Inside Makinde Executive Order wey go regulate local vigilantes, Sunday Igboho 'Ija Ekun'

Oyo State Govnor, Seyi Makinde don executive order to regulate di activities of associations and groups wey dey perform security-related services for di state.

Di govnor don ask leaders of dis different security outfits for di state make dem register wit di state govment formally and wear uniform as a means of identity within di state.

On Wednesday, self-proclaimed activist, Sunday 'Igboho' Adeyemo officially launch im own security outfit wey e call 'Ija Ekun.'

E explain say Ija Ekun na regional outfits wit about 50,000 members, and dem don ready to attack wit gunmen, kidnappers and bandits across all south-west regions.

Earlier on Tuesday, di govnor tok say executive order don become necessary to facilitate coordination of security efforts for di state as insecurity don become "more sophisticated."

Makinde say di security na di job of di govment "alone" but dem go appreciate di effort of any group wey dey operate within "clear legal and operational framework wey go support peace, order and di rule of law.

How di 'executive order' go take effect

According to di Oyo State Commissioner for Justice, Abiodun Aikomo, di order na to make sure say pipo dey accountable and dem fit properly monitor groups wey dey provide security services for di state.

"So, we dey face battle security challenges for Nigeria. Under di 1999 Constitution di welfare of the pipo and security na di main purpose of governance."

Di attorney general tok say di executive order don make am mandatory for all groups wey dey involved for security activities and make dem get more dan five members to notify di Office of di govnor through di special adviser on security.

E tok say groups wey don already don dey exist dem need 72 hours to notify di govment for documentation and certificate for recognition and monitoring purpose.

Also, new security groups wey wan join go need documentation and dem go issue certificate to dem for recognition and monitoring purpose.

Di commissioner exaplain any group wey violate or fail to comply wit di executive dem go face legal prosecution.

Wetin be "Ija Ekun?"

Ija Ekun na Regional Security Force wey get about 50,000 members wey dey ready to combact gunmen, kidnappers, and bandits for South-West Nigeria.

Sunday Igboho wey be di founder of di security outfit tok say e neva register di security outfit wit di federal govment or state govment but e tok say dem go provide security for di pipo and chase away suspected criminal wey deyinside forest.

Igboho tok say dem don train members, dem don map out forests, and dem dey on standby, make federal and state authorities to gree make dem enta di forest to go chase out criminal from dia strongholds.

Igboho say dem no go act without authorization, while e call on South-West governors, traditional rulers, and security chiefs make dem fast-track di operation.

However, di launch of 'Ija Ekun' don make pipo dey tok about regional security outfits like Amotekun and oda non-state armed groups wey dey protect lives for south-west region.

Ova di years, vigilante militias don increase becos of di high rate of violence for di kontri. While, di president don tok about state policising to combact insecurity e neva sign am into di federal govment law while many states dey build dia own internal security outfits.