Tîm merched y Llewod i greu hanes mewn gêm gartref yn erbyn Ffrainc

Bydd tîm merched y Llewod yn chwarae am y tro cyntaf yn erbyn Ffrainc mewn gêm hanesyddol yn Stadiwm Principality yng Nghaerdydd cyn eu taith i Seland Newydd yn 2027.

Bydd tîm Jo Yapp yn wynebu Ffrainc – sy'n bedwerydd yn y byd – yn y brifddinas am 19:30 ddydd Gwener, 27 Awst.

Mae'r Llewod yn wynebu tîm Black Ferns XV y penwythnos canlynol yn Whangarei, cyn y cyntaf o dair gêm brawf yn erbyn Seland Newydd ar 11 Medi.

"Mae 'na achlysuron mewn chwaraeon sy'n digwydd unwaith yn unig – ac mae hon yn un ohonyn nhw," meddai'r prif hyfforddwr Yapp.

"Bydd yn rhywbeth arbennig dros ben i'n tîm gamu ar y cae am y tro cyntaf, mewn gêm gartref ac o flaen ein cefnogwyr."

Mae teithiau tîm dynion y Llewod, sy'n cynnwys chwaraewyr o Loegr, yr Alban, Cymru ac Iwerddon, wedi cael eu cynnal ers 1888.

Bydd y menywod yn teithio i Seland Newydd ar gyfer taith o bum gêm sy'n cynnwys gemau prawf yn Auckland, Wellington a Christchurch.

Cafodd y gêm a gollwyd yn erbyn Lloegr ym Mhencampwriaeth y Chwe Gwlad yn Stadiwm Principality yn 2025 ei chwarae o flaen 21,186 - sy'n record ar gyfer gêm gartref tîm merched Cymru mewn unrhyw gamp.

"Bydd yn gêm rygbi ac yn achlysur gwych," meddai Carol Isherwood, cadeirydd pwyllgor menywod y Llewod.

"Mae'n gyfle i ddatblygu'r gamp a gadael gwaddol, fel y gallwn barhau gyda thîm y Llewod drwy osod y sylfeini a rhoi cyfle i bawb weld gêm y menywod ar ei gorau."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.