’میرا بچہ سخت سیمنٹ پر ٹھنڈے ٹوائلٹ میں پیدا ہوا‘

انتباہ: اس مضمون کچھ تفصیلات قارئین کے لیے تکلیف دہ ہو سکتی ہیں

’یہاں گاؤں میں رواج ہے کہ جب عورت حاملہ ہو جائے تو وہ کبھی ڈاکٹر کے پاس نہیں جاتی۔‘

یہ کابل سے ایک گھنٹے کی مسافت پر واقع وسطی افغان صوبے میں پانچ بچوں کی ماں کے الفاظ ہیں۔

وہ کہتی ہیں کہ ’ہمارے گھروں میں، جب خواتین کو زچگی کا درد ہوتا ہے، تو پورا خاندان پہلے نسخے تجویز کرتا ہے۔۔۔ جس کے مطابق ایک کپڑا لو، گرم کرو، پیٹ پر رکھو، کمر پر رکھو اور اس کی پیٹھ کو چکنا کرو۔‘

ان کی آواز بلند ہوتی ہے اور وہ ترش لہجے میں بولتی ہیں کہ جو کچھ انھوں نے برداشت کیا یا دیکھا ہے اس چیز نے انھیں غصہ دلایا ہے۔

وہ مزید کہتی ہیں کہ ’ایک عورت زچگی کے دوران گرم جگہ پر لیٹتی ہے، وہ گھر میں زچگی کے تمام درد کو برداشت کرتی ہے۔‘

’میں صبح پانچ بجے سے تکلیف میں مبتلا تھی اور گھر پر شام سات بجے تک درد برداشت کرتی رہی‘

صوبے میں ایک صوبائی ہسپتال ہے جو کابل کے قریب بھی ہے، لیکن خاتون، جو آٹھ بچوں کی ماں ہیں اور اپنا نام ظاہر نہیں کرنا چاہتی تھیں، انھوں نے کہا کہ وہ صوبائی دارالحکومت سے دور ایک ضلع کی رہائشی ہیں۔ ہم انھیں فرضی نام زرمینا پکارتے ہیں۔

انھوں نے کہا کہ ’ہم ایک بڑے خاندان میں رہتے ہیں۔ ہمارے خاندان کی خواتین کو بچے کی پیدائش کے لیے ہسپتال نہیں لے جایا جاتا۔‘

زرمینا کہتی ہیں کہ انھوں نے اپنی پہلی زچگی میں موت دیکھی۔ ’میرا بچہ شام سات بجے سخت سیمنٹ پر ٹھنڈے ٹوائلٹ میں پیدا ہوا۔ اتنا زیادہ خون بہا رہا تھا کہ میرا پورا جسم خون میں لت پت ہو گیا تھا۔ میری بچے دانی کی جھلی باہر نہیں آئی، خون نہیں بہا۔ بعد میں مجھے ہسپتال لے گئے اور صبح 10 بجے میں سو گئی۔‘

’میں حاملہ تھی، لیکن ہسپتال نہیں جا سکی کیونکہ مجھے اپنے نقصان کا خوف تھا‘

زرمینا نے کہا کہ واقعے کے بعد ان کے گھر کی صورتحال بدل گئی اور اب خواتین کو زچگی کے دوران ہسپتال لے جایا جاتا ہے۔

لیکن کابل کی ایک اور خاتون کہتی ہیں کہ ان کے شوہر کے خاندان کی صورتحال زیادہ تر پہلے جیسی ہی ہے۔ وہ یہ بھی نہیں چاہتیں کہ ان کا نام لیا جائے، اور ہم اس رپورٹ میں انھیں نادیہ کے فرضی نام سے پکارتے ہیں۔

نادیہ کہتی ہیں کہ وہ 17 سال کی تھیں جب وہ کچھ عرصہ پاکستان نقل مکانی کر گئیں۔ وہ مزید کہتی ہیں کہ انھوں نے خود تھوڑا بہت پڑھائی کی ہے، لیکن ان کے شوہر کا خاندان ناخواندہ ہے۔

انھوں نے کہا کہ بہت سی دیگر خواتین کی طرح، انھیں گھریلو تشدد کے علاوہ صحت کی خدمات سے محروم رکھا گیا۔

نادیہ کہتی ہیں کہ ’میرے سسر کہتے ہیں کہ تمام عورتیں گھر پر بچے کو جنم دیتی ہیں۔ وہ خاندانی نسخوں کو آزمانے سے قبل ڈاکٹر کے پاس جانے کو بے وقوفی قرار دیتے ہیں۔‘

وہ کہتی ہیں کہ جب ان کا پہلا بچہ پیدا ہوا تو وہ گھر پر 24 گھنٹے تک درد میں تڑپتی رہیں۔

’میرے سسر کو اس کا علم تھا، وہ مجھے ڈاکٹر کے پاس جانے نہیں دیتے تھے، میں درد میں شرمندگی سے چیخ نہیں سکتی تھی، میری ساس نے مجھے دیکھا، لیکن انھوں نے مجھے کوئی مدد نہیں دی۔‘

نادیہ کے مطابق، جب درد بہت زیادہ ہو گیا تو ان کے خاندان نے انھیں ہسپتال لے جانے کا فیصلہ کیا۔

’میں بچے کو جنم دے رہی تھی لیکن پیدل ہسپتال گئی۔ انھوں نے مجھے ڈاکٹر کے پاس اسی وقت جانے دیا جب بچہ پیدا ہوا۔‘

وہ کہتی ہیں کہ ان کے سسر کے خاندان نے انھیں ہسپتال میں بچے کی پیدائش کی اجازت نہیں دی۔

’ڈاکٹر نے میری ساس کو بتایا کہ مجھے ہسپتال میں بچے کو جنم دینا ہے، لیکن انھوں نے مجھے گھر بھیج دیا کیونکہ وہ میرے نقصان سے ڈرتی تھیں۔ انھوں نے ان کی مدد کے لیے ایک ضعیف عورت بھیجی، جس نے رات کے اندھیرے میں میری پیدائش میں مدد کی۔‘

گھر پر بچے کی پیدائش کے خطرات

ماہر امراض نسواں شنکی وردگ کہتی ہیں کہ اگرچہ کچھ خاندان سمجھتے ہیں کہ گھر پر پیدائش آسان یا مفت ہے، لیکن ایسا کرنے سے ماں اور بچے کی زندگی کا نقصان ہو سکتا ہے۔

ڈاکٹر شنکی وردک کے مطابق گھر پر زچگی کے دوران کئی خطرات پیش آ سکتے ہیں، جن میں بچے کی دل کی دھڑکن میں بے قاعدگی، ناف کی نالی کا باہر آ جانا یا بچے کی گردن کے گرد لپٹ جانا (جو جان لیوا ثابت ہو سکتا ہے)، رحم میں بچے کی غیر معمولی پوزیشن، پیدائش کے بعد نال (پلیسنٹا) کا مکمل طور پر الگ نہ ہونا، ماں کا ضرورت سے زیادہ خون بہنا، اور بلڈ پریشر کا غیر معمولی حد تک بڑھ جانا یا کم ہو جانا شامل ہیں۔

ڈاکٹر شنکی اس بات پر زور دیتی ہیں کہ یہ سب ہنگامی حالات ہیں اور صرف ایک ڈاکٹر ہی انھیں ہسپتال میں مکمل طبی سہولیات کے ساتھ روک سکتا ہے اور ماں اور بچے کی جان بچا سکتا ہے۔

وہ کہتی ہیں کہ ’گھر پر پیدائش کے دوران ماں اور بچے کے لیے ہر طرح کے خطرات ہوتے ہیں، اس لیے یہ ضروری ہے کہ ماں کو وقت پر ہسپتال منتقل کیا جائے اور وہیں بچے کو جنم دیا جائے۔‘

ہوم ڈیلیوری کے دوران کن چیزوں پر عمل کرنا چاہیے؟

ڈاکٹر شنکی وردک کہتی ہیں کہ پہلے مرحلے میں ہر عورت کو زچگی کے لیے ہسپتال لے جانا چاہیے، لیکن اگر اسے گھر پر بچے کی پیدائش کرنی ہو تو یہ نکات مدنظر رکھنا چاہیے۔

زچگی کے دوران ہر دو گھنٹے میں ایک عورت موت کے منھ میں چلی جاتی ہے

طالبان کی وزارتِ صحت عامہ کا کہنا ہے کہ گذشتہ سال ملک بھر میں ’220 خواتین‘ زچگی کے دوران ہلاک ہو چکی ہیں۔

وزارت کے ترجمان ڈاکٹر شرافت زمان نے کہا کہ ’اس سے پہلے، 600 اضلاع صحت کی خدمات کے لحاظ سے سفید فام زون سمجھے جاتے تھے، جس کا مطلب ہے کہ وہاں صحت کی خدمات بالکل موجود نہیں تھیں۔ اب 400 سے زائد مراکز قائم ہو چکے ہیں اور کئی دیگر جگہوں پر تعمیراتی کام جاری ہے۔‘

ان کے مطابق وزارت ملک بھر میں صحت کی خدمات کو وسعت دینے کے لیے کام کر رہی ہے مگر کچھ علاقوں کے جغرافیائی محل وقوع یا خاندانی فیصلوں کی وجہ سے خواتین کو اب بھی گھر پر ہی بچے کی پیدائش پر مجبور کیا جاتا ہے۔

ترجمان کے مطابق ’کچھ علاقوں میں ثقافتی مسائل ہیں، اور کچھ میں عوامی آگاہی کم ہے، اس لیے خواتین گھر پر بچے کو جنم دیتی ہیں۔‘

تاہم، عالمی ادارہ صحت کی فراہم کردہ اعداد و شمار کے مطابق، 2025 میں ہر 100,000 خواتین میں سے 620 خواتین زچگی کے دوران یا چند گھنٹوں بعد ہلاک ہو گئیں۔ اس کا مطلب یہ ہے کہ ہر دو گھنٹے میں ایک عورت بچے کی پیدائش کے دوران یا حمل کی پیچیدگیوں کی وجہ سے موت کے منھ میں جاتی ہے۔

تنظیم کا کہنا ہے کہ افغانستان کو خواتین ڈاکٹروں کی کمی کا سامنا ہے۔

یہ اعدادوشمار اس وقت سامنے آئے ہیں جب افغانستان میں طالبان حکومت نے چھٹی جماعت سے زائد عمر کی لڑکیوں اور خواتین کی تعلیم پر پابندی لگا دی ہے اور مڈوائفری ٹریننگ سینٹرز بھی بند کر دیے ہیں۔ اس سے ڈاکٹروں کی ماؤں تک رسائی محدود اور مشکل ہو گئی ہے۔

ڈاکٹروں کا کہنا ہے کہ افغانستان میں کچھ مائیں ایسے حالات میں اپنی جان سے ہاتھ دھو بیٹھتی ہیں جہاں انھیں جدید طبی خدمات کی ضرورت نہیں ہوتی اور صرف پیشہ ور ڈاکٹر یا دائی کی موجودگی ان کی جان بچا سکتی ہے۔