కేటీఆర్‌కు హోటళ్లు ఎన్ని? అఫిడవిట్లలో ఏముంది.. వెబ్‌సైట్‌లో ఏం ఉంది?

బీఆర్ఎస్ వర్కింగ్ ప్రెసిడెంట్, సిరిసిల్ల ఎమ్మెల్యే కె.తారక రామారావు(కేటీఆర్) స్టార్ హోటళ్లు నడుపుతున్నారంటూ సీఎం రేవంత్ రెడ్డి చేసిన వ్యాఖ్యలు చర్చనీయాంశంగా మారాయి.

హైటెక్ సిటీ ప్రాంతంలో కేటీఆర్ స్టార్ హోటళ్లు నడిపిస్తున్నారని, వాటిల్లో 400 గదులు ఉన్నాయంటూ సీఎం చేసిన వ్యాఖ్యలు తెలంగాణలో రాజకీయ దుమారం రేపాయి.

సీఎం చేసిన వ్యాఖ్యలపై అటు కేటీఆర్ కూడా స్పందించారు.

తన హోటళ్ల వ్యాపారం విషయాన్ని 2009లో పోటీ చేసినప్పుడే ఎన్నికల అఫిడవిట్‌లో ప్రస్తావించానని కేటీఆర్ తెలిపారు. ఇందులో రేవంత్ రెడ్డి కనుగొన్నదేమిటంటూ ఆయన అన్నారు.

ఈ నేపథ్యంలో కేటీఆర్ 2009, 2023 ఎన్నికల అఫిడవిట్లలో ఏముందనే విషయాన్ని బీబీసీ పరిశీలించింది.

అసలు రేవంత్ రెడ్డి ఏమన్నారంటే…

సెప్టెంబరు 30న ముఖ్యమంత్రి రేవంత్ రెడ్డి సిరిసిల్లలో పర్యటించారు. ఈ సందర్భంగా వివిధ అభివృద్ధి పనులకు శంకుస్థాపన చేశారు. ఆ తర్వాత సిరిసిల్లలో జరిగిన బహిరంగ సభలో రేవంత్ రెడ్డి మాట్లాడారు.

''డెక్కన్ సరాయి ఫైవ్ స్టార్ హోటళ్లు ఎవరివి..? ఎట్ హోం సర్వీస్ అపార్ట్‌మెంట్స్ ఎవరివి..? ఈ వేల కోట్ల రూపాయల ఆస్తులు మొన్నటి వరకు ఆంధ్రవాళ్ల పేరు మీద ఉంటే, ఆరు నెలల కింద నీ పేరు మీదకు ఎట్లొచ్చినయ్'' అంటూ కేటీఆర్ లక్ష్యంగా విమర్శలు చేశారు రేవంత్ రెడ్డి.

''హైటెక్ సిటీ చుట్టుముట్టూతా 400 రూములతో నీ పేరు మీద, నీ భార్య పేరు మీద, నీ అత్త పేరు మీద చూపించకపోతే నా పేరు మార్చుకుంటా..'' అన్నారు.

కేటీఆర్ ఏం చెప్పారంటే..

రేవంత్ రెడ్డి వ్యాఖ్యలపై సెప్టెంబరు 1న తెలంగాణ భవన్‌లో కేటీఆర్ స్పందించారు.

''2006లో రాజకీయాల్లో వచ్చా. అమెరికాలో సంపాదించుకున్న నాలుగు పైసలున్నయ్. దాంతోనే హోటల్ పెట్టుకున్నా. అది ఎప్పుడంటే, 2006లో. అప్పుడు కాంగ్రెస్ ప్రభుత్వం ఉండె. ఒక హోటల్ అప్పుడు పెట్టినా.. అది 20 ఏళ్లలో పెరిగి మూడు హోటళ్లు అయ్యింది'' అని చెప్పారు కేటీఆర్.

తాను హోటళ్లను పెద్దగా పట్టించుకోలేదని, రాజకీయాల్లో లేకుండా ఉంటే, ఈపాటికి పది హోటళ్లు చేసేవాడినని ఆయన అన్నారు.

''2009లో పోటీ చేసినప్పుడు ఎలక్షన్ అఫిడవిట్‌లో చెప్పిన. ఇది నా ఆస్తి. ఇది నా అప్పు, ఇది నా పత్రం అని నోటరైజ్డ్ అఫిడవిట్‌లో చెప్పి వచ్చినా. నేను 2009లో అఫిడవిట్‌లో రాసిన దాని గురించే రేవంత్ రెడ్డి చెబుతున్నడు'' అని కేటీఆర్ అన్నారు.

''నువ్వు చెప్పేదేముంది.. నేనే చెప్పా. నువ్వేదో కనిపెట్టినట్లు కొలంబస్ లెక్క.. వాస్కోడగామా అదేదో కనిపెట్టినట్లుగా.. నువ్వేం కనిపెడితివి కొత్తగా.. అఫిడవిట్‌లో ఉన్నదే నువ్వు చెబుతున్నవ్'' అని రేవంత్ రెడ్డినుద్దేశించి అన్నారు కేటీఆర్.

కేటీఆర్ అఫిడవిట్‌లో ఏం చెప్పారు?

కేటీఆర్ ఉమ్మడి ఆంధ్రప్రదేశ్‌లో 2009లో జరిగిన అసెంబ్లీ ఎన్నికల్లో మొదటిసారి సిరిసిల్ల నుంచి పోటీ చేశారు.

ఆ సందర్భంగా ఎన్నికల సంఘానికి ఆయన దాఖలు చేసిన అఫిడవిట్‌ను బీబీసీ పరిశీలించింది. దాని ప్రకారం, చరాస్తులలో భాగంగా రూ.8 లక్షల బాండ్స్, హిమాన్షు మోటార్స్ ప్రైవేట్ లిమిటెడ్ కంపెనీలో రూ.30 లక్షల పెట్టుబడులు, ఎట్ హోం హాస్పిటాలిటీ సర్వీసెస్ ప్రైవేట్ లిమిటెడ్‌లో రూ.10 లక్షల పెట్టుబడులు ఉన్నట్లుగా పేర్కొన్నారు.

ఇందులో ఎట్ హోం హాస్పిటాలిటీ సర్వీసెస్ ప్రైవేట్ లిమిటెడ్ కంపెనీ కిందనే హోటల్ నిర్వహించారు కేటీఆర్.

ఇంకా ఏయే ఆస్తులు ప్రస్తావించారంటే..

కేటీఆర్ తన వద్ద రూ.9 లక్షల నగదు, బ్యాంకుల్లో రూ.18.50 లక్షల డిపాజిట్లు, రూ.87.50 లక్షల విలువగల వేర్వేరు ఎల్‌ఐటీ పాలసీలు, రూ.75 వేలు విలువ చేసే 50 గ్రాముల బంగారం ఉన్నట్లుగా పేర్కొన్నారు.

అదే అఫిడవిట్‌లో తన భార్య శైలిమ వద్ద రూ.2.42 లక్షల నగదు, బ్యాంకుల్లో రూ.50 వేల డిపాజిట్లు, రూ.లక్ష ఎఫ్డీ, రూ.10 లక్షల ఆర్డీ, రూ.52.50 లక్షల విలువ చేసే బంగారు ఆభరణాలు ఉన్నట్లుగా కేటీఆర్ అఫిడవిట్‌లో చెప్పారు.

అలాగే 2009 ఎన్నికల నాటికి రూ.52,75,939 ఇంటి రుణం, రూ.4,73,562 కారు లోన్ ఉన్నట్లుగా కేటీఆర్ పేర్కొన్నారు.

అలాగే చరాస్తులకు సంబంధించి శామీర్ పేటలో తన పేరుతో ఎకరా భూమి, కొండాపూర్‌లో ఫ్లాట్.. ఇక భార్య పేరుతో హైదరాబాద్ అల్వాల్ పాకాలకుంటలో 660 చదరపు గజాల ప్లాటు, మచ్చబొల్లారంలో 534 చదరపు గజాల ప్లాటు, మొయినాబాద్ మండలం తొల్కట్టలో 400 చదరపు గజాల భూమి ఉన్నట్లుగా అఫిడవిట్‌లో కేటీఆర్ పేర్కొన్నారు.

2023 నవంబరులో జరిగిన తెలంగాణ అసెంబ్లీ ఎన్నికల సందర్భంగా దాఖలు చేసిన అఫిడవిట్‌లోనూ కేటీఆర్ తన హోటళ్ల వ్యాపారం విషయాన్ని ప్రస్తావించారు.

ఆయన వెల్లడించిన వివరాల ప్రకారం, ఎట్ హోం హాస్పిటాలిటీ సర్వీసెస్ ప్రైవేటు లిమిటెడ్ లో రూ.78,05,620 ఈక్విటీ షేర్లు ఉన్నట్లుగా పేర్కొన్నారు. అలాగే తన భార్య శైలిమ పేరుతో ఎట్ హోం హాస్పిటాలిటీ సర్వీసెస్ ప్రైవేటు లిమిటెడ్ లో రూ.2,99,88,950 ఈక్విటీ షేర్లు ఉన్నట్లుగా చెప్పారు.

ఇది కాకుండా కేటీఆర్ తన పేరుతో తెలంగాణ బ్రాడ్‌కాస్టింగ్ ప్రైవేట్ లిమిటెడ్‌లో రూ.10 లక్షలు విలువైన ఈక్విటీ షేర్లు, రూ.22,01,727 విలువగల డీమ్యాట్ షేర్లు ఉన్నాయని చెప్పారు.

తన భార్య శైలిమ పేరుతో ఈటీజీ గ్లోబల్ సర్వీసెస్ ప్రైవేటు లిమిటెడ్ కంపెనీలో రూ.1,53,04,467 ఈక్విటీ షేర్లు, రూ.1,01,856 విలువైన గోల్డ్ బాండ్స్ ఉన్నాయని పేర్కొన్నారు.

ఇవి కాకుండా తన పేరుతోపాటు తన కుటుంబీకుల పేరుతో మరికొన్ని స్థిరాస్తులు, చరాస్తులు, లోన్లు ఉన్నట్లుగా ఎన్నికల్ అఫిడవిట్‌లో పేర్కొన్నారు. ఆ వివరాలను అఫిడవిట్ లో చూడవచ్చు.

ఇంతకీ డెక్కన్ సెరాయ్ హోటల్స్ ఎవరివి..

డెక్కన్ సెరాయ్ హోటల్స్ వెబ్‌సైట్‌ను బీబీసీ పరిశీలించింది.

డెక్కన్ సెరాయ్, డెక్కన్ సెరాయ్ గ్రాండె, ఎట్ హోం అండ్ సర్వీసెడ్ అపార్టుమెంట్స్.. ఇలా మూడు హోటళ్లు ఎట్ హోం హాస్పిటాలిటీ సర్వీసెస్ ప్రైవేటు లిమిటెడ్ గ్రూపులో భాగంగా ఉన్నాయి.

కేటీఆర్ చెప్పినట్లుగా 2009లో ఒక హోటల్ ఉండగా.. ఇప్పుడు మూడు హోటళ్లు నిర్వహిస్తున్నారు.

డెక్కన్ సెరాయ్ వెబ్‌సైట్‌లో పేర్కొన్న వివరాల ప్రకారం చూస్తే, డెక్కన్ సెరాయ్ పేరుతో హైటెక్ సిటీలో ఒక హోటల్ ఉంది. ఇది 3-స్టార్ హోటల్.

హోటల్ ఎట్ హోం అండ్ సర్వీసెడ్ అపార్ట్‌మెంట్స్ పేరుతో సర్వీస్డ్ అపార్ట్‌మెంట్ కొండాపూర్‌లో ఉంది.

డెక్కన్ సెరాయ్ గ్రాండె పేరుతో మరో 4 స్టార్ హోటల్ గచ్చిబౌలిలో ఉంది.

ఈ హోటళ్లలో 400 గదులు ఉన్నట్లుగా రేవంత్ రెడ్డి తన ప్రసంగంలో చెప్పారు.

ఎట్ హోం హోటల్ వెబ్‌సైట్ ప్రకారం, అందులో 120 గదులు ఉన్నాయి. ఇది సర్వీస్ అపార్టమెంట్ కింద ఆపరేట్ అవుతున్నట్లుగా ఉంది. ఇక డెక్కన్ సెరాయ్ వెబ్ సైట్ ప్రకారం చూస్తే, అందులో ఐదు అంతస్తుల్లో 100 గదులు ఉన్నట్లుగా ఉంది.

అలాగే మరో హోటల్ డెక్కన్ సెరాయ్ గ్రాండెలో 190 గదులు ఉన్నాయి. ప్రముఖ ఐటీ కంపెనీల నమ్మకాన్ని చూరగొన్నట్లుగా వెబ్ సైట్‌లో రాసి ఉంది.

కేటీఆర్ ఇంకా కొనసాగుతున్నారా..

ఈ ఎట్ హోం హాస్పిటాలిటీ సర్వీసెస్ ప్రైవేట్ లిమిటెడ్‌కు సంబంధించి షేర్ క్యాపిటల్ రూ.4 కోట్లు కాగా, పెయిడ్ అప్ క్యాపిటల్ రూ.3 కోట్లుగా ఉంది. దీని రిజిస్టర్డ్ అడ్రస్ హైదరాబాద్‌లోని కొండాపూర్‌లో ఉంది.

ఈ కంపెనీని 2005 అక్టోబరు 25 న ఏర్పాటు చేశారు. అదే రోజున కేటీఆర్ కంపెనీలో డైరెక్టర్‌గా చేరారు.

2014 అక్టోబరు 4న కంపెనీ నుంచి డైరెక్టర్‌గా కేటీఆర్ తప్పుకొన్నట్లుగా ఉంది. అయితే, తన 2023 ఎన్నికల అఫిడవిట్‌లో మాత్రం తనకు కంపెనీలో ఈక్విటీ షేర్లు ఉన్నట్లుగా పేర్కొన్నారు కేటీఆర్.

ప్రస్తుతం కంపెనీలో డైరెక్టర్‌గా కేటీఆర్ భార్య కల్వకుంట్ల శైలిమ ఉన్నారు. ఆమె 2021 నవంబరు 26 నుంచి డైరెక్టర్ గా కొనసాగుతున్నారు.

అంతకుముందు 2021 మార్చి 5న ఆమె ఇదే కంపెనీలో అదనపు డైరెక్ఱ్ గా చేరారు. అలాగే ఎట్ హోం హాస్పిటాలిటీ సర్వీసెస్ కు పూర్తి స్థాయి డైరెక్టర్‌గా చిలుకూరి పట్టాభి రామారావు, ఎండీగా తేలుకుంట్ల శ్రీధర్ ఉన్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)