ਆਈਪੀਐੱਲ ਫਾਈਨਲ ਵਿੱਚ ਕੋਲਕਾਤਾ ਦੀ ਟੀਮ ਹੈਦਰਾਬਾਦ ਨੂੰ ਹਰਾਉਣ ਵਿੱਚ ਕਿਵੇਂ ਸਫ਼ਲ ਰਹੀ
- ਲੇਖਕ, ਸੰਜੇ ਕਿਸ਼ੋਰ
- ਰੋਲ, ਬੀਬੀਸੀ ਲਈ
- ਪ੍ਰਕਾਸ਼ਿਤ
ਬਿਰਿਆਨੀ ਵਿੱਚ ਆਲੂ ਹੋਣੇ ਚਾਹੀਦੇ ਹਨ ਜਾਂ ਨਹੀਂ? ਫ਼ਿਲਹਾਲ ਇਸ ਬਹਿਸ ਨੂੰ ਸ਼ਾਹਰੁਖ਼ ਖ਼ਾਨ ਦੀ ਟੀਮ ਨੇ ਜਿੱਤ ਲਿਆ ਹੈ।
ਪੂਰੇ ਟੂਰਨਾਮੈਂਟ ਵਿੱਚ ਜ਼ਾਇਕੇਦਾਰ ਤੜਕਾ ਲਗਾਉਣ ਤੋਂ ਬਾਅਦ ਫਾਈਨਲ ਵਿੱਚ ਕਾਵਿਆ ਮਾਰਨ ਦੀ ਟੀਮ ਦਾ ਖੇਡ ਪ੍ਰਦਰਸ਼ਨ ਬਿਲਕੁਲ ਫ਼ਿੱਕਾ ਰਿਹਾ।
ਕਾਵਿਆ ਦੀ ਖ਼ਵਾਹਿਸ਼ ਅਧੂਰੀ ਰਹਿ ਗਈ ਅਤੇ ਟ੍ਰੇਡ ਮਾਰਕ ਹਾਸੇ ਦੀ ਥਾਂ ਗ਼ਮ ਦੇ ਪਰਛਾਵੇਂ ਅਤੇ ਅੱਖਾਂ ਵਿੱਚ ਹੰਝੂ ਸਨ।
ਕੋਲਕਾਤਾ ਨਾਈਟਰਾਈਡਰਜ਼ 17ਵੇਂ ਆਈਪੀਐੱਲ ਦੀ ਚੈਂਪੀਅਨ ਬਣ ਗਈ ਹੈ।
ਤਸਵੀਰ ਸਰੋਤ, Getty Images
ਐਤਵਾਰ ਰਾਤ ਨੂੰ ਚੇਨਈ ਵਿੱਚ ਖੇਡੇ ਗਏ ਫਾਈਨਲ ਵਿੱਚ ਕੋਲਕਾਤਾ ਨਾਈਟਰਾਈਡਰਜ਼ ਨੇ ਸਨਰਾਈਜ਼ਰਜ਼ ਹੈਦਰਾਬਾਦ ਦੇ 114 ਦੌੜਾਂ ਦੇ ਮਾਮੂਲੀ ਜਿਹੇ ਟੀਚੇ ਦਾ ਆਸਾਨੀ ਨਾਲ ਪਿੱਛਾ ਕਰ ਲਿਆ।
ਕੋਲਕਾਤਾ ਨੇ 57 ਗੇਂਦਾਂ ਦੇ ਰਹਿੰਦਿਆਂ 8 ਵਿਕਟਾਂ ਨਾਲ ਇਹ ਮੈਚ ਅਤੇ ਕੱਪ ਜਿੱਤ ਲਿਆ।
ਆਈਪੀਐੱਲ 2024 ਵਿੱਚ ਕੋਲਕਾਤਾ ਨਾਈਟਰਾਈਰਜ਼ ਦੀ ਟੀਮ ਸਨਰਾਈਜ਼ਰਸ ਹੈਦਰਾਬਾਦ ਨੂੰ ਦੋ ਵਾਰੀ ਹਰਾ ਚੁੱਕੀ ਸੀ। ਤੀਜੇ ਅਤੇ ਫ਼ੈਸਲਾਕੁੰਨ ਮੈਚ ਵਿੱਚ ਵੀ ਇਹੀ ਨਤੀਜਾ ਰਿਹਾ। ਟੀਮ ਨੇ ਤੀਜੀ ਵਾਰੀ ਖ਼ਿਤਾਬ ਜਿੱਤ ਲਿਆ।
ਗੌਤਮ ਗੰਭੀਰ ਦੀ ਭੁਮਿਕਾ
ਤਸਵੀਰ ਸਰੋਤ, Getty Images
ਕੋਲਕਾਤਾ ਨਾਈਟਰਾਈਡਰਜ਼ ਨੇ ਗੌਤਮ ਗੰਭੀਰ ਦੀ ਕਪਤਾਨੀ ਵਿੱਚ 2012 ਅਤੇ 2014 ਵਿੱਚ ਇਸ ਕੱਪ ਉੱਤੇ ਕਬਜ਼ਾ ਕੀਤਾ ਸੀ।
ਇਸ ਵਾਰੀ ਗੰਭੀਰ ਟੀਮ ਦੇ ਮੈਂਟਰ ਸਨ। ਗੌਤਮ ਗੰਭੀਰ ਇੱਕ ਹੀ ਟੀਮ ਨੂੰ ਕਪਤਾਨ ਅਤੇ ਮੈਂਟਰ ਵਜੋਂ ਚੈਂਪੀਅਨ ਬਣਾਉਣ ਵਾਲੇ ਸ਼ਖ਼ਸ ਹਨ।
ਉੱਥੇ ਹੀ ਸਨਰਾਈਜ਼ਰਸ ਹੈਦਰਾਬਾਦ 2016 ਵਿੱਚ ਚੈਂਪੀਅਨ ਬਣੀ ਸੀ। ਇਹ ਕਹਿਣਾ ਕੋਈ ਅਤਕਥਨੀ ਨਹੀਂ ਹੋਵੇਗਾ ਕਿ ਇਨ੍ਹਾਂ ਦੋਵਾਂ ਟੀਮਾਂ ਵਿਚਾਲੇ ਸਭ ਤੋਂ ਵੱਡਾ ਫ਼ਰਕ ਗੌਤਮ ਗੰਭੀਰ ਸਨ।
ਦੋਵਾਂ ਟੀਮਾਂ ਦੇ ਟਾਪ ਆਰਡਰ ਨੇ ਪੂਰੇ ਟੂਰਨਾਮੈਂਟ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਜਿੱਤ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ। ਦੋਵਾਂ ਟੀਮਾਂ ਦਾ ਪਾਵਰ ਪਲੇ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਰਿਹਾ ਸੀ॥
ਟ੍ਰੈਵਿਸ ਹੈੱਡ ਅਤੇ ਅਭਿਸ਼ੇਕ ਸ਼ਰਮਾ ਨੇ ਹੈਦਰਾਬਾਦ ਨੂੰ ਮਜ਼ਬੂਤ ਸ਼ੁਰੂਆਤ ਦਵਾਈ ਉੱਥੇ ਹੀ ਕੋਲਕਾਤਾ ਦੇ ਲਈ ਸੁਨੀਲ ਨਰਾਇਣ ਅਤੇ ਫ਼ਿਲ ਸਾਲਟ ਨੇ ਇਹ ਕੰਮ ਕੀਤਾ।
ਆਈਪੀਐੱਲ ਦੇ ਇਤਿਹਾਸ ਦੇ ਦਸ ਸਭ ਤੋਂ ਵੱਡੇ ਸਕੋਰ ਵਿੱਚ ਪੰਜ ਇਨ੍ਹਾਂ ਦੋ ਟੀਮਾਂ ਨੇ ਇਸੇ ਸੀਜ਼ਨ ਵਿੱਚ ਬਣਾਏ।
ਕੋਲਕਾਤਾ ਨਾਈਟਰਾਈਡਰਜ਼ ਦੇ ਖੇਡ ਵਿੱਚ ਨਿਰੰਤਰਤਾ ਰਹੀ ਜਦਕਿ ਹੈਦਰਾਬਾਦ ਦੀ ਟੀਮ ਨੇ ਨਿਡਰ ਕ੍ਰਿਕਟ ਖੇਡਿਆ।
ਪਰ ਫਾਈਨਲ ਵਿੱਚ ਹੈਦਰਾਬਾਦ ਦੇ ਬੱਲੇਬਾਜ਼ ਉਹ ਕਰਿਸ਼ਮਾਈ ਅਤੇ ਹਮਲਾਵਰ ਪ੍ਰਦਰਸ਼ਨ ਨਹੀਂ ਦੁਹਰਾ ਸਕੇ। ਪਾਵਰ ਪਲੇ ਦੀਆਂ ਚੈਂਪੀਅਨ ਟੀਮਾਂ ਦੀ ਪਹਿਲੇ 6 ਓਵਰਾਂ ਵਿੱਚ ਹੀ ਹਾਰ ਅਤੇ ਜਿੱਤ ਤੈਅ ਹੋ ਗਈ ਸੀ।
ਕਮਿੰਸ ਨੇ ਜਿੱਤਿਆ ਸੀ ਟਾਸ
ਤਸਵੀਰ ਸਰੋਤ, Getty Images
ਪੈਟ ਕਮਿੰਸ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫ਼ੈਸਲਾ ਕੀਤਾ। ਇਸ ਲਈ ਵੀ ਕਿਉਂਕਿ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਸਨਰਾਇਜ਼ਰਸ ਹੈਦਰਾਬਾਦ ਦੀ ਜਿੱਤ ਦਾ ਰਿਕਾਰਡ ਇਸ ਸੀਜ਼ਨ ਬਿਹਤਰ ਰਿਹਾ ਹੈ।
ਸ਼੍ਰੇਅਸ ਅਈਅਰ ਨੂੰ ਟਾਸ ਹਾਰਨ ਦਾ ਕੋਈ ਮਲਾਲ ਨਹੀਂ ਸੀ ਕਿਉਂਕਿ ਉਨ੍ਹਾਂ ਦੀ ਟੀਮ ਪਹਿਲਾਂ ਗੇਂਦਬਾਜ਼ੀ ਹੀ ਕਰਨਾ ਚਾਹੁੰਦੀ ਸੀ।
ਟੀਚੇ ਦਾ ਪਿੱਛਾ ਕਰਦੇ ਹੋਏ ਕੋਲਕਾਤਾ ਨਾਈਟਰਾਈਡਰਜ਼ ਟੀਮ ਇਸ ਸੀਜ਼ਨ ਵਿੱਚ ਅਜਿੱਤ ਰਹੀ। ਹਾਰ ਤੋਂ ਬਾਅਦ ਪੈਟ ਕਮਿੰਸ ਦੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦੇ ਫ਼ੈਸਲੇ ਨੂੰ ਵੀ ਵਿਰੋਧੀ ਨਿਸ਼ਾਨਾ ਬਣਾ ਰਹੇ ਹਨ।
ਸ਼ਰੇਅਸ ਅਈਅਰ ਨੇ ਸ਼ਾਇਦ ਵਿਕਟ ਨੂੰ ਬਿਹਤਰ ਸਮਝਿਆ ਸੀ। ਮਿਚੇਲ ਸਟਾਰਕ ਨੇ ਪਹਿਲੇ ਹੀ ਓਵਰ ਵਿੱਚ ਅਭਿਸ਼ੇਕ ਸ਼ਰਮਾ ਨੂੰ ਕਲੀਨ ਬੋਲਡ ਕਰ ਦਿੱਤਾ।
ਗੇਂਦ ਮਿਡਲ ਸਟੰਪ ਉੱਤੇ ਸੀ ਪਰ ਆਖ਼ਰੀ ਪਲ ਵਿੱਚ ਮੁੜੀ ਅਤੇ ਆਫ਼ ਸਟੰਪ ਨੂੰ ਉਡਾ ਦਿੱਤਾ। ਇਸ ਗੇਂਦ ਨੂੰ ਬਾਲ ਆਫ਼ ਦੀ ਟੂਰਨਾਮੈਂਟ ਕਿਹਾ ਜਾ ਸਕਦਾ ਹੈ।
ਇਸ ਲੇਟ ਸਵਿੰਗ ਗੇਂਦ ਨੂੰ ਖੇਡਣਾ ਲਗਭਗ ਨਾਮੁਮਕਿਨ ਸੀ । ਅਭਿਸ਼ੇਕ ਸਨਰਾਈਜ਼ਰਸ ਹੈਦਰਾਬਾਦ ਦੇ ਦੂਜੇ ਸਭ ਤੋਂ ਵੱਧ ਸਫ਼ਲ ਗੇਂਦਬਾਜ਼ ਸਨ।
ਉਨ੍ਹਾਂ ਨੇ 16 ਮੈਚਾਂ ਵਿੱਚ 204.21 ਦੇ ਸਟ੍ਰਾਈਕ ਰੇਟ ਨਾਲ 484 ਦੌੜਾਂ ਬਣਾਈਆਂ ਸਨ। ਟੂਰਨਾਮੈਂਟ ਵਿੱਚ ਉਨ੍ਹਾਂ ਦਾ ਸਟ੍ਰਾਈਕ ਰੇਟ ਸਭ ਤੋਂ ਚੰਗਾ ਰਿਹਾ।
6 ਦੋੜਾਂ ’ਤੇ ਡਿੱਗੀਆਂ ਦੋ ਵਿਕਟਾਂ
ਤਸਵੀਰ ਸਰੋਤ, Getty Images
ਅਗਲੇ ਓਵਰ ਵਿੱਚ ਮੱਧਮ ਤੇਜ਼ ਗੇਂਦਬਾਜ਼ ਵੈਭਵ ਅਰੋੜਾ ਨੇ ਟ੍ਰੈਵਿਸ ਹੈੱਡ ਨੂੰ ਆਊਟ ਕਰਕੇ ਹੈਦਰਾਬਾਦ ਨੂੰ ਵੱਡਾ ਝਟਕਾ ਦਿੱਤਾ।
ਹੈਦਰਾਬਾਦ ਲਈ ਹੈੱਡਵੱਲੋਂ ਸਭ ਤੋਂ ਵੱਧ ਦੌੜਾਂ ਬਣਾਉਣ ਦੇ ਬਾਵਜੂਦ ਇਸ ਵਾਰ ਉਨ੍ਹਾਂ ਦਾ ਖਾਤਾ ਤੱਕ ਨਹੀਂ ਖੁੱਲ੍ਹਿਆ।
ਉਨ੍ਹਾਂ ਨੇ 16 ਮੈਚਾਂ ਵਿੱਚ 192.20 ਦੀ ਸਟ੍ਰਾਈਕ ਰੇਟ ਨਾਲ 567 ਦੌੜਾਂ ਬਣਾਈਆਂ ਜਿਸ ਵਿੱਚ ਇੱਕ ਸੈਂਕੜਾ ਅਤੇ ਚਾਰ ਅਰਧ ਸੈਂਕੜੇ ਸ਼ਾਮਲ ਹਨ। ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਿਆਂ 'ਚ ਹੈੱਡ, ਵਿਰਾਟ ਕੋਹਲੀ, ਰੁਤੁਰਾਜ ਗਾਇਕਵਾੜ ਅਤੇ ਰਿਆਨ ਪਰਾਗ ਤੋਂ ਬਾਅਦ ਚੌਥੇ ਥਾਂ 'ਤੇ ਸਨ।
ਜੇਕਰ ਕੋਈ ਟੀਮ ਛੇ ਦੌੜਾਂ 'ਤੇ ਆਪਣੇ ਦੋ ਸਭ ਤੋਂ ਸਫਲ ਬੱਲੇਬਾਜ਼ ਗੁਆ ਦਿੰਦੀ ਹੈ ਤਾਂ ਸਥਿਤੀ ਨੂੰ ਸਮਝਿਆ ਜਾ ਸਕਦਾ ਹੈ।
ਅਜਿਹਾ ਲੱਗ ਰਿਹਾ ਸੀ ਜਿਵੇਂ ਮਿਚੇਲ ਦੀ ਗੇਂਦ ਅੱਗ ਉਗਲ ਰਹੀ ਹੋਵੇ। ਸਟਾਰਕ ਨੇ ਪੰਜਵੇਂ ਓਵਰ ਵਿੱਚ ਰਾਹੁਲ ਤ੍ਰਿਪਾਠੀ ਦਾ ਵਿਕਟ ਲੈ ਕੇ ਹੈਦਰਾਬਾਦ ਦੀ ਮਜ਼ਬੂਤ ਬੱਲੇਬਾਜ਼ੀ ਨੂੰ ਤਬਾਹ ਕਰ ਦਿੱਤਾ।
ਪਾਵਰ ਪਲੇਅ ਵਿੱਚ 40 ਦੌੜਾਂ ਬਣਾਈਆਂ ਅਤੇ ਤਿੰਨ ਵਿਕਟਾਂ ਡਿੱਗੀਆਂ। ਇਸ ਵਿੱਚ ਮਿਸ਼ੇਲ ਸਟਾਰਕ ਨੇ ਦੋ ਵਿਕਟਾਂ ਲਈਆਂ।
ਏਡਨ ਮਾਰਕਰਮ ਅਤੇ ਨਿਤੀਸ਼ ਕੁਮਾਰ ਰੈੱਡੀ ਨੇ 26 ਦੌੜਾਂ ਦੀ ਸਾਂਝੇਦਾਰੀ ਕਰਕੇ ਸਕੋਰ 47 ਤੱਕ ਪਹੁੰਚਾਇਆ।
ਹਰਸ਼ਿਤ ਰਾਣਾ ਨੇ ਨਿਤੀਸ਼ ਨੂੰ ਅਤੇ ਆਂਦਰੇ ਰਸਲ ਨੇ ਮਾਰਕਰਮ ਨੂੰ ਆਊਟ ਕਰਕੇ ਹੈਦਰਾਬਾਦ ਨੂੰ ਪੂਰੀ ਤਰ੍ਹਾਂ ਬੈਕਫੁੱਟ 'ਤੇ ਧੱਕ ਦਿੱਤਾ।
62 ਦੌੜਾਂ ਬਣਾਉਣ ਤੱਕ ਅੱਧੀ ਟੀਮ ਪੈਵੇਲੀਅਨ ਜਾ ਚੁੱਕੀ ਸੀ।
ਕੋਲਕਾਤਾ ਨਾਈਟ ਰਾਈਡਰਜ਼ ਦੇ ਗੇਂਦਬਾਜ਼ਾਂ ਲਈ ਚੇਨਈ ਦੇ ਐਮਏ ਚਿਦੰਬਰਮ ਸਟੇਡੀਅਮ ਦੀ ਪਿੱਚ 'ਤੇ ਬੱਲੇਬਾਜ਼ੀ ਕਰਨਾ ਮੁਸ਼ਕਲ ਸਾਬਤ ਹੋ ਰਿਹਾ ਸੀ। ਵਿਕਟਾਂ ਲਗਾਤਾਰ ਡਿੱਗ ਰਹੀਆਂ ਸਨ।
ਵਰੁਣ ਚੱਕਰਵਰਤੀ ਨੇ 12ਵੇਂ ਓਵਰ ਵਿੱਚ ਸ਼ਾਹਬਾਜ਼ ਅਹਿਮਦ ਨੂੰ ਆਊਟ ਕੀਤਾ ਅਤੇ ਰਸਲ ਨੇ 23ਵੇਂ ਓਵਰ ਵਿੱਚ ਅਬਦੁਲ ਸਮਦ ਨੂੰ ਆਊਟ ਕੀਤਾ।
ਹਰਸ਼ਿਤ ਰਾਣਾ ਨੇ ਹੇਨਰਿਕ ਕਲਾਸੇਨ ਦੀ ਅਹਿਮ ਵਿਕਟ ਹਾਸਲ ਕੀਤੀ। ਕਲਾਸ 16 ਦੌੜਾਂ ਹੀ ਬਣਾ ਸਕੇ।
ਫਾਈਨਲ ਵਿੱਚ ਸਭ ਤੋਂ ਘੱਟ ਦੌੜਾਂ
ਤਸਵੀਰ ਸਰੋਤ, Getty Images
ਸਨਰਾਈਜ਼ਰਜ਼ ਹੈਦਰਾਬਾਦ ਦੀ ਟੀਮ 9 ਗੇਂਦਾਂ ਬਾਕੀ ਰਹਿੰਦਿਆਂ ਸਿਰਫ਼ 113 ਦੌੜਾਂ 'ਤੇ ਆਲ ਆਊਟ ਹੋ ਗਈ, ਜਦਕਿ ਹੈਦਰਾਬਾਦ ਦੇ ਬੱਲੇਬਾਜ਼ਾਂ ਨੇ ਪੂਰੇ ਟੂਰਨਾਮੈਂਟ 'ਚ ਗੇਂਦਬਾਜ਼ਾਂ ਦੀ ਧੱਜੀਆਂ ਉਡਾ ਦਿੱਤੀਆਂ।
ਇਹ ਆਈਪੀਐਲ ਫਾਈਨਲ ਦੇ ਇਤਿਹਾਸ ਵਿੱਚ ਸਭ ਤੋਂ ਘੱਟ ਸਕੋਰ ਹੈ।
ਕੋਲਕਾਤਾ ਦੇ ਸਾਰੇ ਛੇ ਗੇਂਦਬਾਜ਼ਾਂ ਨੇ ਵਿਕਟਾਂ ਹਾਸਲ ਕੀਤੀਆਂ। ਆਂਦਰੇ ਰਸਲ ਨੇ 19 ਵਿਕਟਾਂ ਲਈ 3 ਵਿਕਟਾਂ ਲਈਆਂ ਜਦਕਿ ਸਟਾਰਕ ਅਤੇ ਹਰਸ਼ਿਤ ਰਾਣਾ ਨੇ 2/4 ਅਤੇ 2/14 ਵਿਕਟਾਂ ਲਈਆਂ।
ਵਰੁਣ ਚੱਕਰਵਰਤੀ, ਸੁਨੀਲ ਨਾਰਾਇਣ ਅਤੇ ਵੈਭਵ ਅਰੋੜਾ ਨੂੰ ਇਕ-ਇਕ ਵਿਕਟ ਮਿਲੀ।
ਕੋਲਕਾਤਾ ਲਈ ਇਸ ਸੀਜ਼ਨ 'ਚ ਵਰੁਣ ਚੱਕਰਵਰਤੀ ਨੇ ਸਭ ਤੋਂ ਵੱਧ 21 ਵਿਕਟਾਂ ਲਈਆਂ ਜਦਕਿ ਰਸਲ ਨੇ 19 ਵਿਕਟਾਂ ਲਈਆਂ। ਰਸੇਲ ਦਾ ਆਈਪੀਐੱਲ ਵਿੱਚ ਹੁਣ ਤੱਕ ਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ ਰਿਹਾ ਹੈ।
ਪੈਟ ਕਮਿੰਸ ਨੇ ਆਪਣੇ ਪਹਿਲੇ ਹੀ ਓਵਰ ਵਿੱਚ ਸੁਨੀਲ ਨਾਰਾਇਣ ਨੂੰ ਆਊਟ ਕੀਤਾ। ਪਰ ਰਹਿਮਾਨੁੱਲਾ ਗੁਰਬਾਜ਼ ਅਤੇ ਵੈਂਕਟੇਸ਼ ਅਈਅਰ ਨੇ ਹੈਦਰਾਬਾਦ ਦੇ ਗੇਂਦਬਾਜ਼ਾਂ ਨੂੰ ਹਾਵੀ ਨਹੀਂ ਹੋਣ ਦਿੱਤਾ ਅਤੇ ਪਾਵਰ ਪਲੇਅ ਵਿੱਚ 72 ਦੌੜਾਂ ਬਣਾਈਆਂ।
ਗੁਰਬਾਜ਼ ਨੌਵੇਂ ਓਵਰ ਵਿੱਚ ਸ਼ਾਹਬਾਜ਼ ਅਹਿਮਦ ਦੀ ਗੇਂਦ ’ਤੇ 39 ਦੌੜਾਂ ਬਣਾ ਕੇ ਆਊਟ ਹੋ ਗਏ।
ਵੈਂਕਟੇਸ਼ ਦਾ ਚੌਥਾ ਅਰਧਸੈਂਕੜਾ
ਤਸਵੀਰ ਸਰੋਤ, Getty Images
ਇਸ ਦੌਰਾਨ ਵੈਂਕਟੇਸ਼ ਅਈਅਰ ਨੇ ਆਪਣਾ ਅਰਧ ਸੈਂਕੜਾ ਪੂਰਾ ਕੀਤਾ। ਉਸ ਨੇ 26 ਗੇਂਦਾਂ 'ਤੇ ਨਾਬਾਦ 52 ਦੌੜਾਂ ਬਣਾਈਆਂ।
ਵੈਂਕਟੇਸ਼ ਨੇ ਟੂਰਨਾਮੈਂਟ ਵਿੱਚ 370 ਦੌੜਾਂ ਬਣਾਈਆਂ। ਸੁਨੀਲ ਨਾਰਾਇਣ ਅਤੇ ਫਿਲ ਸਾਲਟ ਤੋਂ ਬਾਅਦ ਉਨ੍ਹਾਂ ਨੇ ਸਭ ਤੋਂ ਵੱਧ ਦੌੜਾਂ ਬਣਾਈਆਂ।
ਕੋਲਕਾਤਾ ਨਾਈਟ ਰਾਈਡਰਜ਼ ਨੇ ਗਿਆਰਵੇਂ ਓਵਰ ਦੀ ਤੀਜੀ ਗੇਂਦ 'ਤੇ ਟੀਚਾ ਹਾਸਲ ਕਰ ਲਿਆ। ਫਾਈਨਲ ਮੈਚ ਬਿਲਕੁਲ ਇੱਕਪਾਸੜ ਸਾਬਤ ਹੋਇਆ।
ਕੋਲਕਾਤਾ ਨਾਈਟ ਰਾਈਡਰਜ਼ ਦੇ ਕੈਂਪ ਵਿੱਚ ਜਸ਼ਨ ਅਤੇ ਸਨਰਾਈਜ਼ਰਜ਼ ਹੈਦਰਾਬਾਦ ਦੇ ਡਰੈਸਿੰਗ ਰੂਮ ਵਿੱਚ ਨਿਰਾਸ਼ਾ ਦੇਖੀ ਜਾ ਸਕਦੀ ਸੀ।
ਕੋਲਕਾਤਾ ਨਾਈਟ ਰਾਈਡਰਜ਼ ਦੇ ਕਪਤਾਨ ਸ਼੍ਰੇਅਸ ਅਈਅਰ ਨੇ ਵੀ ਪੂਰੇ ਟੂਰਨਾਮੈਂਟ ਦੌਰਾਨ ਜ਼ਬਰਦਸਤ ਦ੍ਰਿੜਤਾ ਅਤੇ ਮਜ਼ਬੂਤ ਮਨੋਬਲ ਦਿਖਾਇਆ।
ਵਿਸ਼ਵ ਕੱਪ ਤੋਂ ਬਾਅਦ ਉਨ੍ਹਾਂ ਨੂੰ ਕਈ ਮੁਸ਼ਕਲਾਂ ਆ ਰਹੀਆਂ ਸਨ ਉਹ ਪਿੱਠ ਦੀਆਂ ਸਮੱਸਿਆਵਾਂ ਨਾਲ ਵੀ ਜੂਝਦੇ ਰਹੇ ਸਨ।
ਉਨ੍ਹਾਂ ਨਾਲ ਬੀਸੀਸੀਆਈ ਨੇ ਸਮਝੌਤਾ ਖਤਮ ਕਰ ਦਿੱਤਾ ਅਤੇ ਉਨ੍ਹਾਂ ਨੂੰ ਟੈਸਟ ਅਤੇ ਟੀ-20 ਟੀਮ ਤੋਂ ਬਾਹਰ ਕਰ ਦਿੱਤਾ ਗਿਆ ਸੀ।
ਇਸ ਆਈਪੀਐੱਲ 'ਚ ਵੀ ਉਨ੍ਹਾਂ ਦਾ ਪ੍ਰਦਰਸ਼ਨ ਜ਼ਿਆਦਾ ਦਮਦਾਰ ਨਹੀਂ ਰਿਹਾ। 15 ਮੈਚਾਂ 'ਚ 158.79 ਦੀ ਸਟ੍ਰਾਈਕ ਰੇਟ ਨਾਲ 351 ਦੌੜਾਂ ਬਣਾ ਸਕੇ।
ਪਰ ਇੱਕ ਵਿਲੱਖਣ ਰਿਕਾਰਡ ਯਕੀਨੀ ਤੌਰ 'ਤੇ ਬਣਾਇਆ ਗਿਆ। ਦੋ ਟੀਮਾਂ ਨੂੰ ਫਾਈਨਲ ਤੱਕ ਪਹੁੰਚਾਉਣ ਵਾਲੇ ਪਹਿਲੇ ਕਪਤਾਨ ਬਣੇ।
ਸਾਲ 2020 ਵਿੱਚ ਉਨ੍ਹਾਂ ਦੀ ਕਪਤਾਨੀ ਵਿੱਚ, ਦਿੱਲੀ ਕੈਪੀਟਲਜ਼ ਫਾਈਨਲ ਵਿੱਚ ਪਹੁੰਚੀ ਸੀ।
ਕਮਿੰਸ ਦਾ ਕਮਾਲ
ਤਸਵੀਰ ਸਰੋਤ, Getty Images
ਆਈਪੀਐਲ-2024 ਤੋਂ ਪਹਿਲਾਂ, ਪੈਟ ਕਮਿੰਸ ਨੇ ਕਦੇ ਵੀ ਟੀ-20 ਵਿੱਚ ਕਪਤਾਨੀ ਨਹੀਂ ਕੀਤੀ ਸੀ। ਪਰ ਉਨ੍ਹਾਂ ਨੇ ਆਪਣੀ ਕਪਤਾਨੀ ਹੇਠ ਸਨਰਾਈਜ਼ਰਜ਼ ਹੈਦਰਾਬਾਦ ਨੂੰ ਫਾਈਨਲ ਤੱਕ ਪਹੁੰਚਾ ਕੇ ਆਪਣੀ ਕਾਬਿਲੀਅਤ ਦਾ ਮੁਜ਼ਾਹਰਾਨ ਕੀਤਾ।
ਆਸਟ੍ਰੇਲੀਆ ਦੇ ਕਪਤਾਨ ਨੇ ਦਿਖਾਇਆ ਕਿ ਕਿਵੇਂ ਇੱਕ ਗੇਂਦਬਾਜ਼ ਵੀ ਚੈਂਪੀਅਨ ਕਪਤਾਨ ਬਣ ਸਕਦਾ ਹੈ।
ਪਿਛਲੇ ਇੱਕ ਸਾਲ ਵਿੱਚ ਉਨ੍ਹਾਂ ਦੀ ਕਪਤਾਨੀ ਵਿੱਚ, ਆਸਟਰੇਲੀਆ ਨੇ ਟੈਸਟ ਚੈਂਪੀਅਨਸ਼ਿਪ ਜਿੱਤੀ, ਵਨ-ਡੇ ਵਿਸ਼ਵ ਕੱਪ ਵਿੱਚ ਚੈਂਪੀਅਨ ਬਣੀ ਅਤੇ ਕਾਵਿਆ ਮਾਰਨ ਦੀ ਟੀਮ ਨੂੰ ਫਾਈਨਲ ਵਿੱਚ ਪਹੁੰਚਾਇਆ।
ਇਹੀ ਹੈਦਰਾਬਾਦ ਦੀ ਟੀਮ 2021 ਅਤੇ 2023 ਵਿਚ ਆਖਰੀ ਥਾਂ 'ਤੇ ਸੀ ਜਦਕਿ 2022 ਵਿਚ ਅੱਠਵੇਂ ਸਥਾਨ 'ਤੇ ਸੀ।
ਪੈਟ ਕਮਿੰਸ ਅਤੇ ਮਿਸ਼ੇਲ ਸਟਾਰਕ 'ਤੇ ਫ੍ਰੈਂਚਾਇਜ਼ੀ ਵੱਲੋਂ ਵੀਹ ਕਰੋੜ ਤੋਂ ਜ਼ਿਆਦਾ ਖਰਚੇ ਜਾਣ 'ਤੇ ਕਾਫੀ ਵਿਰੋਧ ਹੋਇਆ ਸੀ।
ਪਰ ਆਖਰਕਾਰ ਦੋਵਾਂ ਕੰਗਾਰੂਆਂ ਨੇ ਇਸ ਫੈਸਲੇ ਨੂੰ ਸਹੀ ਸਾਬਤ ਕੀਤਾ।
ਜਦੋਂ ਵੀ ਟੀਮ ਨੂੰ ਲੋੜ ਪਈ, ਸਟਾਰਕ ਨੇ ਨਿਰਾਸ਼ ਨਹੀਂ ਕੀਤਾ।
ਕੁਆਲੀਫਾਇਰ-1 ਵਿੱਚ 3/34 ਅਤੇ ਫਾਈਨਲ ਵਿੱਚ 2/14। ਟੂਰਨਾਮੈਂਟ ਵਿੱਚ 17 ਵਿਕਟਾਂ ਲਈਆਂ ਜਦਕਿ ਪੈਟ ਕਮਿੰਸ ਨੇ 18 ਵਿਕਟਾਂ ਲਈਆਂ। ਕਮਿੰਸ ਨੇ ਅੱਗੇ ਵਧ ਕੇ ਟੀਮ ਦੀ ਅਗਵਾਈ ਕੀਤੀ।
ਤਸਵੀਰ ਸਰੋਤ, Getty Images
ਕਿਉਂ ਹਾਰੀ ਸਨਰਾਈਜ਼ਰਜ਼
ਹੁਣ ਤੱਕ ਤੁਸੀਂ ਜਿੱਤ ਅਤੇ ਹਾਰ ਦੇ ਕਾਰਨਾਂ ਨੂੰ ਸਮਝ ਚੁੱਕੇ ਹੋਵੋਂਗੇ ਪਰ ਫਿਰ ਵੀ ਇਹ ਵਿਸ਼ਵਾਸ ਕਰਨਾ ਸੰਭਵ ਨਹੀਂ ਹੈ ਕਿ ਪੂਰੇ ਟੂਰਨਾਮੈਂਟ ਵਿੱਚ ਜ਼ੋਰਦਾਰ ਪ੍ਰਦਰਸ਼ਨ ਦਿਖਾਉਣ ਵਾਲੀ ਸਨਰਾਈਜ਼ਰਜ਼ ਟੀਮ ਇੰਨੀ ਆਸਾਨੀ ਨਾਲ ਢੇਰੀ ਹੋ ਜਾਵੇਗੀ।
ਪੈਟ ਕਮਿੰਸ ਸ਼ਾਇਦ ਪਿੱਚ ਅਤੇ ਹਾਲਾਤ ਨੂੰ ਨਹੀਂ ਪੜ੍ਹ ਸਕੇ। ਜੇਕਰ ਉਹਨਾਂ ਪਹਿਲਾਂ ਗੇਂਦਬਾਜ਼ੀ ਕੀਤੀ ਹੁੰਦੀ ਤਾਂ ਸ਼ਾਇਦ ਨਤੀਜਾ ਵੱਖਰਾ ਹੋ ਸਕਦਾ ਸੀ।
ਚੇਨਈ ਵਿੱਚ ਇੱਕ ਦਿਨ ਪਹਿਲਾਂ ਮੀਂਹ ਪਿਆ ਸੀ। ਕੋਲਕਾਤਾ ਨਾਈਟ ਰਾਈਡਰਜ਼ ਦੇ ਗੇਂਦਬਾਜ਼ਾਂ ਨੂੰ ਪਿੱਚ ਤੋਂ ਸਵਿੰਗ ਮਿਲ ਰਹੀ ਸੀ।
ਦੋਵੇਂ ਟੀਮਾਂ ਪਾਵਰ ਪਲੇਅ ਵਿੱਚ ਆਪਣੇ ਦਮਦਾਰ ਪ੍ਰਦਰਸ਼ਨ ਦੀ ਬਦੌਲਤ ਫਾਈਨਲ ਵਿੱਚ ਪਹੁੰਚੀਆਂ। ਪਹਿਲੇ 6 ਓਵਰਾਂ 'ਚ ਹੀ ਕੋਲਕਾਤਾ ਦੇ ਗੇਂਦਬਾਜ਼ਾਂ ਨੇ ਹੈਦਰਾਬਾਦ ਦੇ ਬੱਲੇਬਾਜ਼ਾਂ ਧੋ ਕੇ ਰੱਖ ਦਿੱਤਾ ਸੀ।
ਮਿਚੇਲ ਸਟਾਰਕ ਨੇ ਇਸ ਸਾਲ ਟੂਰਨਾਮੈਂਟ ਦੀ ਸਭ ਤੋਂ ਚੰਗੇ ਗੇਂਦ 'ਤੇ ਸਨਰਾਈਜ਼ਰਸ ਹੈਦਰਾਬਾਦ ਦੇ ਦੂਜੇ ਸਭ ਤੋਂ ਸਫਲ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਨੂੰ ਆਊਟ ਕੀਤਾ ਅਤੇ ਫਿਰ ਪਾਵਰ ਪਲੇਅ 'ਚ ਸਭ ਤੋਂ ਸਫਲ ਬੱਲੇਬਾਜ਼ ਟ੍ਰੈਵਿਸ ਹੈੱਡ ਨੂੰ ਆਊਟ ਕਰਕੇ ਕੋਲਕਾਤਾ ਨਾਈਟ ਰਾਈਡਰਜ਼ ਦੀ ਜਿੱਤ ਦੀ ਨੀਂਹ ਰੱਖੀ।
ਸਨਰਾਈਜ਼ਰਜ਼ ਹੈਦਰਾਬਾਦ ਦਾ ਮਿਡਲ ਆਰਡਰ ਬੁਰੀ ਤਰ੍ਹਾ ਨਾਕਾਮ ਰਿਹਾ । ਸੱਤ ਬੱਲੇਬਾਜ਼ ਦੋਹਰੇ ਅੰਕੜੇ ਤੱਕ ਵੀ ਨਾ ਪਹੁੰਚ ਸਕੇ।
ਪੈਟ ਕਮਿੰਸ ਨੇ ਸਭ ਤੋਂ ਵੱਧ 24 ਅਤੇ ਏਡਨ ਮਾਰਕਰਮ ਨੇ 16 ਦੌੜਾਂ ਬਣਾਈਆਂ।
ਸਾਰੇ ਛੇ ਗੇਂਦਬਾਜ਼ਾਂ ਨੇ ਆਪਣਾ ਕੰਮ ਕੀਤਾ ਅਤੇ ਸ਼ੁਰੂ ਤੋਂ ਅੰਤ ਤੱਕ ਦਬਾਅ ਬਣਾ ਕੇ ਰੱਖਿਆ
ਸਿਰਫ਼ 113 ਦੌੜਾਂ ਬਣਾਉਣ ਤੋਂ ਬਾਅਦ ਸਨਰਾਈਜ਼ਰਜ਼ ਦੇ ਗੇਂਦਬਾਜ਼ ਕਾਫੀ ਦਬਾਅ ਵਿੱਚ ਸਨ। ਹੈਦਰਾਬਾਦ ਦੀ ਗੇਂਦਬਾਜ਼ੀ ਕਾਫੀ ਸਧਾਰਣ ਸੀ ਅਤੇ ਉਹ ਪੂਰੇ ਮੈਚ ਦੌਰਾਨ ਕਦੇ ਵੀ ਕੋਲਕਾਤਾ ਦੇ ਬੱਲੇਬਾਜ਼ਾਂ 'ਤੇ ਦਬਾਅ ਨਹੀਂ ਬਣਾ ਸਕੇ।
ਦੋ ਵਿਕਟਾਂ ਦੇ ਡਿੱਗਣ ਤੋਂ ਬਾਅਦ ਵੀ ਵੈਂਕਟੇਸ਼ ਅਈਅਰ 'ਤੇ ਕੋਈ ਅਸਰ ਨਹੀਂ ਹੋਇਆ ਅਤੇ ਉਨ੍ਹਾਂ ਨੇ ਆਪਣੀ ਬੱਲੇਬਾਜ਼ੀ ਜਾਰੀ ਰੱਖੀ।
ਕੋਲਕਾਤਾ ਨਾਈਟ ਰਾਈਡਰਸ ਕੋਲ ਗੌਤਮ ਗੰਭੀਰ ਸੀ। ਇਸ ਵਿਅਕਤੀ ਨੇ ਇੱਕ ਸਾਲ ਵਿੱਚ ਹੀ ਟੀਮ ਨੂੰ ਬਦਲ ਦਿੱਤਾ।
ਪਰ ਇਹ ਵੀ ਸੱਚ ਹੈ ਕਿ ਸਿਰਫ਼ ਇੱਕ ਟੀਮ ਹੀ ਮੈਚ ਜਿੱਤ ਸਕਦੀ ਹੈ।
ਕੱਲ੍ਹ ਦਾ ਦਿਨ ਯਕੀਨੀ ਤੌਰ 'ਤੇ ਸਨਰਾਈਜ਼ਰਜ਼ ਹੈਦਰਾਬਾਦ ਦਾ ਦਿਨ ਨਹੀਂ ਸੀ।
