Cion eòlaichean-aillse aig NHS na Gàidhealtachd

Dh'aidich NHS na Gàidhealtachd nach eil àrd-dhotairean gu leòr aca ann an dreuchdan comhairleachaidh agus gum faodadh sin maill a chur air a' chùram a tha euslaintich a' faighinn.

Thuirt an NHS gu bheil iad mothachail gum bi dragh air na h-euslaintich air an toir seo buaidh ach gun lean cùram àbhaisteach don mhòr-chuid.

"Tha duilgheadas aig seirbheis eòlas-aillse NHS na Gàidhealtachd ann a bhith a' fastadh luchd-obrach comhairleachaidh," thuirt labhraiche.

"Tha sin a' fàgail na h-uimhir de chunnart do sheasmhachd na seirbheis agus maill 's dòcha air cùram do chuid de dh'euslaintich aillse.

"Tha sinn ag obair còmhla ri bùird eile airson an taic a tha na h-euslaintich againn a' feumachdainn fhaighinn ach am faigh iad an cùram sin cho luath 's a ghabhas."

Thuirt iad gu bheil iomairtean nàiseanta agus eadar-nàiseanta aca airson luchd-obrach fhastadh.

A rèir bòrd na slàinte tha trioblaid nàiseanta ann le gainnead dhotairean aillse sònraichte agus tha bùird-shlàinte tric a' cur taic ri chèile.

'S iad speisealtaich a th' ann an eòlaichean-aillse (oncologists) a bhios ag obair le seòrsaichean eadar-dhealaichte de dh'aillse, seach leis a h-uile seòrsa den tinneas.

Mar sin dheth feumaidh bùird-shlàinte sgioba le eòlas farsainn a bhith aca airson cùram ceart a chur air dòigh do dh'euslaintich aillse.