Heddlu i gymryd cerbydau sy'n difrodi natur, gan feio cyfryngau cymdeithasol am gynnydd

Bydd cerbydau gyrwyr sy'n ymddwyn yn wrthgymdeithasol, neu'n achosi difrod i ardaloedd gwarchodedig, yn cael eu cymryd oddi arnynt "yn y fan a'r lle", yn ôl yr heddlu.

Dywedodd y Cwnstabl Eryl Lloyd, o Dîm Troseddau Cefn Gwlad Heddlu'r Gogledd fod grymoedd newydd yn galluogi i swyddogion i gymryd cerbydau heb orfod rhoi gwybod o flaen llaw.

Rhoddodd yr heddwas rybudd i droseddwyr ei bod hi'n "bell i gerddad adra'".

Mae'r llu a Chyfoeth Naturiol Cymru (CNC) yn dweud bod difrod wedi'i achosi gan yrwyr ac ymddygiad gwrthgymdeithasol yn cynyddu.

Fis diwethaf, cafodd tri dyn eu canfod yn euog ar ôl i fideos ohonyn nhw'n achosi difrod i ardal warchodedig mewn cerbydau 4x4 gael eu postio ar TikTok.

Roedd John Robinson, Michael Williams a Joseph Hodgson yn rhan o grŵp a yrrodd y cerbydau o Lerpwl i Safle o Ddiddordeb Gwyddonol Arbennig y Berwyn, Sir Ddinbych.

Cafodd Robinson a Williams ddirwy o dros £2,000 yr un a'u gwahardd rhag gyrru am ddeufis.

Cafodd Hodgson orchymyn i dalu £2,000 ac mi gafodd Orchymyn Ymddygiad Troseddol (CBO) hefyd, yn ei wahardd rhag mynd i Safle Diddordeb Gwyddonol Arbennig (SoDdGA) y Berwyn am dair blynedd.

Dywedodd y Cwnstabl Eryl Lloyd mai'r "cerbydau sy'n dod fyny ffor' hyn ydy'r 4x4s 'ma, ond hefyd da' ni'n gweld motobeics".

"Ond eto ma'r niferoedd o e-bikes yn cynyddu, 'dan ni'n cael lot fawr o alwadau ynglŷn â hyn."

"Ma'r niwed sy' 'di cael ei 'neud yn fan hyn 'ŵan, mae o'n drist iawn i weld a 'dan ni'n trio'n gora' fel heddlu, fel tîm cefn gwlad, i stopio hyn rhag digwydd."

Ym marn y cwnstabl, "dwi'n meddwl mai'r social media 'ma" sy'n gyfrifol am y cynnydd yn yr ymddygiad gwrthgymdeithasol.

O dan Ddeddf Troseddau a Phlismona 2026, a ddaeth i rym yn y gwanwyn, mae gan yr heddlu'r pŵer bellach i atafaelu cerbydau gan droseddwyr yn syth.

"O blaen 'oeddan ni'n gorfod rhoi rhybudd iddyn nhw, ond rŵan 'dan ni'n gallu cymryd nhw ar y safle pan ma'r digwyddiad yn digwydd," meddai'r Cwnstabl Lloyd.

"Ma' hynna'n help mawr.

"'Dan ni am ddefnyddio'r pwera' 'ma os 'dan ni'n gweld digwyddiada' fel hyn, pobol yn dod â ceir nhw fyny, motobeics - 'dan ni am gymryd y cerbydau ganddyn nhw.

"Ma' hi'n bell i gerddad adra o fan hyn," rhybuddiodd.

Dywedodd Kirsty Roberts, swyddog cadwraeth i CNC, eu bod yn "gweld cynnydd yn y niferoedd o ddigwyddiadau ar safleoedd gwarchod dros Gymru i gyd".

"Yn anffodus mae lot yn ymwneud hefo ymddygiad antisocial," meddai Ms Roberts.

Esboniodd bod y cynnydd yma yn cynnwys achosion o gerbydau 4x4, beiciau trydan a "defnydd barbeciws ar ein safleoedd hefyd".

"Mae'n gallu achosi lot o ddifrod ar y safleoedd - mae'n dibynnu ar y math o gynefin sydd yna.

"Ar y Berwyn mae 'na fawndir a rhostir," eglurodd, gan ychwanegu bod ffrithiant o deiars cerbydau yn effeithio ar y mawn yno.

Neges Ms Roberts i'r cyhoedd oedd i fynd yno i "fwynhau gweld y natur, ond i'w barchu fo hefyd".

Yr Arglwydd Newborough o Ystâd Rhug, ger Corwen, sy'n berchen ar y tir ar y Berwyn a gafodd ei ddifrodi gan y gyrwyr fis diwethaf.

Dywedodd fod ardaloedd o'r ystâd wedi cael eu hagor i'r cyhoedd fwynhau, ond bod y mynydd yn "werthfawr iawn ac rydyn ni wedi trio ei ddiogelu a bod yn geidwaid da arno ers nifer o flynyddoedd".

Esboniodd fod difrod i gynefinoedd pwysig gan yrwyr yn digwydd yn amlach: "Dwi'n hollol siomedig, achos mae hwn yn ddifrod sydd wedi digwydd yn y blynyddoedd diweddar.

"Dwi'n eithaf hen fy hun, felly ges i'n magu yn parchu'r mynyddoedd a ddim yn gweld yr ymyrraeth a welwn ni gan y cyhoedd rŵan.

"Felly yndi, mae o'n brifo - y ffaith bod y difrod wedi digwydd.

"Rydyn ni'n monitro'r adar ar y mynydd bob blwyddyn ac rydyn ni'n gwybod bod nythoedd penodol werthfawr yn cael eu difrodi ar bwrpas a nid dyma'r ffordd ymlaen."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.