Cuid fhathast teagmhach mu mheud sgeama taigheadais air An Tairbeart

Chuala coinneamh phoblach air An Tairbeart oidhche Chiadain gu bheil beachdan làidir sa choimhearsnachd fhathast mu phlana 'son suas ri 46 dachaigh a thogail sa bhaile.

Chaidh cead-dealbhachaidh a thoirt do na planaichean aig Buidheann Taigheadais Innse Gall (HHP) sa Ghearran am-bliadhna.

Thuirt HHP gun do chùm iad trì co-chomhairleachaidhean poblach thairis air 30 mìos agus gun do sheall gach fear "gun robh taic glè làidir airson an leasachaidh sa choimhearsnachd".

Ge-tà, aig a' choinneimh Diciadain, aig an robh faisg air 30 duine, nochd draghan mu na bhios ann de thaighean, nach bi rùm gu leòr san sgoil do chloinn a thig a dh'fhuireach annta agus cuideachd a' bhuaidh air trafaig.

Dh'iarr iad gum bi conaltradh a bharrachd le HHP feuch aonta a ruighinn a bhios a' freagairt nas fheàrr air a h-uile duine.

Ann am brath-naidheachd Diardaoin, thuirt HHP gum biodh iad "ag obair gu dlùth leis an luchd-togail airson dèanamh cinnteach gu bheil siostam ann a chumas smachd air inbhe na h-obrach".

Gheall neach-labhairt na buidhne: "Bidh ro-innleachd conaltraidh againn a bheir seachad fiosrachadh do na buidhnean uile agus a leigeas leis a' choimhearsnachd fios a chur thugainn."

Nuair a chaidh cead a thoirt le Comhairle nan Eilean Siar, thuirt oifigearan-dealbhachaidh gun robh buannachdan a' phròiseict cho mòr agus gun gabhadh iad ris a' bhuaidh air an sgìre mu thimcheall sa gheàrr-ùine.

Tharraing Harris Distillers Earranta an t-ath-sgrùdadh laghail a dh'iarr iad, ged a tha fhathast dragh orra gun tèid an t-uisge a chleachdas iad a thruailleadh.

Ghabh na nochd aig a' choinneimh ris gu bheil taighean a dhìth sa bhaile ach nochd sgaradh bheachdan nam measg mu cia mheud a bu chòir a bhith air an làraich.

Togaidh HHP 24 taigh sa chiad earrann den leasachadh, agus thèid 22 dachaigh eile a thogail às dèidh sin air chosgais còrr air £20m.