£1m 'son Coimhearsnachd Coille na Morbhairne

Fhuair Coimhearsnachd Coille na Morbhairne £1m bho Stòras Fearann na h-Alba 's iad an dùil Oighreachd Chill Fhionntainn a cheannach.

Thuirt a' bhuidheann gu robh iad an dòchas taighean a thogail, croitean a' stèidheachadh agus obraichean a chruthachadh ann an sgìre a tha fìor iomallach.

Tha 6,000 acair ann an Oighreachd Chill Fhionntain 's chan eil duine a' fuireach ann an-dràsta.

Ach tha Coimhearsnachd Coille na Morbhairne am beachd sin atharrachadh.

Tha iad airson daoine a tharraing dhan an sgìre le bhith a' leasachadh cuid de na togalaichean a tha air an oighreachd mar thà, a bharrachd air feadhainn ùr a thogail.

Tha tòrr bheanntan air an oighreachd agus tha iad làn fhiadh, le craobhan durcain is calltainn.

Tha a' choille air a chòmharrachadh mar sgìre ghlèidhte SSI agus tha a' bhuidheann airson cur ris an àireamh de dh'ailm a th' ann.

Tha i am measg nan sgìrean far a bheil an àireamh as motha de dh'ailm ann an Alba.

Gheall iad cuideachd gum bi dualchas nan Gàidheal an luib a' phroiseact.

Feumaidh iad £1.7m a thogail iad fhèin ron an Dàmhair am bliadhna 'son a chur ris a £1m a thug Stòras Fearann na h-Alba dhaibh.

Ach tha iad misneachail gum faigh iad sin le mòran dhaoine òga air a' bhòrd a tha adhartach is làn bheachdan, thuirt iad.