Twelve die for mass shooting for Johannesburg, police tok

At least 12 pipo don die for mass shooting for one area of Johannesburg, police for South Africa tok.

Dem say anoda nine pipo wunjure for di attack for one informal settlement for Cleveland late on Tuesday, and dem don begin look for di suspects.

"Di allegation be say one white Toyota Quantum drop more dan 10 suspects near one petrol station in Cleveland," di police tok for statement.

"Di suspects allegedly enter di informal settlement through both entrances and moved through di area, and open fire on residents and community members for multiple locations before dem run comot from di scene in di same bus," di statement add.

We dey update dis tori

South Africa get one of di highest murder rates for di world, dem get average of around 60 pipo killed per day.

Shootings for informal settlements dey highly common for di kontri and sometimes dem dey linked to gang violence and personal disputes.

Local police department say officers respond to complaint of shooting in progress around 23:10 local time on Tuesday (21:10 GMT).

Dem deploy emergency medical services to treat pipo wey injure.

Police say eight men and three women die for di scene while additional man die from injuries for hospital.

Dem carry at least nine odas go different hospitals for treatment of gunshot wounds.

Police statement tok say dem neva know di motive for di attack and na part of ongoing investigation.

Last year nine pipo die for one mass shooting for Tavern Johannesburg.

About three million pipo dey legally hold firearms for South Africa and at least same number of pipo wey no get license dey also carry weapons - according to statistics wey Gideon Joubert from South African Gunowners Association sight.