CPD Wrecsam yn prynu tafarn enwog The Turf yn 'newyddion gwych' i gefnogwyr

The TurfPA

Mae dyfodol tafarn eiconig The Turf yn Wrecsam wedi cael ei sicrhau a'i holl hanes a diwylliant wedi ei ddiogelu, yn ôl un sydd wedi rhedeg y dafarn ers 20 mlynedd.

Daw sylwadau Wayne Jones yn dilyn y newyddion bod y grŵp sy'n berchen ar Glwb Pêl-droed Wrecsam wedi prynu'r dafarn gan Admiral Taverns.

Mae'n golygu y bydd y clwb, stadiwm y Cae Ras a The Turf i gyd dan berchnogaeth Wrexham Holdings, gyda'r gobaith y bydd hyn "yn caniatau rhagor o fuddsoddiad i brofiadau cefnogwyr ar ddiwrnodau'r gemau".

"Mae hyn yn cynnwys cyfleoedd i wella'r ardal bresennol i gefnogwyr (y fan zone) a gweithgareddau eraill sy'n ymwneud â chefnogwyr yn yr ardal drws nesaf i The Turf ar Ffordd Wyddgrug."

Dywedodd Wayne Jones ei fod yn "edrych ymlaen at barhau i redeg The Turf a dod â'i gyfuniad unigryw o hanes, awyrgylch ac, weithiau, ychydig o sêr Hollywood, i'r genhedlaeth nesaf o gefnogwyr Wrecsam ac i'r bobl leol".

Esboniodd fod y dafarn "yn hŷn na'r clwb, ac mae cofnodion yn awgrymu bod y clwb ei hun wedi cael ei sefydlu yn y dafarn".

"Mae [The Turf] wedi chwarae rhan allweddol yn hanes y clwb ers hynny," meddai. "Roedd y chwaraewyr arfer newid yn y dafarn cyn rhedeg allan i'r Cae Ras... ac mae'n parhau i fod yn ganolbwynt i gefnogwyr ar ddiwrnodau gemau ac ar ddiwrnodau eraill hefyd."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.