அர்ஜென்டினாவிடம் தோல்வி: 'அநீதி' என்று கூறிய எகிப்து மெஸ்ஸியை குறிவைத்தது ஏன்?

ஆட்டத்தின் வழக்கமான நேரம் முடிய 12 நிமிடங்கள் இருந்த நிலையில், எகிப்து அணி உலகக் கோப்பை வரலாற்றைப் படைக்கும் தருவாயில் இருந்தது.

ரசிகர்கள் நிறைந்த அட்லாண்டா மைதானத்தில், நடப்பு உலக சாம்பியனான அர்ஜென்டினாவுக்கு எதிராக எகிப்து 2-0 என்ற கணக்கில் முன்னிலையில் இருந்தது. நேரம் செல்லச் செல்ல, அர்ஜென்டினா ரசிகர்களின் விரக்தி அதிகரித்தது.

கால்பந்து மீது மிகுந்த ஆர்வம் கொண்ட ஆப்ரிக்க நாடான எகிப்துக்கு, காலிறுதிப் போட்டியில் இடத்தைப் பிடிப்பதற்கு இது ஒரு பொன்னான வாய்ப்பாக அமைந்தது.

அவர்கள் முதல் முறையாக நாக்-அவுட் சுற்றில் தங்களின் மிகச்சிறந்த ஆட்டத்தை வெளிப்படுத்தும் தருவாயில் இருந்தனர்.

ஆனால், அதற்கு அடுத்த சில நிமிடங்கள் அவர்களுக்கு மிகவும் மோசமானதாக அமைந்தன.

79-ஆவது நிமிடத்தில் அர்ஜென்டினாவின் கிறிஸ்டியன் ரொமேரோ ஒரு கோல் அடித்து கோல் வித்தியாசத்தைக் குறைத்தார்.

ஆனால், எகிப்து அணி தொடர்ந்து உறுதியுடன் போராடியது.

கால்பந்து ரசிகர்களால் 'கோட்' (GOAT) என்று அழைக்கப்படும் அர்ஜென்டினாவின் கேப்டன் லியோனல் மெஸ்ஸி, அடுத்த நான்கே நிமிடங்களில் மற்றொரு கோல் அடித்து ஸ்கோரை 2-2 என சமன் செய்தார். இதனால் எகிப்து அணி சற்று பதற்றமடையத் தொடங்கியது.

அதன்பின்னர், கூடுதல் நேரத்தின் இரண்டாவது நிமிடத்தில் என்சோ பெர்னாண்டஸ் ஹெடர் மூலம் ஒரு கோல் அடித்தார். இது மைதானத்தில் இருந்த அர்ஜென்டினா ரசிகர்களை மகிழ்ச்சியில் ஆழ்த்தியது.

உலகக் கோப்பை வரலாற்றிலேயே மிகவும் குறிப்பிடத்தக்க தருணங்களில் ஒன்றாக இது அமைந்தது. எகிப்துக்கு எதிரான இந்த 3-2 என்ற வெற்றியின் மூலம் அர்ஜென்டினா கால் இறுதிப் போட்டிக்கான தனது இடத்தை உறுதி செய்தது.

வீடியோ அசிஸ்டண்ட் ரெஃப்ரி, ஃபவுல் காரணமாக முஸ்தஃபா ஜிகோவின் இரண்டாவது கோலை நிராகரித்ததால், எகிப்திய அணி விரக்தியும் ஆத்திரமும் அடைந்தது. அந்த நேரத்தில் எகிப்து 1-0 என்ற கோல் கணக்கில் முன்னிலையில் இருந்தது, இந்த கோல் அடித்திருந்தால் அவர்கள் 2-0 என்ற முன்னிலையைப் பெற்றிருப்பார்கள்.

மிட்ஃபீல்டர் மர்வான் அத்தியா, லிசாண்ட்ரோ மார்டினெஸின் காலில் மிதித்ததற்காக அபராதம் விதிக்கப்பட்டபோது இந்த ஃபவுல் நிகழ்ந்தது.

எகிப்தின் கோபம் இத்துடன் முடிந்துவிடவில்லை.

அர்ஜென்டினாவின் மூன்றாவது கோலுக்கு சில நொடிகள் முன்பாக, தங்களின் பெனால்டி பகுதியில் முகமது சலா ஃபவுல் செய்யப்பட்டதாக அவர்கள் நம்பினர்; ஆனால் நடுவர் அதைப் புறக்கணித்துவிட்டு ஆட்டத்தைத் தொடர அனுமதித்தார்.

பிரெஞ்சு நடுவரான ஃபிரான்சுவா லெடெக்சியர் ஆட்டமுடிவுக்கான விசிலை ஊதியபோது, பல எகிப்து வீரர்களால் தங்களின் இந்தத் தோல்வியை நம்ப முடியவில்லை, அவர்கள் மைதானத்திலேயே விரக்தியை வெளிப்படுத்தத் தொடங்கினர்.

போட்டிக்குப் பிந்தைய ஒரு பரபரப்பான பேட்டி ஒன்றில் பேசிய எகிப்து கேப்டன் ஹோசாம் ஹாசன், தங்கள் அணி "அநீதியான முறையில் நடத்தப்பட்டது" என்று கூறினார்.

இது குறித்த கருத்து கேட்பதற்காக பிபிசி ஸ்போர்ட் ஃபிஃபாவைத் தொடர்பு கொண்டுள்ளது.

"மைதானத்துக்கு உள்ளேயும் வெளியேயும் கேள்விக்குள்ளாக்கப்பட வேண்டிய பல விஷயங்கள் உள்ளன" என்று ஹோசாம் ஹாசன் கூறினார்.

தொடர்ந்து பேசிய அவர், "எல்லா இடங்களிலும் எதிர்மறையான அம்சங்கள் உள்ளன. இது அனைத்தும் நம்பகத்தன்மை பற்றிய கேள்விதான். நிகழ்வுகள் அரங்கேறிய விதம், நம்பகத்தன்மை குறித்துக் கடுமையான கேள்விகளை எழுப்பியுள்ளது." என்றார்.

"ஒருவேளை உலக சாம்பியனை அவர்கள் இந்தத் தொடரில் தக்கவைக்க விரும்பியிருக்கலாம். ஒருவேளை மெஸ்ஸி இந்தப் போட்டியில் தொடர வேண்டும் என்று அவர்கள் விரும்பியிருக்கலாம்." என அவர் தெரிவித்தார்.

"உலக சாம்பியன்களுக்கு அனைத்து நிலைகளிலும் ஆதரவு கிடைத்தது. இந்த முடிவுக்காக அர்ஜென்டினா தரப்பில் இருந்து அழுத்தம் கொடுக்கப்பட்டது போல் தெரிகிறது" என்றும் அவர் குறிப்பிட்டார்.

இந்த ஆட்டத்தில் மெஸ்ஸியின் பெனால்டி தவறவிட்டது, மறுக்கப்பட்ட ஒரு கோல், ஒரு ரெட் கார்டு மற்றும் அந்த அணி மீண்டெழுந்த விதம் என அனைத்தும் நிறைந்திருந்தது.

'விளையாட்டுத் துறையில் ஏன் நியாயமான அணுகுமுறை இல்லை?'

உலகக் கோப்பைக்கு முந்தைய நாள், எகிப்து தலைமைப் பயிற்சியாளர் ஹாசன், தனது நாட்டின் கடந்தகால செயல்பாடுகளைத் திரும்பிப் பார்த்து, "உலகக் கோப்பையில் நாம் இன்னும் சிறப்பாகச் செயல்பட வேண்டும்" என்று கூறினார்.

கடந்த மூன்று உலகக் கோப்பைகளிலும் எகிப்து சிறப்பாகச் செயல்படவில்லை, மேலும் தான் விளையாடிய ஏழு போட்டிகளில் ஒரு போட்டியில் கூட அது வெற்றி பெறவில்லை.

அர்ஜென்டினாவுக்கு எதிரான ஆட்டத்தின் 15-ஆவது நிமிடத்தில் யாசர் இப்ராஹிம் ஹெடர் மூலம் அடித்த கோலால் எகிப்து 1-0 என்ற கணக்கில் முன்னிலை பெற்றது.

பிறகு சிறிது நேரத்திலேயே அர்ஜென்டினாவுக்கு ஒரு பெனால்டி வாய்ப்பு வழங்கப்பட்டது, ஆனால் மெஸ்ஸியின் நகர்வை எகிப்து கோல்கீப்பர் முஸ்தஃபா ஷோபீர் மிகச் சிறப்பாகத் தடுத்தார்.

ஃபெர்னாண்டஸ் கடைசி நிமிடத்தில் அடித்த வெற்றி கோல் எகிப்தின் கோபத்தை மேலும் தூண்டியது, ஏனெனில் சலா மீதான ஃபவுலைத் தொடர்ந்து எகிப்து ஒரு பெனால்டி கோரியிருந்தது.

அதன் பின்னர், பெஞ்சில் அமர்ந்திருந்த எகிப்திய பின்னணி உதவிக் குழுவின் உறுப்பினர் ஒருவருக்கு நடுவர் ரெட் கார்டு காட்டினார்.

மேலும், அர்ஜென்டினாவின் வெற்றிக்கு உதவிய கோலுக்குப் பிறகு எகிப்தின் தலைமைப் பயிற்சியாளர் தனது கைகளால் சிலுவை அடையாளம் இட்டு எதிர்ப்பு தெரிவித்ததற்காகவும் அவர் மீது வழக்குத் தொடரப்பட்டது.

தங்களுக்கோ அல்லது தங்கள் அணிக்கோ எதிராக இனவெறிச் சம்பவம் நிகழ்ந்துள்ளதாக ஒருவர் நம்பும்போது இவ்வாறு செய்யப்படுகிறது.

போட்டி முடிந்த பிறகு, தங்களின் தலைமைப் பயிற்சியாளர் ஏன் இப்படிச் செய்தார் என்பது குறித்து எகிப்து தரப்பில் எதுவும் கூறப்படவில்லை.

"நாங்கள் அங்கு மரியாதையையோ அல்லது நேர்மையான ஆட்டத்தையோ பார்க்கவில்லை" என்று தலைமைப் பயிற்சியாளர் கூறினார்.

"எங்களுக்கான பெனால்டி மறுக்கப்பட்டது, அது விஏஆர் மூலம் சரிபார்க்கப்படக் கூட இல்லை. மேலும் எங்களது இரண்டாவது கோலும் ஏதோ ஒரு அறியப்படாத காரணத்துக்காக வியக்கத்தக்க வகையில் நிராகரிக்கப்பட்டது."

"அலெக்சிஸ் மெக் அலிஸ்டர் சட்டையைப் பின்னோக்கி இழுத்ததை நாம் அனைவரும் பார்த்தோம், ஆனால் விஏஆர் அதைச் சரிபார்க்கவே இல்லை. சாதாரண வாழ்க்கையில் அநீதி நடப்பது தவறு, ஆனால் விளையாட்டில் ஏன் அநீதி நடக்கிறது?" என்று கேள்வி எழுப்பினார்.

எகிப்து அணியின் ஃபார்வர்டு வீரர் ஜிகோ மேலும் கூறுகையில், "நடுவரின் நடத்தை மிகவும் நியாயமற்றதாக இருந்தது. அங்கு தெளிவான அநீதி இழைக்கப்பட்டது. போட்டியின் தொடக்கத்தில் இருந்தே அநீதி நிலவியது" என்றார்.

பகுப்பாய்வு: முக்கிய நடுவர் முடிவுகள்

இந்த உலகக் கோப்பையில், போட்டிகளின் போது தேவையின்றி நேரம் வீணடிக்கப்படுவதைத் தடுக்க நடுவர்களுக்கு அறிவுறுத்தப்பட்டுள்ளது.

இதற்காக, அவர்கள் வீரர்கள் இடையே ஏற்படும் லேசான மோதல்கள் அல்லது தொடுதல்களை அனுமதிக்க வேண்டும்.

இந்த உலகக் கோப்பையில் ஒரு போட்டிக்கு சராசரியாக 22.6 ஃபவுல்கள் பதிவாகியுள்ளன, அதே நேரத்தில் இந்த எண்ணிக்கை 2022-இல் 25 ஆகவும், 2018-இல் 27 ஆகவும் இருந்தது.

இதற்கும் எகிப்தின் மறுக்கப்பட்ட கோலுக்கும் என்ன சம்பந்தம்?

அத்தியா, மார்டினெஸின் சட்டையை லேசாக இழுத்து, தற்செயலாக அவரது கால் விரலை மிதித்தார்.

ஆனால் விஏஆர் தலையிட்டு, ஒரு ஃபவுல் காரணமாக ஜிகோவின் சிறப்பான கோல் ரத்து செய்யப்பட வேண்டும் என்று கூறியது.

சாதாரண சூழ்நிலையில் இது நிச்சயமாக ஒரு ஃபவுலாக இருந்திருக்கும், ஆனால் இந்த முடிவு இந்தத் தொடரில் நடுவர்கள் ஃபவுல்களைத் தீர்மானிக்கும் முறைக்கு ஏற்ப அமைந்திருக்கவில்லை.

மைதானத்தில் நடக்கும் இத்தகைய சவால்களை நீங்கள் அலட்சியப்படுத்துகிறீர்கள் என்றால், விஏஆர் மூலமும் அதையேதான் செய்ய வேண்டும்.

தங்களது கோல் மறுக்கப்பட்டதாலும், அதே நேரத்தில் அர்ஜென்டினாவின் வெற்றிக்கு உதவிய கோலுக்குச் சற்று முன்பு சலா மீதான ஃபவுல் அலட்சியப்படுத்தப்பட்டதாலும் எகிப்தின் கோபம் மேலும் தூண்டப்பட்டது. அந்த ஃபவுல் வழங்கப்பட்டிருந்தால், எகிப்துக்கு ஒரு பெனால்டி கிடைத்திருக்கக்கூடும், ஏனெனில் சலா அர்ஜென்டினாவின் பெனால்டி பகுதிக்குள் இருந்தார்.

ஜூலியன் ஆல்வரெஸ் தன்னை கீழே தள்ளியதாக எகிப்து வீரர் (சலா) கூறினார். இதையும் விஏஆர் சரிபார்த்திருக்க வேண்டாமா?

ஆனால், பெனால்டி வழங்குவதற்குப் போதிய ஆதாரங்கள் இல்லை என்று நடுவர் முடிவு செய்ததால், அர்ஜென்டினாவின் கோல் ஏற்றுக்கொள்ளப்பட்டது.

வேதனையும் பெருமையும்

ஷைமா கலீல், பிபிசி செய்தியாளர்

நான் அப்போது தான் எனது உறவினரின் ஒன்பது வயது மகளுடன் தொலைபேசியில் பேசி முடித்திருந்தேன்.

"மிஷா, இது மிகவும் கொடுமையானது. நாம் ஏமாற்றப்பட்டுவிட்டோம்!" என்று அவள் கோபத்துடன் அழுதுகொண்டே கூறினாள்.

அனைத்து எகிப்திய கால்பந்து ரசிகர்களின் வீடுகளிலும் மற்றும் அவர்களது குடும்ப வாட்ஸ்அப் குழுக்களிலும் இதேபோன்ற உரையாடல்கள்தான் நடந்து கொண்டிருக்கும் என்று நான் நினைக்கிறேன்.

மனவேதனை என்ற சொல் இந்த உணர்வை விவரிக்க போதுமானதாக இருக்காது.

இந்த ஆட்டம் ரசிகர்களை உணர்ச்சிப் பெருக்கில் ஆழ்த்தியது. நம்பிக்கையிலிருந்து உறுதியையும், பின்னர் அளவற்ற உற்சாகத்தையும் அதன் பிறகு கோபம் மற்றும் இறுதியில் வலியையும் தந்தது.

"எகிப்திய வம்சாவளியைச் சேர்ந்த ஒரு அமெரிக்கக் குடிமகனாக, இந்தச் சம்பவத்தின் ஒவ்வொரு நொடியையும் நான் உணர்ந்தேன்" என்று 41 வயதான சாமி எல்மன்சூரி என்னிடம் கூறினார்.

"அர்ஜென்டினாவுடன் எகிப்து சரிசமமாக நின்று விளையாடுவதைப் பார்ப்பது நான் எப்போதும் மறக்க முடியாத ஒரு அனுபவம். இந்த வீரர்கள் இன்று உலகிற்குக் காட்டிய திறமைக்கு ஈடு இணை இல்லை.இந்தத் தொடர் முழுவதும் அவர்களின் செயல்பாடு எப்போதும் நினைவுகூரப்படும்."

இன்று இரவு பல எகிப்தியர்கள் இதைத்தான் உணர்கிறார்கள் என்று நான் நினைக்கிறேன்.

பெருமிதம்... மற்றும் மனவேதனை.

அவர்கள் பலவீனமான அணியைப் போல விளையாடவில்லை,சமமான அணியைப் போல விளையாடினார்கள்.

இதற்கு முன்பு எந்த ஒரு எகிப்து அணியும் செய்யாத ஒன்றை இந்த அணி சாதித்துள்ளது. அவர்கள் ஒட்டுமொத்த நாட்டின் மற்றும் பிராந்தியத்தின் மன உறுதியையும் உயர்த்தியுள்ளனர்.

இந்தப் போட்டித்தொடர் முழுவதும் அவர்களின் தாரக மந்திரமாக 'மெக்காமெலீன்' என்பது இருந்தது. அதன் பொருள் 'நாங்கள் தொடர்ந்து முன்னேறிச் செல்வோம்' என்பதாகும்.

இந்த உலகக் கோப்பை ஏமாற்றத்தில் முடிந்திருக்கலாம், ஆனால் இந்த அணி கால்பந்தின் முக்கிய வலிமைமிக்க அணிகளில் ஒன்றாகக் கருதப்படுவதற்குத் தகுதியானது என்ற நம்பிக்கையை இது எகிப்தியர்களுக்கு வழங்கியுள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு