"Coltas ann" gu bheil sgìre-smachdachaidh Bhàideanach agus Srath Spè ag obair

Tha còrr is bliadhna ann bho chaidh sgìre-smachdachaidh airson taighean air màl ghoirid a thoirt a-steach ann am Bàideanach agus Srath Spè.

Fon sgeama feumaidh daoine aig a bheil taighean dhen t-seòrsa cead-dealbhachaidh iarraidh.

'S ann mar oidhirp air fuasgladh dha dùbhlan maireannach a thaobh cion taigheadais san sgìre a chaidh an ceum a thoirt a-steach.

Tha seo air a bhith na dhùbhlan an dà chuid do dhaoine a tha a' fuireach is ag obair san sgìre agus do ghnothachasan.

Tha mu 20 duine ag obair aig Quarch Technlology Ltd anns an Aghaidh Mhòir.

Tha stiùiriche na companaidh, Mike Dearman, ag ràdh gu bheil cion thaighean na dhuilgheadas dhaibh.

"Mar chompanaidh teicneòlais, tha sinn a' toirt a-steach tòrr luchd-ceumnachaidh," thuirt e.

"Leis nach eil mòran luchd-ceumnachaidh an seo bidh sinn gan toirt an seo bho àitichean eile san Rìoghachd Aonaichte.

"Tha a bhith a' lorg thaighean air màl no dachaighean do theaghlaichean gu math dùbhlanach.

"Tha e air buaidh mhòr a thoirt oirnn."

Ach tha cuid air atharrachadh fhaicinn bho thàinig an sgìre-smachdachaidh a-steach ann an 2024.

Tha a' chompanaidh Caledonia Estate Agency anns an Aghaidh Mhòir ag ràdh gu bheil iadsan a' faicinn buaidh anns a' mhargaidh.

Thuirt Darren McConnell bhon chompanaidh gun d' fhuair iad gun robh mu 65% dhe na taighean a bha iad a' reic ron sgìre-smachdachaidh a' dol gu daoine a bha airson an cleachdadh mar phrìomh dhachaigh.

Bha an còrr a' dol gu daoine a bha ag iarraidh dàrna dachaigh no àite a leigeadh iad a-mach air màl ghoirid.

Thuirt e, às dèidh dhan sgìre-smachdachaidh a bhith air a stèidheachadh, gu bheil na tha a' coimhead airson prìomh dhachaigh air a dhol suas gu mu 85% de luchd-ceannachd.

Thuirt Comhairle na Gàidhealtachd nach tàinig àrdachadh air taighean air màl ghoirid anns an sgìre a tha na b' àirde na na h-àireamahan sa chumantas air Ghàidhealtachd bho chaidh an sgìre-smachdachaidh a stèidheachadh.

A thuilleadh air a seo, thuirt iad gu bheil an àireamh thaighean dhen t-seòrsa aig an aon ìre, no tha nas lugha dhiubh ann, bho thòisich an sgìre-smachdachaidh.

Dh'innis iad gun deach 35 cead-dealbhachaidh a dhiùltadh le dhà dhiubh sin a' faighinn cead an dèidh ath-thagraidh.

Thuirt iad gum faodadh gu bheil buaidh aig an sgire-smachdachaidh air a' mhargaidh thaigheadais, ged nach urrainn dhaibh a ràdh le cinnt gur e sin a bu choireach

A rèir Fear-gairm na Comhairle, Bill Loban, tha coltas ann gu bheil an sgìre smachdachaidh ag obair agus gu bheil barrachd thaighean rim faotainn san sgìre.

Thuirt e ge-tà gu bheil e duilich a ràdh dè dìreach a' bhuaidh a th' air a bhith ann an coimeas ri ceumanan eile an leithid ceadan agus àrdachadh sa chìs-chomhairle.

Tha a' bhuidheann a tha a' riochdachadh na roinne fèin-fhrithealaidh ann an Alba ag ràdh gu bheil mì-chinnt mun t-suidheachadh ag innse a sgeòil fhèin.

Thuirt Fiona Chaimbeul, Àrd-oifgear Comann Fèin-fhrithealaidh na h-Alba, nach eil "fianais sam bith ann" g' eil sgìrean-smachdachaidh a' cuideachadh.

Thuirt i nach e "peilear airgid" a th' annta agus i a' toirt rabhadh seachad gu bheil iad a' toirt "droch bhuaidh air eaconamaidhean ionadail."

Tha grunn sgìrean air a' Ghàidhealtachd a' beachdachadh air an aon seòrsa sgeama a chaidh a thoirt a-steach ann am Bàideanach agus Srath Spè a stèidheachadh.

Nam measg tha an t-Eilean Sgitheanach agus Ratharsair far an do chuir comataidh comhairle taic aig toiseach na mìos ri plana a tha ag amas air sgìre-smachdachaidh a thoirt air adhart.