‘కోక్‌ క్యాన్‌’: పురుషాంగం సైజును పెంచే ఫిల్లర్స్ చికిత్స ఏంటి? పురుషులు ఎందుకు దీని వెంటపడుతున్నారు?

మొదట్లో 'కోక్ క్యాన్' అనేదానిపై తనకు ఆసక్తి ఉండేది కాదని మాంచెస్టర్‌కు చెందిన జేసన్‌ (అసలు పేరు కాదు) అన్నారు. కానీ, తర్వాత ఆయన ఆ చికిత్స తీసుకున్నారు. అయితే కొందరు ఈ చికిత్స విషయంలో హద్దులు దాటి పోతున్నారని జేసన్ అన్నారు.

పొట్టిగా, సన్నగా ఉండే పురుషాంగాన్ని ఫిల్లర్ల సాయంతో లావుగా మారుస్తారు. చికిత్స‌ తర్వాత ఏర్పడిన పురుషాంగాన్ని‘కోక్ క్యాన్’ అనే పిలుస్తుంటారు.

ఫిల్లర్స్ సాయంతో ఆయన పురుషాంగం చుట్టు కొలత 16శాతం పెరిగింది. దీని వల్ల జేసన్‌తో పాటు ఆయన భాగస్వామి చాలా సంతోషంగా ఉన్నారు. ఇది తనలో 'ఆత్మ విశ్వాసాన్ని' పెంచిందని ఆయన చెప్పారు

"అదనంగా ఆ కొంచెం వెడల్పుతో ఇప్పుడు అన్నీ సాధారణంగా పని చేస్తున్నాయి" అని జేసన్ వివరించారు.

జేసన్ మాదిరిగా ఎంతమంది పురుషులు పురుషాంగానికి ఫిల్లర్లు వేయించుకుంటున్నారో స్పష్టంగా తెలియదు.

వీధుల్లో పెదవుల ఫిల్లర్లు కనిపించినంతగా పురుషాంగం ఫిల్లర్లకు ప్రాచుర్యం కనిపించదు. అందుకే దాన్ని అంచనా వేయలేం. దీనిపై పెద్దగా నియంత్రణ లేదు.

అధికారిక రికార్డులు ఉండవు. ఎందుకంటే ఎవరైనా ఈ ప్రక్రియను అందించవచ్చు.

గత వింటర్ ఒలింపిక్స్‌లో పురుషాంగ ఫిల్లర్లు విచిత్రమైన కుట్ర సిద్ధాంతానికి వేదికగా మారాయి.

పురుష స్కీ జంపర్లు తమ సూట్ల ఉపరితల వైశాల్యాన్ని పెంచడానికి ఫిల్లర్లు ఉపయోగిస్తున్నారని, దీని వల్ల వాళ్లు మరింత దూరం దూకగలరనే వదంతులు వచ్చాయి.

అయితే కొంతమంది పురుషుల్లో ఈ ప్రక్రియ విఫలం కావడంతో పురుషాంగం నల్లబడటం, చర్మం ఊడిపోవడంతోపాటు కొన్ని సందర్భాల్లో యాక్సిడెంట్ అండ్ ఎమర్జెన్సీ పరిస్థితికి చేరుకున్నారు.

ఈ ప్రక్రియ విషయంలో అప్రమత్తంగా ఉండాలని బ్రిటిష్ అసోసియేషన్ ఆఫ్ యూరాలజికల్ సర్జన్స్ పురుషుల్ని హెచ్చరించింది.

అయినా చాలామంది మగవాళ్లు ఎందుకు ఈ ప్రక్రియకు మొగ్గు చూపుతున్నారు? ఇందులో ప్రమాదం ఏంటి?

'మాయిశ్చర్ మాగ్నైట్'

ఫిల్లర్లు వేయించుకోవాలనే తన నిర్ణయం గురించి జేసన్ నిజాయితీగా మాట్లాడారు. అయితే తన గుర్తింపును వెల్లడించవద్దని ఆయన కోరారు.

తన పురుషాంగం పొడవుతో ఆయన సంతోషంగానే ఉన్నారు. కానీ కొంచెం సమానంగా, చక్కని సమతుల్య రూపం కోసం పురుషాంగం చుట్టుకొలత పెంచుకోవాలని అనుకున్నారు.

"అది కొంచెం చిన్నదిగా ఉందనిపించినప్పుడు ఎందుకు ప్రయత్నించకూడదు" అని జేసన్ ప్రశ్నించారు.

ఆయన ఏడాది పాటు అనేక మార్గాలను పరిశీలించారు. సర్జరీ చేయించుకోవాలనే ఆలోచన విరమించుకున్నారు. హైల్యూరోనిక్ యాసిడ్ అనే ఫిల్లర్‌ను ఎంచుకున్నారు. అది తాత్కాలికమైనది కాబట్టి తనకు ఆ రూపం నచ్చకపోయినా "చివరకు కరిగిపోతుంది" అనే విషయం ఆయనకు తెలుసు.

దూకుడుగా ఉండే ఆల్ఫా మేల్ ‌పురుషత్వం తనకు ప్రేరేపణ కాదని జేసన్ చెప్పారు.

"నీ పురుషాంగం ఎంత పెద్దదో, నువ్వు అంత పెద్దమనిషివి అనే భావన నేను అంగీకరించను" అని ఆయన అన్నారు.

పురుషుల అందంపై అంచనాలు మారుతున్నాయనేది ఆయన అభిప్రాయం.

"అందాన్ని మెరుగుపరుచుకోవల్సింది మహిళే కాదు. పురుషులు కూడా. సమాజం మారుతోంది. మీడియాలో కనిపించేవి సమాజంపై ప్రభావం చూపుతున్నాయి. మీరెక్కడికైనా వెళితే పరిపూర్ణంగా కనిపించే ఎవరో ఒకరు కనిపిస్తారు" అని జేసన్ చెప్పారు.

పురుషాంగం పరిమాణం పెంచే చికిత్సలను అందించే కొన్ని క్లినిక్‌ల వెబ్‌సైట్‌లను పరిశీలిస్తే వాటిలో కొన్ని "మీ పురుషాంగం పరిమాణం గురించి మీకు సిగ్గుగా అనిపిస్తుందా?" వంటి ప్రశ్నలు అడుగుతాయి. కొంతమందిని ఈ ప్రశ్న ఆలోచనలో పడేస్తుంది.

పురుషాంగం పరిమాణాన్ని పెంచేందుకు అనేక రకాల ఆప్షన్లు ఉన్నాయి. శస్త్రచికిత్స, శస్త్రచికిత్సేతర పద్ధతులు, పురుషాంగంలోకి ఇంజెక్ట్ చేసే వివిధ పదార్థాలు ఉన్నాయి.

అన్నింటికంటే సాధారణంగా ఉపయోగించేది జెల్‌లాంటి పదార్థమైన హైల్యూరోనిక్ యాసిడ్‌ను ఇంజెక్ట్ చేయడం.

దీనిని పెదవుల ఫిల్లర్లలో ఎక్కువగా ఉపయోగిస్తారు.

హైల్యూరోనిక్ యాసిడ్ శరీరంలో సహజంగా ఏర్పడే చక్కెర అణువు. ఇది నీటిని తన లోకి లాగేసుకుంటుంది. అందుకే దీన్ని "మాయిశ్చర్ మాగ్నెట్" అని పిలుస్తారు.

పురుషాంగంలోకి హైల్యూరోనిక్ యాసిడ్

డాక్టర్ జావెద్ హుస్సేన్ గ్రేటర్ మాంచెస్టర్‌లోని ప్రెస్ట్‌విచ్‌లో ఉన్న తన క్లినిక్‌లో ఏడాది నుంచి పురుషాంగ ఫిల్లర్లను అందిస్తున్నారు.

కాస్మెటిక్ ప్రక్రియల వైపు మళ్లడానికి ముందు ఆయన వైద్యుడిగా శిక్షణ పొందారు. పురుషాంగంలోకి ఫిల్లర్ల అమర్చడానికి చట్టపరంగా ఎలాంటి వైద్య శిక్షణ అవసరం లేదు.

పెనిస్ ఫిల్లర్లకు డిమాండ్ పెరుగుతోందని ఆయన చెబుతున్నారు. ఆయన క్లినిక్‌లో అన్ని వయసుల పురుషులకు చికిత్స అందించారు. వారిలో కొందరు 20ల మధ్యలో ఉన్నారు. ఆయన క్లయింట్లలో పెద్ద వ్యక్తి వయసు 72 ఏళ్లు.

రోగి ఆరోగ్యం, చేయించుకోవడానికి కారణాలు, ఫలితాలపై అంచనాలు, ప్రమాదాల గురించి చర్చించిన తర్వాత ఈ ప్రక్రియ ప్రారంభం అవుతుంది.

ఈ ప్రక్రియలో భాగంగా పురుషాంగంలో హైల్యూరోనిక్ యాసిడ్‌ను పై భాగంలో, ఇరువైపులా మూడుసార్లు ఇంజెక్ట్ చేస్తారు.

ఒక ఇంజెక్షన్ ద్వారా హైల్యూరోనిక్ యాసిడ్ ఫిల్లర్‌ను పురుషాంగంలోకి పంపిస్తారు. అది అడుగు భాగం వద్ద ప్రవేశించి షాఫ్ట్ పొడవునా ప్రయాణిస్తుంది.

ఫిల్లర్‌ను సమంగా కనిపించేలా మసాజ్ చేస్తారు. దీనిని రోగి ఇంట్లో కూడా కొనసాగిస్తాడు.

ఈ ప్రక్రియకు దాదాపు రూ. 4 లక్షలు ఖర్చవుతుంది. ఒక్కసారి ఫిల్లర్లు ఎక్కించడం పూర్తైన తర్వాత 6 నుంచి 9 నెలల పాటు పురుషాంగం చుట్టుకొలత 10 నుంచి 20 శాతం పెరుగుదలను ఆశించవచ్చని హుస్సేన్ చెబుతున్నారు.

అయితే ఇందులో ప్రమాదాలు కూడా ఉన్నాయి. నొప్పి, గాయాల మచ్చలు, ఫిల్లర్ల వల్ల పురుషాంగం వెడల్పులో అసమానతలు వంటి తక్కువ తీవ్రత ఉన్న వాటి నుంచి ఇన్ఫెక్షన్ వంటి తీవ్రమైన సమస్యలు ఏర్పడే అవకాశం ఉంది.

ఫిల్లర్‌ను ఉపయోగించే అన్ని ప్రక్రియలకు ఈ ప్రమాదాలు వర్తిస్తాయి.

అంగం గట్టి పడేందుకు పురుషాంగంలో కీలకమైన నిర్మాణాలు, రక్తనాళాలు దెబ్బ తినే ప్రమాదం ఉంది.

సాధారణంగా సర్జన్లు ఈ ఫిల్లర్ల ప్రక్రియ విషయంలో కొంత ఆందోళన వ్యక్తం చేస్తుంటారు. అయితే హుస్సేన్‌కు ఈ విషయంలో ఆందోళన లేదు.

మిగతా వారికి మీకు తేడా ఏంటని అడిగినప్పుడు "నేను వారి సమస్యను పూర్తిగా అర్థం చేసుకుంటాను" అని హుస్సేన్ చెప్పారు.

ప్రమాదం ఏర్పడినప్పుడు తన వద్ద తక్షణ స్పందన ఇచ్చే యాక్షన్ ప్లాన్ ఉందని, ఫిల్లర్ల వల్ల రియాక్షన్ వస్తే వాటిని త్వరగా కరిగించే మందులు ఉన్నాయని హుస్సేన్ చెప్పారు.

అయితే "అదృష్టవశాత్తూ వాటిని ఎప్పుడూ ఉపయోగించాల్సిన అవసరం రాలేదు" అని ఆయన అన్నారు. బీబీసీ దీనిని స్వతంత్రంగా ధృవీకరించుకోలేకపోయింది.

అయితే ఓ రోగి గురించి ఆయన గుర్తు చేసుకున్నారు.

"ఒక వ్యక్తి వేరే ఎక్కడో ఈ ట్రీట్‌మెంట్ చేయించుకున్నాడు. అది సరిగ్గా జరగలేదు" అని హుస్సేన్ వివరించారు.

అతనికి తప్పుడు ఫిల్లర్‌ను ఉపయోగించారని అది పురుషాంగంలోని రక్తనాళాలను దెబ్బతీయడంతో చర్మం చనిపోతుండగా "పురుషాంగం నల్లగా మారడం మొదలైందని హుస్సేన్ చెప్పారు.

ఆ వ్యక్తిని వెంటనే యాక్సిడెంట్ అండ్ ఎమర్జెన్సీకి పంపించారు.

రిస్క్ కూడా ఎక్కువే

ప్రొఫెసర్ వైభవ్ మోడ్గిల్ మాంచెస్టర్‌లో నేషనల్ హెల్త్ సర్వీస్‌లో ఆండ్రాలజిస్ట్, కన్సల్టెంట్ యూరాలజికల్ సర్జన్‌గా పని చేస్తున్నారు.

ఫిల్లర్ల వల్ల సమస్యలు తలెత్తిన పురుషులు కొంతమంది ఆయన వద్దకు వచ్చారు.

"అలా జరిగినప్పుడు, అది రోగికి చాలా సమస్యగా మారవచ్చు" అని ఆయన అంటున్నారు.

"స్కిన్ నెక్రోసిస్, అంటే చర్మంలోని ఒక భాగం చనిపోయి, అది పూర్తిగా నల్లగా మారి, ఆ తర్వాత మెల్లగా ఊడిపోతుంది" అని తాను పరీక్షించిన పేషంట్ల గురించి ఆయన గుర్తు చేసుకున్నారు.

"కాబట్టి, పురుషులు 'ఓహ్, ఇది అద్భుతంగా ఉండబోతోంది' అని అనుకుంటూ వెళ్తారు, కానీ వారు వెళ్లినప్పటి కంటే వాస్తవానికి మరింత అసంతృప్తితో బయటకు రావచ్చు" అని మోడ్గిల్ చెప్పారు

అలెక్స్ తన అసలు పేరు వెల్లడించవద్దని అడిగారు. ఆయన వేరే రకం పురుషాంగం పెంపు ప్రక్రియ కోసం జర్మనీకి వెళ్లారు.

పురుషాంగాన్ని నడుము ఎముకకు అనుసంధానించే లిగమెంట్‌ను కోసే శస్త్రచికిత్స చేయించుకున్నారు.

ఈ సర్జరీ వల్ల ఆయన పురుషాంగం పొడవుగా కనిపిస్తుంది. తన సొంత కొవ్వు కణాలను కూడా సేకరించి, దానిని తన పురుషాంగంలోకి ఇంజెక్ట్ చేయించుకున్నారు. దీని వల్ల పురుషాంగం సైజు పెరుగుతుంది.

ఈ సర్జరీ పూర్తై స్పృహలోకి వచ్చిన తర్వాత ఆయన నిలబడగానే విపరీతమైన నొప్పితో విలవిల్లాడారు.

"నాకు చాలా గాయాలయ్యాయి, నా కాళ్ల పైభాగమంతా పసుపు రంగులోకి మారింది. దాదాపు నెల రోజులు సరిగ్గా నడవలేకపోయాను" అని అలెక్స్ చెప్పారు.

అలెక్స్‌కు మోడ్గిల్ క్లినిక్‌లో చికిత్స అందించారు. చికిత్స తర్వాత ఆయన పూర్తిగా కోలుకున్నారు.

"చాలామందికి ఆ అదృష్టం దక్కదు. నేను అదృష్టవంతుడిని" అని అలెక్స్ చెప్పారు.

"నా పురుషాంగం చిన్నది కాదని మొదట్లోనే నాకు తెలుసు. కానీ సమాజం, పోర్న్ వల్ల తన పెద్ద పురుషాంగం మగతనానికి ప్రతీక" అని నమ్మేలా చేశాయని అలెక్స్ చెప్పారు.

'వద్దు' అంటున్న బ్రిటిష్ అసోసియేషన్ ఆఫ్ యూరాలజికల్ సర్జన్స్

పురుషాంగం పెంపు ప్రక్రియల సంఖ్యపై అధికారిక డేటా అందుబాటులో లేదు. అయితే ఆన్‌లైన్‌ సెర్చ్ , ప్రకటనలు, సోషల్ మీడియా అన్నీ "సంఖ్యలు పెరుగుతున్నాయనే వాస్తవాన్ని సూచిస్తున్నాయి" అని మోడ్గిల్ చెప్పారు.

ఈ గణాంకాల తీవ్రత పెరగడంతో బ్రిటిష్ అసోసియేషన్ ఆఫ్ యూరాలజికల్ సర్జన్స్ ఈ విధానాలకు వ్యతిరేకంగా కొత్త సిఫార్సులు జారీ చేసింది.

"పురుషాంగం ఫిల్లర్స్ విషయంలో ఏదీ సిఫారసు చేయలేమని బ్రిటిష్ అసోసియేషన్ ఆఫ్ యూరాలజికల్ సర్జన్స్ రూపొందించిన మార్గదర్శకాలు చెబుతున్నాయి" అని మోడ్గిల్ చెప్పారు.

ఈ మార్గదర్శకాలు రూపొందించడానికి బ్రిటిష్ అసోసియేషన్ ఆఫ్ యూరాలజికల్ సర్జన్స్ 3,750 మంది పురుషులకు సంబంధించిన 36 అధ్యయనాలను పరిశీలించింది. ఇందులో ఏది 'సురక్షితం' అనే దానిపై స్పష్టత లేదని వెల్లడించింది.

ఫిల్లర్లు దీర్ఘకాలంలో పురుషాంగాన్ని ఎలా ప్రభావితం చేస్తాయనే దానిపై డేటా లేకపోవడం దీనికి ఒక కారణం.

పెదవుల ఫిల్లర్ల మాదిరిగానే ఈ విధానాన్ని నిర్వహించడానికి ఎలాంటి అర్హతలు అవసరం లేకపోవడంపై కూడా ఆందోళన వ్యక్తమవుతోంది.

పూర్తిగా నిషేధించడం "బహుశా చాలా కఠినమైనది" అని మోడ్గిల్ చెప్పారు.

రానున్న రోజుల్లో ఈ ఫిల్లర్లు వాడే ప్రక్రియ విస్తరిస్తే "భారీ స్థాయిలో నియంత్రణ అవసరం" అని ఆయన అభిప్రాయపడ్డారు.

పురుషాంగ ఫిల్లర్ విధానాలను నమోదు చేయడానికి జాతీయ రిజిస్ట్రీని ఏర్పాటు చేయాలని, అలాగే దీర్ఘకాలిక డేటాను సేకరించాలని ఆయన కోరారు.

వీటి సాయంతో పురుషులు ప్రమాదాలు, ప్రయోజనాల ఆధారంగా సమాచారంతో కూడిన నిర్ణయం తీసుకోగలరు.

మాంచెస్టర్‌కు తిరిగి వచ్చిన జేసన్ తనకు జరిగిన చికిత్సా విధానం ఫలితాలతో సంతోషంగా ఉన్నారు.

ప్రస్తుత ఫిల్లర్లు ప్రభావం కోల్పోయినప్పుడు మళ్లీ వాటిని వేయించుకుంటానని ఆయన చెప్పారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)