غني: امنیتي بنسټونه دې د رسنیو ساتنې لپاره ټول امکانات وکاروي
د عکس سرچینه،
د افغانستان ولسمشر محمد اشرف غني امنیتي بنسټونو ته ویلي چې ددې هېواد د رسنیو ساتنې لپاره له خپلو ټولو امکاناتو کار واخلي.
ښاغلي غني نن د موبي رسنیز ګروپ له کارکوونکو سره وکتل. تېره چهارشنبه ددې رسنیز ګروپ د کارکوونکو پر بس موټر ځانمرګي برید کې ۷ کارکوونکي ووژل شول او ۲۵ نور ټپیان شول. ددې برید مسوولیت طالبانو پرغاړه واخست.
د افغانستان له ولسمشرۍ ماڼۍ په خپره شوې خبرپاڼه کې ویل شوي، رسنۍ خپلواکې دي او حکومت له بیان ازادۍ د رسنیو کارکوونکو د ملاتړ لپاره، حکومت مکلف دی د هغوی امنیت وساتي.
ښاغلي غني ویلي: "د ترهګرو هدف دا دی چې د بیان ازادي او جوړه شوې پرانستې فضا زیانمنه کړي. موږ ټول په یوه کښتۍ کې سپاره یو، که یوه برخه یې زیان وویني، موږ ټول زیانمنوي."
د عکس سرچینه، Reuters
ولسمشر غني ژمنه کړې چې حکومت به تر خپلې وسې د تېرې اونۍ ځانمرګي برید قربانیانو له کورنیو سره مرسته وکړي.
دا په داسې حال کې ده چې تېره ورځ د افغانستان د راډیو ټلویزیونونو اتحادیې له دولته وغوښتل د رسنیو د ساتنې په موخه، د پولیسو یا ملي امنیت سرتېرو یوه ځانګړې امنیتی قطعه جوړه کړي ترڅو په اصولي ډول د رسنیو د کارکوونکو امنیت وساتل شي.
په دغه اتحادیه کې تر ۱۰۰ ډېرې راډیویي او ټلویزیوني شبکې غړیتوب لري.
