Grwpiau a sectorau nad oeddent wedi ffynnu

Ffermwyr

Roedd ffermwyr yn cynhyrchu gormod o gnydau ac yn methu eu gwerthu. Felly, fe ostyngodd y prisiau a bu'n rhaid i ffermwyr fenthyg arian gan y banciau er mwyn gallu byw. Aeth mwy a mwy ohonyn nhw i ddyled nes iddyn nhw orfod gwerthu eu ffermydd a gadael. Aeth nifer i grwydro o gwmpas America yn chwilio am unrhyw fath o waith - roedd y crwydrwyr yma'n cael eu galw'n hobos.

Erbyn 1928 roedd hanner holl ffermwyr UDA yn byw mewn tlodi. Gan fod prisiau mor isel fe gollodd cymaint â 600,000 o ffermwyr eu ffermydd yn 1924 yn unig.

Pobl dduon

Dioddefodd y bobl dduon yn economaidd, yn enwedig yn nhaleithiau'r de, lle roedd y mwyafrif yn gweithio ar ffermydd bychain oedd yn eiddo i dirfeddianwyr (landlords) gwyn. Labrwyr neu gyfran–gnydwyr oedd y bobl dduon gan amlaf ac roedden nhw'n byw mewn tlodi mawr.

Oherwydd deddfau Jim Crow a phresenoldeb y KKK yn nhaleithiau’r de, roedd arwahanu wedi gwneud bywyd hyd yn oed yn anoddach, ac ymfudodd llawer o bobl ddu i ddinasoedd gogleddol fel Efrog Newydd, Detroit a Chicago i ddod o hyd i waith yn y diwydiannau newydd. Roedd yr amodau'n parhau'n galed i'r rhan fwyaf o bobl a ymfudodd i'r gogledd gan eu bod yn byw mewn ghettos. Yn aml, nhw oedd "y rhai olaf i gael eu cyflogi a’r cyntaf i golli eu swyddi". Serch hynny, roedd rhai pobl ddu yn llwyddiannus a daeth sawl cerddor ac actor du yn enwog yn ystod y cyfnod hwn.

Mewnfudwyr

Parhaodd cyfradd diweithdra ymysg mewnfudwyr newydd yn uchel trwy gydol y 1920au. Roedd nifer o'r rhain heb gael addysg ac roedden nhw'n barod i weithio mewn unrhyw fath o swydd am gyflogau bach. Oherwydd hyn, byddai'n rhaid iddyn nhw ddioddef mwy a mwy o ragfarn (prejudice).

Hen ddiwydiannau traddodiadol

Methodd y diwydiannau traddodiadol ag ymateb i ddulliau newydd masgynhyrchu'r 1920au, yn wahanol i gwmni Ford a oedd yn gwneud elw da ac yn gallu talu cyflogau gwych. Hefyd, ers chwalu pwerau'r undebau llafur nid oedd y gweithwyr mewn sefyllfa i fedru hawlio cyflogau ac amodau gwaith gwell yn yr hen ddiwydiannau.

• Glo - Syrthiodd prisiau glo a bu'n rhaid gwneud miloedd yn ddi-waith am fod y diwydiant yn cynhyrchu gormod o lo a bod dim digon o bobl a gwledydd yn barod i'w brynu.
• Adeiladu llongau - Diwydiant mawr arall a ddiswyddodd filoedd o weithwyr oherwydd llai o alw am longau newydd.
• Cotwm - Cafodd ffibrau synthetig newydd eu datblygu, fel reion a ddaeth yn boblogaidd iawn yn lle cotwm. Roedd hi'n bosib cynhyrchu reion mewn ffatrïoedd lle'r oedd angen llai o weithwyr. Roedd yn rhaid i nifer o felinau tecstilau gau.