Teyrnged i ddyn a fu farw ar ôl cael ei daro gan sawl cerbyd

Llun pen ac ysgwyddau o Gerard Trojanowski - dyn 44 oed gyda gwallt byr brown golau a llygaid glasLlun teulu

Roedd Gerard Trojanowski yn berson "ardderchog a hael gyda chalon fawr", medd ei deulu

Mae teulu dyn 44 oed a fu farw yn dilyn gwrthdrawiad chwe cherbyd ar yr A40 yng Nghaerfyrddin wedi rhoi teyrnged iddo.

Roedd Gerard Trojanowski yn cerdded ar y ffordd cyn y gwrthdrawiad tua 21:50 nos Fawrth 28 Gorffennaf rhwng cylchfan PC World a chylchfan Abergwili.

Roedd yr adroddiadau cyntaf i'r heddlu yn lleisio pryderon am ddiogelwch cerddwr ar yr A40, cyn adroddiadau pellach bod cerbydau wedi bod mewn gwrthdrawiad â'r unigolyn.

Bu farw Mr Trojanowski yn y fan a'r lle.

Arwyddion ffordd yn rhoi gwybod bod rhan o'r A40 ar gau yn dilyn y gwrthdrawiad

Roedd yr A40 ar gau am gyfnod yn dilyn y gwrthdrawiad

Mewn datganiad byr ddydd Gwener, dywedodd ei deulu ei fod "yn ŵr a thad serchus".

Maen nhw hefyd yn ei ddisgrifio fel "person ardderchog a hael â chalon fawr".

Gan ychwanegu "y bydd wastad yn ein hatgofion" mae'r teulu wedi apelio "am breifatrwydd yn ystod y cyfnod anodd yma".

Yn ôl adroddiadau bu un o gerbydau'r heddlu mewn gwrthdrawiad â'r Mr Trojanowski hefyd - roedd y car heddlu yn digwydd bod yn patrolio'r ardal ar y pryd ac fe wrthdarodd yn erbyn y cerddwr cyn i blismyn a oedd yn ymateb i'r digwyddiad gyrraedd.

Mae'r achos wedi cael ei gyfeirio at yr IOPC, sef y Swyddfa Annibynnol ar gyfer Ymddygiad yr Heddlu.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Straeon perthnasol