Suuriya oo sheegtay in duqeyn ay Israa’iil ka fulisay meel u dhow Dimishiq ay xadgudub ku tahay sharciga caalamiga ah
Xigashada Sawirka, Getty Images
Suuriya ayaa cambaareysay weerar ay Israa’iil ku qaadday tuulada Beit Jinn, oo ku taalla koonfur-galbeed caasimadda dalka ee Dimishiq. Mas’uuliyiintu waxay sheegeen in weerarku haleelay gaari rayid ah, isla markaana ay ku dhaawacmeen dhowr qof.
Weerarku wuxuu ahaa weerarkii labaad ee la xaqiijiyay ee Israa’iil ay Suuriya ka fuliso toddobaad gudihiis, iyadoo Suuriya ku tilmaantay “xadgudub” ka dhan ah madax-bannaanideeda iyo sharciga caalamiga ah.
Qoraal uu milatariga Israa’iil soo dhigay barta X ayuu ku sheegay in ay beegsadeen “argagixiso” oo ku jiray “marxaladihii ugu dambeeyay” ee diyaarinta weerarro, kuwaas oo khatar degdeg ah ku ahaa askarta Israa’iil.
Dhacdadan ayaa timid maalmo kadib markii ay soo baxeen warar sheegaya in Israa’iil ay duqeysay saldhig ciidan oo ku dhow xadka Turkiga. Suuriya waxay sheegtay in weerarkaasi uu khatar ku yahay inuu sii kordhiyo xiisadda gobolka.
Kadib weerarkii hore, Washington ayaa si aan caadi ahayn u cambaareysay Israa’iil, iyadoo ku tilmaantay “xaalad sii xumeyn ah oo aan loo baahnayn, taas oo aan waxba ka tarayn xasilloonida gobolka.”
Wareysi uu Jimcihii bixiyay, safiirka Maraykanka u fadhiya Turkiga, Tom Barrack, ayaa soo jeediyay in weerarkaasi uu noqon karo “Israa’iil oo Turkiga dabin u dhigaysa”, iyadoo isku dayaysa inay Turkiga geliso dagaal ka hor doorashooyinka soo socda ee Israa’iil.
Hadallada Barrack ayaa ka careysiiyay wasiirka gaashaandhigga Israa’iil ee garabka midigta fog, Israel Katz, kaas oo sheegay in hadalkiisa uu “ka buuxo khaladaad.”
Katz ayaa qoraal uu ku soo dhigay barta X ku sheegay in ciidamada Israa’iil ay tallaabooyinka qaadeen “iyagoo ka duulaya xog sirdoon oo cad oo ku saabsan ujeeddooyinka Turkiga.”
Warar dheeraad ah:
