Gwireddu breuddwyd o agor tafarn cwrw crefft yng Nghaergybi

Yn amlach nag erioed, rydyn ni'n clywed am dafarndai yn cau oherwydd rhesymau niferus, ond yn nhref Caergybi mae busnesau tafarn yn ffynnu. Mae gan y dref oddeutu 13 o dafarndai yn weithredol ar hyn o bryd. A nawr, mae un arall ar fin agor.

Y ddau sy'n mynd i'r afael â rhedeg y busnes yw Dan a Bethan Jones. Bydd Tafarn Cybi, yn safle hen adeilad HSBC y dref, yn agor ei drysau ym mis Gorffennaf.

Dechreuodd stori Tafarn Cybi yn 2019 pan gollodd Dan Jones ei waith a'i gymryd fel cyfle i ddechrau ei fusnes ei hun. Agorodd Bragdy Cybi ar Stryd William yng Nghaergybi ac mae'r busnes wedi bod yn mynd o nerth i nerth. Mae cwrw'r bragdy wedi ennill llawer o wobrau gan gynnwys y clod uchaf gan wobrau Great Taste.

Ar y pryd, wrth chwilio am safle i agor y bragdy roedd Dan a Bethan wedi sylwi ar yr hen fanc ar y stryd ac wedi meddwl y gallai fod "y lle perffaith ar gyfer bar cwrw crefft."

Oherwydd fod yr adeilad wedi bod yn wag am flynyddoedd, a llawer o waith adnewyddu i wneud penderfynodd y ddau y byddai'n ormod o waith, ond dywedon nhw eu bod wedi rhoi'r adeilad "ar y vision board ar gyfer lle i obeithio bod yn y dyfodol".

Ymhelaethodd Bethan:

"Pan welson ni'r adeilad hwn gyntaf yn 2019 roedd [agor y dafarn] yn freuddwyd bell. Roedd hyd yn oed ein sgetsiau cynnar yn cynnwys yr hen HSBC fel nod terfynol i'r busnes. Mae'n anhygoel bod y freuddwyd honno bellach yn digwydd.

"Mae Tafarn Cybi yn gam naturiol i ni – dathliad o'n Cymreictod, ein cymuned a'n hangerdd am greu profiadau gwych i bobl leol ac ymwelwyr."

Mae tref Caergybi wedi gweld adfywiad yn lled-ddiweddar gyda dros 60 o longau pleser yn ymweld â'r ynys yn ystod y flwyddyn a nifer o fusnesau bach lleol, annibynnol yn ffynnu.

Dywedodd Bethan eu bod nhw'n,"edrych ymlaen i fod yn rhan o fwrlwm newydd ar y stryd fawr ymysg pobl leol Ynys Môn a thu hwnt."

Eu bwriad gyda'r dafarn yw "ateb y galw ar gyfer yfwyr cwrw go-iawn mewn tafarn fodern gyfforddus sy'n rhoi llwyfan i gynnyrch Cymraeg gwych. Rydan ni'n edrych ymlaen i groesawu ymwelwyr oddi ar y llongau a rhoi croeso Cymreig iddynt, a chodi ymwybyddiaeth ein bod yn wlad falch iawn o'n diwylliant."

Felly ai'r bwriad yw bod yn hwb Cymraeg yn y dref?

"Mi fyddwn ni'n gyrchfan gobeithio, a bydd pobl yn heidio yma fel maen nhw i'r Dafarn Sinc. Rydan ni'n gobeithio 'nawn ni ddod yn hoff le pobl leol hefyd a bydd pawb yn ein 'nabod ni fel lle i gael croeso da a chwrw arbennig.

"Mae yma ddigon o dafarndai yn gwerthu Madri a Carling, fyddwn ni ddim yn cystadlu hefo nhw, ond yn cynnig rhywbeth hollol wahanol."

Yn ôl Dan a Bethan yr hyn fyddan nhw'n ei gynnig yw "bar crefft annibynnol fydd yn rhoi'r llwyfan i'r gorau o fragdai Cymru, yn cynnwys cwrw Bragdy Cybi, cwrw o fragdai Cymreig annibynnol eraill, cynnig detholiad o jin, rym, fodca a wisgi Cymreig, gan roi blaenoriaeth i gynnyrch lleol a chenedlaethol, darparu dewis o ddiodydd meddal Cymreig lle bo modd a phwysleisio Cymreictod, ansawdd a chrefft."

Bydd Dan a Bethan yn rhannu'r adeilad gyda busnesau eraill hefyd, gan gynnwys bwyty newydd a saith uned o lety moethus.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.