Afurika y'Epfo yatangaje gahunda yo kuvana ingabo zayo muri MONUSCO

Afurika y'Epfo yatangaje gahunda yo kuvana ingabo zayo mu ngabo ziri mu butumwa bwa ONU muri Repubulika ya Demokarasi ya Congo(MONUSCO), nk'uko itangazo ry'ibiro bya perezida w'iki gihugu ribivuga.

"Gusubiranya no gushyira ku murongo mushya ubushobozi bw'igisirikare cyacu", ni yo mpamvu yatanzwe n'iri tangazo rivuga ko Perezida Cyril Ramaphosa mu kwezi gushize yamenyesheje umunyamabanga mukuru wa ONU Antonio Guterres iby'iki cyemezo.

Leta ya DR Congo yagiye inenga kenshi ko ingabo za ONU zimaze imyaka irenga 25 mu burasirazuba bw'iki gihugu ariko nta musaruro ufatika zatangaze.

Kugeza mu Ukwakira 2025 Afurika y'Epfo yari ifite abasirikare 757 mu butumwa bwa MONUSCO, yari igihugu cya gatandatu mu bihugu 10 bifite ingabo nyinshi muri ubu butumwa.

Intangazo ry'ibiro bya perezida wa Afurika y'Epfo rivuga ko bazakorana na ONU mu gucyura abo basirikare kandi ko "bigomba kurangira mbere y'impera ya 2026".

Mu ntangiriro za 2024, umuryango w'ubukungu bw'ibihugu byo muri Afurika y'amajyepfo SADC, wohereje ingabo zibarirwa mu bihumbi zirangajwe imbere n'iza Afurika y'Epfo, gufasha ingabo za leta ya Congo kurwanya umutwe wa M23.

Abasirikare bagera kuri 14 ba Afurika y'Epfo baguye mu mirwano ikomeye yamaze igihe, cyane cyane yo kurengera umujyi wa Goma.

Muri Mata(25), amezi abiri nyuma y'uko M23 ifashe umujyi wa Goma, ingabo za SADC zavuye muri DR Congo ziciye mu Rwanda.

MONUSCO igizwe n'abasirikare n'abapolisi bagera ku 11,000 boherejwe kugarura amahoro no kurwanya imitwe yitwaje intwaro mu burasirazuba bwa DR Congo.

Mu Ukuboza(12) gushize akanama gashinzwe amahoro ku isi ka ONU kongereye ubu butumwa indi manda y'umwaka umwe.