'ઍક્ટરે મારા પર બળાત્કાર કરીને મારું અભિનયનું સપનું રોળી નાખ્યું'

ચેતવણી: આ અહેવાલની કેટલીક વિગતો વાચકોને વિચલિત કરી શકે છે

એક યુવતી પર સોળ વર્ષની ઉંમરે તેના અભિનયશિક્ષકે બળાત્કાર કર્યો, અને આ શિક્ષકે નેટફ્લિક્સની લોકપ્રિય શ્રેણી સેક્સ ઍજ્યુકેશનમાં પણ ભૂમિકા ભજવી હતી. એ યુવતીએ કહ્યું કે તેણે જ તેને ખરાબ અનુભવ કરાવ્યો અને અભિનયનું સપનું ધૂળમાં રોળી નાખ્યું.

પોતાની ઓળખ જાહેર કરવાનો નિર્ણય લેનાર ઓલિવિયા વુડારોવિઝે જણાવ્યું કે તેમનાં માતાની મુલાકાત તેમના ફ્લેટના રિનોવેશન દરમિયાન વેસ્ટવુડ સાથે થઈ હતી. ત્યારબાદ ડિસેમ્બર 2020માં તેમણે વેસ્ટવુડ પાસેથી અભિનયના પાઠ લેવાનું શરૂ કર્યું હતું.

તે ત્યાં સંપૂર્ણ સલામત હોવાં જોઈતાં હતાં. પરંતુ શ્રોપશાયર, આલ્બ્રાઇટનના રહેવાસી વેસ્ટવુડે અભિનયના પાઠને બહાનું બનાવી તેની સાથે બળાત્કાર અને યૌન શોષણ કર્યું.

ફેબ્રુઆરી 2025માં બાળકો અને તેની પાસે અભિનય શીખવા આવતી બે વિદ્યાર્થિનીઓ વિરુદ્ધ કુલ 26 ગુનાઓમાં દોષિત સાબિત થયા બાદ વેસ્ટવુડને 15 વર્ષ અને છ મહિનાની જેલની સજા ફટકારવામાં આવી હતી.

અભિનયના બહાને બળાત્કાર કર્યો

શરૂઆતમાં, વુડારોવિઝના જણાવ્યા અનુસાર, વ્યક્તિગત અભિનયના પાઠ દરમિયાન વેસ્ટવુડ ખૂબ જ શાંત અને વિશ્વાસપાત્ર લાગતો હતો અને તેને પોતાની સલામતીનો અનુભવ થતો હતો.

પરંતુ ત્રીજા જ પાઠ દરમિયાન તેણે તેને પોતાની સામે કપડાં બદલવાનું કહ્યું હતું અને દાવો કર્યો હતો કે મંચ પાછળ તો આ બધું સામાન્ય છે. ત્યારબાદ તેણે પૂછ્યું હતું કે શું તે કુંવારી છે.

વુડારોવિઝના જણાવ્યા અનુસાર, જાન્યુઆરી 2021માં, જ્યારે વેસ્ટવુડ 20 વર્ષનો હતો ત્યારે તેણે તેમને પોતાની સામે હસ્તમૈથુન કરવાનો આદેશ આપ્યો હતો અને કહ્યું હતું કે તે તેનો શિક્ષક હોવાથી તેમણે તેની દરેક વાત માનવી જ પડશે.

એ જ મહિનામાં તેણે તેમની સાથે બળાત્કાર કર્યો હતો.

વુડારોવિઝે જણાવ્યું, "તેણે મને કહ્યું કે તે મને હસ્તમૈથુન કરતા શીખવશે અને પછી તેણે મારા પેન્ટમાં હાથ નાખવાનું શરૂ કરી દીધું."

"પછી તેણે મારી સાથે બળાત્કાર કર્યો. પીડાને કારણે મને ચીસ પાડવાનું મન થતું હતું."

"હું થીજી ગઈ હતી, મારી આંખોમાંથી આંસુ વહી રહ્યાં હતાં. તેણે મારા હાથને બાજુમાં દબાવી દીધા હતા, જેથી હું હલી ન શકું કે તેને દૂર ધકેલી ન શકું. આ રીતે મેં મારું કૌમાર્ય ગુમાવ્યું."

તે મહિનાના અંતમાં, તેમણે જણાવ્યું કે નેટફ્લિક્સના બ્રિજર્ટનના એક દૃશ્યના મંચન બાદ વેસ્ટવુડે તેમને પોતાની સાથે મુખમૈથુન કરવાનું કહ્યું હતું.

જ્યારે તેમણે પોતાના અભિનયના ક્લાસ બંધ કરવાનું વિચાર્યું ત્યારે વેસ્ટવુડે જણાવ્યું કે તે એક કરારથી બંધાયેલી છે, જેમાં તેણે 365 ક્લાસ પૂરા કરવા પડશે અથવા 36,000 પાઉન્ડ સુધીની રકમ ચૂકવવી પડશે.

વુડારોવિઝે જણાવ્યું કે જો તે કોઈ ક્લાસમાં હાજર ન રહે, તો વેસ્ટવુડ તેની માતાને ફોન કરીને પૂછતો કે તેઓ ક્યાં છે. આના લીધે તે કંઈ પણ બોલવામાં અસમર્થતા અનુભવતાં હતાં.

9-10 વર્ષના છોકરા સાથે પણ દુર્વ્યવહાર કરેલો

વુડારોવિઝે જણાવ્યું કે વેસ્ટવુડે તેની સાથે કુલ ચાર વખત બળાત્કાર કર્યો હતો. તેમણે ઑગસ્ટ 2021માં પોતાનાં માતા અને પોલીસને આ અંગે જણાવ્યું હતું, પરંતુ પુરાવાના અભાવે શરૂઆતમાં કેસ બંધ કરી દેવામાં આવ્યો હતો.

એપ્રિલ 2023માં વધુ મહિલાઓ આગળ આવતાં તપાસ ફરી શરૂ કરવામાં આવી હતી.

આ પીડિતાઓમાં એક નાની છોકરી પણ હતી. તેની સાથે શોષણની શરૂઆત ત્યારે થઈ હતી જ્યારે તે માત્ર છ વર્ષની હતી અને વેસ્ટવુડ દસ વર્ષનો હતો. ઉપરાંત, નવથી દસ વર્ષના એક છોકરા સાથે તેણે 18 વર્ષની ઉંમરે દુર્વ્યવહાર કર્યો હતો. ભોગ બનનારાંઓમાં એક મહિલા અને અભિનય શીખતી બીજી એક કિશોરીનો પણ સમાવેશ થતો હતો.

21 વર્ષની ઉંમરે નાટ્યકલામાં સ્નાતક થયેલાં અને વેસ્ટ મિડલૅન્ડ્સમાં રહેનાર વુડારોવિઝે કહ્યું: "હું હજુ પણ સ્નાન કરતી વખતે મારી જાતને જોરથી ઘસતી રહું છું અને મને બહુ ખરાબ સપનાં આવે છે."

"જો મારે બાળકો થશે, તો તેઓ પણ એ જ રસ્તા પર ચાલશે, જ્યાં તે ચાલતો હતો."

"એણે પોતાની સજા કરતાં પણ વધારે સમય સુધી જેલમાં સડવું જોઈએ."

પાછળ ફરીને જોતાં 21 વર્ષનાં વુડારોવિઝે જણાવ્યું કે કાશ, તે સમયે ઘરે જ કરી શકાય તેવી ડીએનએ સ્વ-પરીક્ષણ કિટ ઉપલબ્ધ હોત, કારણ કે તેને ફોરેન્સિક તબીબી તપાસ માટે જાતે હાજર રહેવું પડ્યું હતું.

તેણે જણાવ્યું, "તેઓએ મારી યોનિમાર્ગમાં એક કૅમેરા લગાવ્યો જેથી જોઈ શકાય કે કંઈ નુકસાન થયું છે કે નહીં. આખી પ્રક્રિયા દરમિયાન હું સતત રડી રહી હતી અને મારી માનો હાથ પકડીને બેસી હતી."

"કાશ હું ઘરે આ કરી શકી હોત. એ મારા માટે ઓછું પીડાદાયક અને ઓછું ક્ષોભજનક બન્યું હોત. તેમને કોઈ નુકસાન કે પુરાવા મળ્યા નહોતા, કારણ કે છેલ્લો બળાત્કાર મહિનાઓ પહેલા થયો હતો."

'અભિનયના પાઠ તો યૌનશોષણનું બહાનું હતા'

આ કેસ આખરે નવેમ્બર 2024માં વોલ્વરહેમ્પ્ટન ક્રાઉન કોર્ટમાં ગયો.

તેમણે કહ્યું કે પુરાવા આપતી વખતે અને પૂછપરછ દરમિયાન તેમણે "નબળાઈનો કોઈ પણ સંકેત" ન દર્શાવવાનો નિર્ધાર કર્યો.

તેમણે ઉમેર્યું, "ફરી એક વખત તેની સાથે એ જ રૂમમાં હાજર રહેવું મારા માટે અત્યંત અસહજ અને વ્યથિત કરનારું હતું."

સજા સંભળાવતી વખતે, ન્યાયાધીશ નીલ ચાવલાએ કહ્યું હતું કે વેસ્ટવુડે પોતાના નાનકડા લોકપ્રિય સ્ટેટસનો ઉપયોગ યુવાન છોકરીઓને ફસાવવા માટે કર્યો હતો અને અભિનયના પાઠ તો યૌનશોષણ માટેનું માત્ર એક બહાનું હતા.

વુડારોવિઝે જણાવ્યું કે ત્યારથી તેના નાટ્યકલાના અભ્યાસ દરમિયાન જ્યારે પણ બળાત્કાર અથવા યૌનશોષણ અંગે ચર્ચા થતી, તેઓ વ્યથિત થઈ જતાં હતાં. આ ઉપરાંત, તેમણે ખાવાપીવાની આદતોમાં ગરબડ અને પ્રેમસંબંધોમાં પણ મુશ્કેલીઓનો સામનો કરવો પડ્યો હતો.

જોકે, ઇન્સ્ટાગ્રામ પર પોતાની આપવીતી અને શરીરની સકારાત્મકતા શૅર કર્યા પછી વુડારોવિઝ હવે "વધુ આત્મવિશ્વાસ" અનુભવે છે.

તેણે કહ્યું, "હું ઇચ્છું છું કે અન્ય લોકો પણ પોતાને પ્રેમ કરવાનું શીખે અને પોતાને સ્વીકારે. જીવનમાં આગળ વધતાં શીખવું જ પડે છે."

ભવિષ્ય જોતાં, વુડારોવિઝે નક્કી કર્યું છે કે તેઓ હવે અભિનયમાં કારકિર્દી બનાવવા માંગતાં નથી.

તેમણે કહ્યું: "હું તે ક્ષેત્ર સાથે કોઈ જ સંબંધ રાખવા માગતી નથી. તેણે મારા માટે બધું જ બરબાદ કરી નાખ્યું છે."

બીબીસી માટે કલેક્ટિવ ન્યૂઝરૂમનું પ્રકાશન