisdean Robasdan gu bheil e a' tuigsinn gun robh CalMac an dòchas an toiseach obair-càraidh a dhèanamh aig a' phort fhèin ach nach robh sin comasach air a' cheann thall.

"An duilgheadas a bh' aca, nan cuireadh iad an Seaforth dhan doc an-dràsta tha i gus a bhith a' falbh ùine is tha fhios againn uile na duilgheadasan a th' anns an lìonra.

"'S e gnothach doirbh a bh' ann dhaibh".

Tha an comh Robasdan ag ràdh gu bheilear a' tuigsinn gun tèid 13 àitichean do charbadan a chall ri linn seo.

"Thairis grunn sheòlaidhean san t-seachdain tha sin a' cunntais suas gu àireimh gu math àrd.

"Tha buaidh gus a bhith aige air an sgìre fhèin, tha sin gu math cinnteach", thuirt e.