Cùmhnantan £2bn gus obair an A9 a chrìochnachadh

Thuirt Còmhdhail Alba gum bi cothrom aig companaidhean einnseanaireachd air cùmhnantan luach £1.94bn fhaighinn gus crìoch a chur air a' phròiseact gus an A9 eadar Peairt is Inbhir Nis a dhèanamh dà-fhìllte.

Tha a' bhuidheann air fiosrachadh mu chùmhnantan a sgaoileadh airson nam pìosan den rathad (58 mìle uile gu lèir) nach deach a-mach gu tairgse fhathast.

'S e a' chiad chùmhnant às an fheadhainn mu dheireadh sin an obair eadar Dail Radaidh agus an Sloc.

Thuirt Riaghaltas na h-Alba san Fhaoilleach gu bheil iad an dùil fhathast gum bi an obair uile air a dèanamh ro dheireadh 2035.

'S e 2025 an targaid a bh' ann bho thùs.

Thuirt iad cuideachd gur e airgead calpa a phàigheas 'son a' chòrr den obair, seach an dà chuid maoineachadh poblach is prìobhaideach mar a bha dùil roimhe.