Cymru'n trechu Fiji ar ddechrau Pencampwriaeth y Cenhedloedd

Fe sgoriodd Cymru chwe chais yn Stadiwm Dinas Caerdydd ddydd Sadwrn wrth drecu Fiji o 39 i 24 yn eu gêm agoriadol ym Mhencampwriaeth y Cenhedloedd.

Sgoriodd Jac Morgan ddau o'r ceisiau gan sicrhau wobr chwaraewr y gêm.

Roedd Fiji ar y blaen yn gynnar, ond llwyddodd Cymru i droi'r gêm o'u plaid gyda pherfformiad cryf yn yr ail hanner.

Golyga'r fuddugoliaeth bod tîm Steve Tandy wedi ennill dwy gêm ryngwladol yn olynol am y tro cyntaf ers Cwpan y Byd 2023.

Ar ôl dygymod â'r pwysau cynnar gan Fiji, croesodd Jac Morgan y llinell ddwywaith yn yr hanner cyntaf i gadw Cymru ar delerau cyfartal ar 10-10 erbyn yr egwyl.

Yn yr ail hanner, fe lwyddodd Rhys Carre, Josh Adams, Ryan Elias ac Eddie James i groesi'r llinell, gyda chicio Sam Costelow a Dan Edwards yn gyfrifol am weddill pwyntiau Cymru.

Sgoriodd Pita-Gus Sowakula, Elia Canakaivata a Selestino Ravutaumada geisiau Fiji, gydag Isaiah Armstrong-Ravula yn ychwanegu naw pwynt gyda'i giciau.

Er mai Fiji oedd y tîm cartref yn swyddogol, cynhaliwyd y gêm yng Nghaerdydd oherwydd nad oes gan y wlad stadiwm sy'n bodloni gofynion Pencampwriaeth y Cenhedloedd.

Bydd Cymru'n wynebu'r Ariannin a De Affrica yn eu gemau nesaf yn y gystadleuaeth.

Roedd y cyfnod cyn y gêm wedi ei gysgodi gan anghydfod rhwng Undeb Rygbi Cymru a'r chwaraewyr ynghylch ffioedd gemau, a gafodd ei ddatrys ychydig ddyddiau cyn y gic gyntaf.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.