Iechyd a lles

Hwre! Dw i'n mynd am dro! Dw i wrth fy modd yn mynd am dro. Weithiau, dw i'n cerdded o gwmpas y dref ac weithiau, dw i'n cerdded i fyny mynyddoedd. Ydw, dw i wrth fy modd yn mynd am dro! Dw i'n hoffi'r awyr iach a dw i'n hoffi symud fy nghorff.

Mae cadw'n heini yn bwysig. Mae fy ffrind Femi wrth ei bodd yn rhedeg. Mae hi'n rhedeg ar y trac, ond yn rhedeg o gwmpas y dref hefyd.

Mae fy ffrind arall, Gronw, yn hoffi sglefrfyrddio. Mae e'n gallu gwneud triciau anhygoel, fel ollies - waw, da iawn Gronw! Mae e'n sglefrfyrddio pan mae hi'n braf!

Mae llawer o bethau yn gwneud i fi deimlo'n dda. Dw i'n teimlo'n dda pan dw i'n cerdded, chwarae pêl-droed, neu pan dw i'n gwneud ioga.

Weithiau, bydda i'n eistedd o flaen sgrin yn rhy hir. Pan mae hynny'n digwydd, dw i'n mynd allan i gael awyr iach i symud fy nghorff. Mae'n ffordd mor hawdd o deimlo'n dda!

Mae iechyd meddwl yn bwysig. Dw i'n hapus tu allan, yn enwedig yn y parc neu ar lan y môr. Dw i'n mwynhau gwrando ar gerddoriaeth a dawnsio. Weithiau, dw i'n hoffi eistedd ar fy ngwely a darllen llyfr da.

Mae Mam wedi dangos i mi sut i anadlu'n ddwfn pan dw i'n teimlo'n grac neu'n drist. Dw i'n anadlu i mewn am bump… un, dau, tri, pedwar, pump… ac allan am bump… un, dau, tri, pedwar, pump. Yna, dw i'n teimlo'n well. Sut wyt ti'n cadw'n iach?