Fhuaireadh corp eile an iomairtean 'son luchd-coiseachd a lorg

Dh'innis Poilis Alba gun deach dàrna corp a lorg ann an iomairtean a bh' aca is dithis luchd-coiseachd air a bhith a dhìth ann an diofar cheàrnaidhean den Ghàidhealtachd.

Dhearbh iad gun d' fhuaireadh corp ann an sgìre Ghleann Comhann mu 6:50f Didòmhnaich.

Thuirt iad nach deach aithneachadh oifigeil a dhèanamh fhathast ach gun deach fios a chur gu teaglach Timothy Rosser.

Bha Mgr Rosser, 60, às na Stàitean Aonaichte, air a bhith a dhìth san sgìre.

Bha e air taigh-òsta ann an Dùn Èideann fhàgail Dimàirt 'son siubhal chun na Gàidhealtachd is chaidh an càr aige fhaicinn ann an Gleann Comhann.

Cha deach Mgr Rosser gu taighean-òsta san sgìre a bha air a chur air dòigh ro-làimh is thuirt a theaghlach nach robh e air bruidhinn riutha, rud a thuirt iad a bha neo-àbhaisteach dha.

Thuirt Poileas Alba nach eil iad den bheachd gu bheil dad amharasach mun chùis, is gun tèid aithisg a chur gu Neach-casaid a' Chrùin.

Fhuaireadh corp eile air a' Ghàidhealtachd Didòmhnaich.

Bha Adam Chalmers, 36, air a dhol a dhìth fhad 's a bha e a' coiseachd timcheall air Beinn Labhair Disathairne.

Bha Mgr Chalmers an dùil Meall Greigh, Meall Garbh agus An Stùc a dhìreadh.

Chualas bhuaithe mu dheireadh mu 12:40f is e ag ràdh gun robh air dà bheinn a dhèanamh.

Thuirt Poileas Alba gun deach innse do theaghlach Mhgr Chalmers gun deach corp a lorg.

Tha iad ag ràdh gu bheil an teaghlach airson leigeil fhaicinn gu bheil iad taingeil dhan a h-uile buidheann a bha an sàs san iomairt.

Thuirt na poilis nach eil dùil gu bheil dad amharasach mun chùis is gun tèid aithisg a chur gu Neach-casaid a' Chrùin.