E gbuola eze ọdịnala ọzọ n'Ebonyi Steeti

E gbuola onye eze ọdịnala ọzọ n'obodo Ishinkwor dị n'Ebonyi steeti dịka ọ gachara izu ole na ole ndị omekome gbuchara Eze ọdịnala obodo Ndufu-Alike dị n'okpuru ọchịchị Ikwo a steeti ahụ.

Akụkọ kwuru na e gburu Ezeogo Josephat Ikegwu nke obodo Ishinkwor n'ime okpuru ọchịchị Onicha dị na steeti ahụ.

Aka na-achị steeti ahụ katọrọ ogbugbu e gburu eze ọdịnala obodo Ishinkwor, bụ nke ọ kọwara dịka omume arụrụala na nwakpo megide udo, ịdị n'otu nakwa ntọala uche nke steeti ya.

Gọvanọ Francis Ogbonna Nwifuru nyere ndị ọrụ nchekwa jikọrọ ọnụ na steeti ahụ iwu ka ha kpughee ma kọwapụta ozugbo ihe niile gbasara ogbugbu e gburu eze ọdịnala ahụ.

"Eji m obi na-eru uju na obi mgbawa na-akatọ ogbugbu e gburu Ezeogo Josephat Ikegwu nke obodo Ishinkwor".

"Omume arụrụala a abụghị naanị nwakpo megide ọkwa eze ọdịnala anyị a na-asọpụrụ, ọ bụkwa ajọ mwakpo megide udo, ịdị n'otu na njikọta uche nke steeti Ebonyi anyị hụrụ n'anya," ka ọ kọwara.

Ọ gara n'ihu tie ezinụlọ eze ahụ nwụrụ anwụ na ndị obodo Ishinkwor aka n'obi, n'agbanyeghị na ọ ka na-eche nkọwapụta ndi ọrụ nchekwa gbasara ihe ọjọọ ahụ merenụ.

Gọvanọ Nwifuru kwere ndị Ebonyi na ndị Ishinkwor nkwa na ọchịchị ya agaghị agbachi nkiti hụ ka ajọ omume na-aga n'ihu na steeti ahụ.

"Gọọmenti aghaziela atụmatụ siri ike iji gbochie ogbugbu na-enweghị isi ma weta udo na steeti anyị. Anyị enyela ndị ọrụ nche niile iwu ka ha hụ na e jidere ndị mere ajọ mpụ a ma nye ha ntaramahụhụ kwesịrị ha n'ihu iwu," ka ọ gbakwunyere.

Gọvanọ ekwuola na iwu agaghị ele onye ọ bụla anya n'ihu; ọ sịrị na ọ dịghị 'nnukwu mmadụ' maọbụ onye weriri aka elu a ga-emere ebere, na onye ọ bụla aka ya dị na ya ga-enwete ntaramahụhụ kwesịrị ya.

Ndị uweojii Ebonyi Steeti anwụchiela otu nwoke aka ya dị n'ọtụtọ na ogbugbu e gburu Eze Francis Igwe

Ndị uweojii n'Ebonyi steeti ekwuola na ha anwụchiela otu onye ọzọ aka ya dị na ọtụtọ a tọọrọ ma gbuo Eze Francis Igwe bụ Eze ọdịnala obodo Ndufu-Alike dị n'okpuru ọchịchị Ikwo ma bụrụkwa nna onye bụbu osote gọvano steeti ahụ.

Ọnwụ Eze Francis Igwe mere ka aka na-achị Ebonyi steeti bụ Francis Nwifuru nye ndị uweojii iwu ka ha mee nnyocha ma nwụchie ndị niile aka ha dị n'ajọ agwa ahụ.

Ọnụ na-ekwuru ndị uweojii steeti ahụ bụ Joshua Ukandu kwuru na ha malitere ime nnyocha banyere ọnwụ Eze Francis Igwe onye ndị ojiegbe tọọrọ n'ụbọchị Sọnde 1 Maachị, 2026 oge ọ na-aga ụka n'ụtụtụ ụbọchị ahụ.

Ukandu kwuru na ndị uweojii nọrọ n'ụbọchị Satọde 7 Maachị, 2026 nwụchie otu nwoke onye dugara ndị uweojii ebe ya na ndị otu ya zoro egbe nakwa ngwa ọgụ ndị ọzọ dị iche iche.

Ukandu kwuru na nwoke ahụ aha ya bụ Nwazunku Stephen na-enyere ndị uweojii aka na nnyocha ha na-eme iji chọpụta ma nwụchie ndị ọzọ aka ha dị n'ọnwụ Eze Francis Igwe.

Gọvanọ Ebonyi Steeti enyela iwu ka e mee nnyocha maka ogbugbu e gburu Eze Francis Igwe

Aka na-achị Ebonyi steeti bụ Francis Ogbonna Nwifuru enyela iwu ka ndị ọrụ nchekwa malite ime nnyocha zuruoke n'ọnwụ Eze ọdịnala obodo Ndufu-Alike dị n'okpuru ọchịchị Ikwo bụ Eze Francis Igwe ndị ojiegbe tọọrọ ma gbuo.

Cheta na ndị ojiegbe tọọrọ Eze Francis Igwe n'ụbọchọ Sọnde 1 Maachị, 2026 oge ọ na-aga ụka n'ụtụtụ ụbọchị ahụ.

Ozi odeakwụkwọ Gọvanọ Nwifuru bụ Monday Uzor wepụtara, mere ka o doo anya na ọnwụ Eze Francis dị mwute nye obodo Ndufu-Alike nakwa Ebonyi steeti niile.

O kwuru na Gọvanọ Nwifuru kagburu ọgbakọ State Executive Council nke izuụka a iji nye ya ohere ịga hụ ndị ezinaụlọ Eze Francis na ndị obodo Ndufu-Alike ma tie ha aka n'obi.

Gọvanọ Nwifuru kwuru na ndị ọrụ nchekwa anụchiela ụfọdụ ndị a na-enye enyo n'aka ha dị n'ajọ agwa ahụ ma kwe nkwa na onye ọbụla aka ya dị n'ọnwụ Eze Francis ga-enweta ntaramahụhụ zuruoke dịka iwu si kwuo.

Nwa Eze Francis Igwe ma bụrụkwa onye bụbu osote Gọvanọ Ebonyi steeti bụ Kelvin Igwe kelere Gọvanọ Nwifuru maka ịbịa leta ezinaụlọ ha n'oge iru uju a nakwa mbọ gọọmenti na-agba inwụchi ndị kpara ya bụ ajọ agwa.

Ihe ndị uweojii kwuru

Ndị uweojii Ebonyi steeti kwuru na ha malitere ime nnyocha ngwangwa ha nwetara ozi banyere ọtịtọ a tọrọ Eze Francis Igwe nke mere ka ha nwụchie mmadụ itoolu e kwuru na aka ha dị na ya.

Ọnụ na-ekwuru ndị uweojii steeti ahụ bụ Joshua Ukandu kwuru na ndị ahụ ha nwụchiri gwara ndị uweojii na ha gburu Eze Francis n'ụbọchị Mọnde 2 Maachị, 2026 ma gosikwa ndị uweojii ebe ha liri ozu ya.

Ka ọ dị ugbua, ndị uweojii gwupụtara ozu Eze Francis ma tinye ya n'ọba ozu dịka nnyocha ka na-aga n'ihu.