ኣቦኣን ኣዲኣን ቀቲላ ምስ ሬሳኦም ክትነብር ዝጸንሐት ጓልኣንስተይቲ

ቨርጂኒያ ምካላ፡ ፖሊስ ማዕጾ ገዝኣ ሰይሮም ክኣትው እንከለው ኣይሰንበደትን።

ብገለ ሸነኹ፡ ወለዳ ከም ዝቐተለት ንክፈልጡ ስለ ምንታይ ነዊሕ ግዜ ወሲዱሎም ብምባል ከይተገረመት ኣይትተርፍን።

ፖሊስ መቑሕ ናብ ኣእዳዋ ኣእትዮም ክኣስሩዋ እንከለው፡ “ኣጆኹም እባ፤ ብውሑድ ነታ ሕማቕ ሰብ ሒዝኵምዋ ኣለኹም” በለቶም።

ጐረባብቲ ጆንን ሎይስ ምካላን ናይ ጡረታ ግዝኦም ኣብ ገማገም ከሕልፉዎ ዝኸዱ እዩ መሲሉዎም ነይሩ።

እቲ ክውንነት ግን ምሕረት ብዘየርኣየት ጓሎም እዮም ተሰሚሞም ሞይቶም። ስለ ምንታይ ግን ከምኡ ገይራ።

እቲ ዛንታ ከምዚ እዩ።

እዞም መጻምዲ፡ ኣብ ደቡብ ምብራቕ ኢንግሊዝ ኣብ እትርከብ ምምሕዳር ኤሰክስ ጥቓ ቼልምስፎርድ’ዮም ዝነብሩ ነይሮም።

ኣብ 2019፡ ኣብ መንበሪ ገዛ እዞም መጻምዲ ዘጋጥም ዝነበረ ነገራት ሚስጢር ክኸውን ጀሚሩ።

ኣዝማድን መሓዙትን ወይዘሮ ሎይንስን ኣቶ ጆንን፡ እቶም መጻምዲ ናብ ገምገም ባሕሪ ኤሰክስ ጥሮታ ስለ ዝወጽኡ ናብ ገዛና ኣይትምጽኡ ተባሂሉ ይንገሮም።

እቲ ኣዝዩ ዘሰክፍ ክውንነት ግን ካልእ እዩ ነይሩ።

ቅድሚ ኣርባዕተ ዓመት፡ እዚ ካብ ሰባት ተኸዊሉ ዝጸንሐ ጭካነታት ኣብ ገዝኦም ተፈጺሙ።

መምህር መጽናዕቲታት ቢዝነስ ዝነበረ ጆን ምካላ ተሰሚሙ፤ ኣስክሬን እዚ ወዲ 70 ዓመት ሰብኣይ ድማ ካብ ንፋስ ዝኣትዎ ብሎኮታትን ኮቦርታታትን ኣብ ዝተሰርሐ ግዝያዊ መቓብር ተሓቢኡ።

ሬሳ ጓል 71 ዓመት በዓልቲ ቤቱ ሎይስ ምካላ ድማ፡ ኣብ ላዕለዋይ ደርቢ መንበሪ ገዛኦም ብድሕሪ ቦርሳታት ኮበርታታትን ተሓቢኡ ነበረ።

ጆይስ፡ ብማርቴሎ ተሃሪማ ብኻራ ተወጊኣ’ኳ እንተነበረት፡ ንሳ እውን ብጓላ ብዝተዋህባ ብሓኪም ዝተኣዘዘ መድሃኒት ተሰሚማ እያ ነይራ።

ጓል 36 ዓመት ቨርጂኒያ ምካላ፡ ብዓርቢ ቤት ፍርዲ ቼልምስፎርድ ብዘሕለፎ ውሳነ ብቕትለት እቶም መጻምዲ ካብ ማእሰርቲ ዕድመ ልክዕ ክሳብ ብውሑድ 36 ዓመታት ክትቕጻዕ ወሲኑ።

ን20 ዓመታት ጐረቤት እዞም ግዳያት ዝዀነ ፊል ሳርጀንት “እቶም መጋረጃታት ወትሩ ዝጸልመተ ስለ ዝነበረ ኣብቲ ገዛ ሰብ ኣሎ’ዶ የለን ክትፈልጥ ኣይትኽእልን ኢኻ። ከም ጽላሎት ካብ ሓደ ሸነኽ ናብ ካልእ ቀልጢፎም ሕልፍ ክብሉ ጥራይ ትርኢ” ኢሉ።

ወሲኹ፡ “ቨርጂንያ ንወለዳ ቀቲላ ወይ ንወለዳ ቀቲላ ምባል ኣዝዩ ይኸብደኒ። ደስ እትብልን ሰሓቒትን ኰይና፡ ደረቕ’ውን እያ። ዋዛታታ ፈጺሞም ባህ ዝብሉ ኣይነበሩን” ኢሉ።

ኣብ ወርሒ መስከረም 2023፡ ፖሊስ ኢሴክስ ካብ ጕጅለ ሓለዋ ካውንስል ምምሕዳር ኢሴክስ ቴሌፎን ይድወለሉ።

እዞም መጻምዲ ንነዊሕ ግዜ ካብ መንግስቲ ዝወሃቦም ሓገዝ ዘይምውሳዶም ስክፍታታት ከም ዘንቀለ ተነጊሩዎ።

ኣስክሬን ክልቲኦም ውልቀሰባት ኣብ ገዝኦም ንኣርባዕተ ዓመታት ተሓቢኡ።

እቲ ኣስክሬናት፡ መቓብር መሲሉ ኣብ ዝተሰርሐ ቦታ ብኮበርታታትን ቅብኣታትን ተሸፊኑ።

ጓሎም፡ ነፍሲ ወከፍ ቘጸራታት ብሽም ወለዳ ክትስርዝ እንከላ ዝተፈላለየ ምኽኒታት ተቕርብ ነይራ።

እቲ ሓደ ንዓኣ ዝመችአ ነገር፡ እታ ሃገር ብሰንኪ ኮሮናቫይረስ ጽኑዕ ሕጋጋት ዕጽዋ ኣተኣታትያ ምንባራ እዩ፤ ንሶም ግን ነዚ እዋን ኣይርኣይዎን።

ፖሊስ ከዛርባ እንከሎ እትህቦ ምኽኒት ክወሓጠሉ ኣይክኣለን፤ ስለ ምንታይ ወለዳ ኣብቲ ከባቢ ዘይርኣዩ? ዝብል ሕቶ ድማ ገለ ነገር ከም ዘሎ ክጥርጥር ደሪኹ። ነቶም መጻምዲ ቴሌቪዥን ዘካረዮም ኣላን ቶምሰን’ውን ጥርጣረታት ሓዲሩዎ።

እዚ፡ ካብቲ ቨርጂንያ ቴሌፎን ብምድዋል እቲ ክራይ ቴሌቪዥን ከም ዝሰረዙዎ ኣብ ክንድኦም ክትዛረቦ እንከላ እዩ ዝጅምር።

ሰራሕተኛታቱ እታ ቴሌቪዥን ንምውሳድ ናብ ገዛ ምካላ ክኸዱ እንከለው፡ ናብ ገዝኣ ክኣትው ከም ዘይክእሉን እቲ ቴሌቪዥን ኣብ ደገ ከም ዘሎን ተነጊሩዎም።

“ምናልባት ዝዀነ ጻምእ ዘለዋ እያ ኢለ ሓሲበ፤ ግን ክኣ ፈጺመ ወለዳ ክትቀትል እያ ኢለ ክሓእብ ኣይክእልን” ኢሉ።

‘ይግብኣኒ’ዩ’

ፖሊስ፡ ሓደ ግዜ ጥራይ ኣይኰነን፡ ቅድሚ ሕጂ’ውን ናብቲ ገዛ መጺኦም ነይሮም’ዮም።

እቲ ኣስክሬን ቅድሚ ምርካቦም ቨርጂንያ ኣብ ልዕሊኣ ይበጽሕ ኣሎ ዝበለቶ ክስታት ግህሰት ንምዝርራብ ናብቲ ገዛ ክመጽኡ ዓዲማቶም።

እንታይ ከም ዝሓሰበት ንሳ ጥራይ’ያ ትፈልጦ፤ ገለ ሰባት ግን ክትፍትኖም ኢላ እያ ዝብል ግምታት ሓዲሩዎም።

ኣብ መወዳእታ እቲ ዘቕረበቶ ክስታት ዋላ ሓደ ነገር ዘምጽእ ኣይነበረን።

ፖሊስ፡ ኣብ ወርሒ መስከረም 2023 ተመሊሶም ክመጽኡ እንከለው ዝያዳ ቅሩብነት ኣርእያ።

“እዚ መዓልቲ ከም ዝመጽእ ኣይፈልጥን ነይረ። ማእሰርቲ ዝምልከት፡ ዝዀነ ነገር ይግብኣኒ እዩ - ምኽንያቱ እቲ ትኽክለኛ ነገር ንሱ ስለ ዝዀነ፤ ምናልባት ቁሩብ ሰላም’ውን ክህበኒ ይኽእል” ኢላ።

ኣብቲ ገዛ ዝተረኽቡ ሰነዳት፡ ሓንቲ ጓል ኣንስተይቲ ወለዳ ዝፈሓረቶ ፋይናንሳዊ ሽርሒ ንከይረኽቡ እትገብሮ ዝነበረት ጻዕሪታት ዝምልከት ምስሊ ይህቡ።

ንሳ፡ ካብ ሰናይ ድሌት እቶም ወለዳ ወጻእ ገዛ ክራይ ከይከፈለት ክትነብርን ገንዘቦም ክትጥቀምን ብሽሞም ዓበይቲ ‘ክረዲት ካርዲታትን’ ክትእክብን ጸኒሓ።

ገለ ዝጽሓፈቶም ናይ ሓሶት ደብዳቤታት፡ ቨርጂንያ ወለዳ ብመታለልቲ ገንዘብ ከም ዝኸሰሩ ክመስሎም ገይራ ክተታልሎም ከም ዝጸንሐት ይሕብሩ።

ኣብ ግሃድ ግን እቲ ገንዘብ ንሳ እያ እተጥፍኦ ነይራ።

ቨርጂንያ፡ ምስ ቀተለቶም እውን እንተዀነ ጡረታ ወለዳ ክትጥቀመሉ እያ ጸኒሓ።

እቶም ስድራ፡ ጓሎም በዓልቲ ሞያ፡ ጽቡቕ ስራሕ ዘለዋን ስነ-ጥበባዊት ክትከውን ኣበርቲዓ እትሰርሕን ሰብ እዩ ዝመስሎም ነይሩ።

እዚ ሞያ፡ ንስድርኣ ፋይናንሳዊ ረብሓታት ከምጽኣልኩም’ዩ ትብሎም ነይራ።

ኣብ ክንድኡ ግን፡ ሕያውነት ወለዳ ንምትላልን ኣብ ልዕሊኦም ግህሰታት ንምፍጻምን ተበሊጻትሉ።

ብሓፈሻ፡ ቨርጂንያ ብሰንኪ ቅትለት ወለዳ - ካብ ጡረታኦምን ኣብ ክረዲት ካርዶም ዝገብርዎ ወጻኢታትን ከምኡ'ውን ንብረት ብምሻጥን ተደሚሩ- 149,697 ፓውንድ ከሲባ።

ቤት ፍርዲ፡ ካብ 2019 ክሳብ 2023 21 ሽሕ ፓውንድ ኣብ ቁማር ኢንተርነት ከም ዘውጽአት'ውን ሰሚዑ።

እተቕርቦም ዝነበረት ሓሶታትን ንከይትቃላዕ ዝነበራ ፍርሒን፡ ኣብ መወዳእታ ንወለዳ ብጭካነ ክትቀትሎም ገይሩዋ።

ካብ ሽዑ ጀሚሩ፡ ገዛ ስድራቤት ምካሎ ብሓጺን ብዝተሰርሐ ናይ ድሕነት መከላኸሊታት ተሃርሂሩ።

ኣብ ጥቓ ገዝኦም ኣብ ዝርከብ ማእከል ዕዳጋ ዝሰርሕ ዝነበረ ፖል ሃስቲንግስ እውን ምጥፋኦም ኣስተብሂሉ።

ካብ ድኳኑ ኣቑሑት ዝገዝኡ ዝነበሩ ወለዳ ድሕሪ ሕጂ ኣብ ግሬት ባዶው ከም ዘይነብሩ ነጊራቶ።

ሃስቲንግስ፡ እቲ ፍሉይ ባህርያት ቨርጂንያ ጥርጣረ ብዘይፈጥር መልክዑ ክትዛረብ ከም እትኽእል ዘረጋግጽ እዩ ይብል።

“ናብቲ ድኳን ኣትያ 'ፖሊስ ይከታተሉኒ ኣለው፤ ኣቡኣን ኣዲኣ ቀቲላ ኢሎም ዝሓስቡ ይመስለኒ’ ኢላትኒ። እዚ ቁሩብ ዝተፈለየ’ዩ ኢለ ሓሲነ፤ ግን ካልእ ኣይገመትኩን - በቃ እቲ ዝተፈለየ ባህርያታ እዩ ዝኸውን ኢለ ሓሊፈዮ” ይብል።

ቨርጂንያ፡ ሓሓሊፉ ኣብ መዓልቲ ኣርባዕተ ግዜ ናብቲ ድኳን ከም እትመጽእ፤ ድሕሪኡ ንኣርባዕተ መዓልቲ ከም እትጠፍእ ተዛሪቡ።

ደቢ ፖላርድ፡ ቨርጂንያ ናብቲ ዕምበባታት እትሸጠሉ ድኳን ብምምጻእ መግብን ህያባትን ትልግሰላ ከም ዝነበረት ትገልጽ።

“ፍልይ ዝበለት ምዃና ንፈልጥ ነይርና፤ኣ ግን ነቲ ብጭቡጥ ዝገበረቶ ክትገብር ዓቕሚ ኣለዋ’ዩ ኢለ ፈጺመ ክግምቶ ኣይክኣልኩን። ኣብቲ ገዛ ንዓመታት ምስ ሬሳ ኣዲኣን ኣቦኣን ትነብር ነይራ - እዚ ንዓይ የፍርሓኒ’ዩ። የፍርሓኒ’ዩ”።

ክልቲኦም ነበርቲ እቲ ከባቢ፡ ቨርጂንያ ኣብ ትሕቲ ክዳውንታ ናይ ሓሶት ምጕርፋጥ ከይተረፈ ብምፍጣር ነፍሰ ጾር ክትመስል ትፍትን ከም ዝነበረት ጠቒሶም።

ፖሊስ ሮብ ኪርቢ “ዝርዝር ናይዚ ጕዳይ ነቶም ኣዝዮም ምኩራት መርመርቲ ቅትለት ከይተረፈ የሰንብዶምን የስካሕክሖን” ኢሉ።

ቨርጂንያ፡ ብዓርቢ ኣብ ዝተጋብአ መስርሕ ፍርዲ ኣዒንታ ናብ መሬት ይጥምታ እኳ እንተነበራ፡ ቅትለት ኣዲኣ ብኸመይ ኣገባብ ከም ዝፈጸመቶ ንፖሊስ ክትገልጽ እንከላ ዝተቐድሐ ቃለ መጠይቕ ኣብ ዝቐረበሉ እዋን ጥራይ ኣዲኣ ክትበኪ ጀሚራ።

ቨርጂንያ ምካሎ ብዓርቢ ማእሰርቲ ዕድመ ልክዕ፤ ብውሑድ 36 ዓመታት ተፈሪዳ።