'Can mil o resymau i wenu' dros lwyddiant ymgyrch Merched y Wawr

Mae'r flwyddyn ddiwethaf wedi bod yn un "arbennig a emosiynol" i lywydd presennol Merched y Wawr wrth i ymgyrch sy'n agos at ei chalon am resymau teuluol gyrraedd carreg filltir nodedig.

Fe nododd Bethan Picton-Davies y llynedd mai'r elusen yr oedd am ei chefnogi yn ystod ei dwy flynedd yn y rôl oedd Ymchwil Canser Cymru a'r ymdrech yn benodol i fynd i'r afael â chanser y fron.

Wrth lawnsio'r ymgyrch Positifrwydd Pinc, ei haddewid oedd i "beintio'r byd yn binc" er mwyn helpu i roi "gobaith, gofal, a gwellhad" i gleifion yng Nghymru.

Mae'r mudiad nawr wedi datgan bod aelodau wedi codi £107,241.65 hyd yn hyn trwy wahanol weithgareddau ar draws Cymru.

Fe fydd yr ymgyrch a'r gwaith codi arian yn parhau tan ddiwedd Awst nesaf pan fydd y mudiad yn dathlu ei 60 mlwyddiant.

Cafodd y ffigwr ei gyhoeddi yn ystod cyfarfod yn Aberystwyth brynhawn Sadwrn.

"Diolch o galon i bawb sydd wedi cyfrannu, trefnu digwyddiadau a chefnogi mor frwd," dywedodd Bethan Picton-Davies, o Eglwyswrw.

"Mae'r llwyddiant hwn yn dyst i gryfder a haelioni ein haelodau a'n cefnogwyr

"Ar lefel bersonol mae hon wedi bod yn daith arbennig ac emosiynol i mi, yn llawn cyfleoedd ac atgofion gwerthfawr

"Mae cyflawni'r garreg filltir anhygoel o godi £100,000 tuag Ymchwil Canser Cymru yn mynd i aros gyda fi am byth, ac yn destun balchder enfawr i fi fel Llywydd Cenedlaethol."

Un o'r rhesymau dros yr emosiwn a'r balchder yw'r ffaith ei bod yn fodryb i'r gyflwynwraig Mari Grug, sy'n byw gyda chanser metastatig.

Mae hithau'n lysgennad erbyn hyn i Ymchwil Canser Cymru ac fe enillodd Wobr BAFTA Cymru yn ddiweddar am y rhaglen Mari Grug: Un Dydd Ar y Tro, sy'n olrhain y cyfnod wedi iddi gael gwybod ei bod â chanser am yr eildro.

Ond mae Bethan a'r teulu ehangach wedi dioddef profedigaeth yn sgil canser wedi i'w nai Aled farw yn 19 mlwydd oed y llynedd.

Fe fydd Bethan yn cyflwyno llyfr - Positifrwydd Pinc - Cymru drwy lygaid Merched y Wawr - er cof amdano yn ystod y Ffair Aeaf ddiwedd Tachwedd.

Mae aelodau wedi cefnogi'r ymgyrch Positifrwydd Pinc mewn sawl ffordd, gan gynnwys cymryd rhan yn ras heriol y SheUltra.

Ond un o elfennau amlycaf a mwyaf trawiadol yr ymgyrch yw'r ffrogiau o flodau pinc sydd wedi eu gwneud gan aelodau Merched y Wawr.

Mae'r ffrogiau wedi ymddangos mewn sawl digwyddiad ar draws Cymru, gan gynnwys y Sioe Fawr, lle bu Mari a Bethan yn eu gwisgo yng nghorlan Dai Llanilar.

Cawsant eu gwisgo yn ystod y cyngerdd Un mewn Dau ar faes yr Eisteddfod Genedlaethol a bu arddangosfa, a'u gweld mewn arddangosfa yn y Llyfrgell Genedlaethol.

Mae'r ymateb i'r ymgyrch wedi bod yn "anhygoel", medd Tegwen Morris, Cyfarwyddwraig Cenedlaethol Merched y Wawr.

"Mae pawb â stori bersonol i'w rhannu," dywedodd.

"Mae cymaint o gefnogaeth i waith Ymchwil Canser Cymru gan fod pawb eisiau i fwy oroesi â'r clefyd."

Dywedodd Iwan Roberts, Pennaeth Cyfathrebu a Marchnata Ymchwil Canser Cymru, bod yr elusen "yn ddiolchgar iawn i Bethan ac i Ferched y Wawr am eu cefnogaeth trwy Brosiect y Llywydd".

"Heb os, mae'r gydnabyddiaeth yma ohonom ac o bwysigrwydd ein gwaith gan Ferched y Wawr yn ddatblygiad nodweddiadol yn ein hanes ni...

"Nod Ymchwil Canser Cymru ydi uno pobl Cymru yn erbyn canser trwy ariannu gwaith ymchwil canser o safon fyd-eang, ac yn sicr – gyda Merched y Wawr yn ein cefnogi - mi rydym ni gam agosach at gyflawni hynny."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.