Triùir san ospadal an dèidh tubaist air taobh siar Leòdhais

Tha na Poilis ann an Leòdhas ag iarraidh fiosrachaidh an dèidh tubaiste eadar trì charbadan air an A857.

Thachair an tubaist mu 4:20f Diardaoin 1mh Lùnastail, faisg air Taigh Bhuirgh.

Bha Volvo V60 gorm, Mazda 3 glas, agus Scania tanker geal an sàs.

Chaidh dithis bhoireannach, 23 agus 36, a thoirt a dh'Ospadal nan Eilean ann an Steòrnabhagh ann an ambaileans. Thugadh nighean aois 11 dhan aon ospadal ann an ambaileans-adhair.

Chan eil duine aca air an goirteachadh a chùm cunnart am beatha.

Cha deach am fireannach, 38, a bha a' dràibheadh an Scania a ghoirteachadh.

Bha an rathad dùinte grunn uairean de thìde, 's dh'fhosgail e a-rithist aig 10:00f.

"Tha an rannsachadh againn a' leantainn agus tha sinn ag iarraidh air duine sam bith as urrainn ar cuideachadh fios a chur oirnn," thuirt an Sgt Gary Muir.

"Ma bha sibh san sgìre aig an àm 's fiosrachadh agaibh, gu h-àraid dealbhan dash-cam, a dh'fhaodadh an rannsachadh againn a chuideachadh, thigibh thugainn."

Faodar fios a chur air na Poilis an co-cheangal ris an tubaist air an àireimh-fòna 101, a' toirt seachad na h-àireimh-cùise 2612 den 1mh Lùnastail 2024.