பிரபல பாடகி ஆஷா போஸ்லே மும்பையில் காலமானார்

தமிழ் உள்பட இந்திய திரையுலகில் 10 ஆயிரம் பாடல்களுக்கும் மேல் பாடியுள்ள மூத்த பாடகி ஆஷா போஸ்லே தனது 92-வது வயதில் காலமானார். சனிக்கிழமை (ஏப்ரல் 11) ஏற்பட்ட மாரடைப்பைத் தொடர்ந்து, மும்பையில் உள்ள ப்ரீச் கேண்டி மருத்துவமனையில் அவர் சிகிச்சைக்காக அனுமதிக்கப்பட்டார்.

ப்ரீச் கேண்டி மருத்துவமனையின் மருத்துவர் பிரதீத் சம்டானி, பிபிசி மராத்திக்கு இந்தத் தகவலைத் தெரிவித்தார்.

ஆஷா போஸ்லே நுரையீரல் நோய் மற்றும் வயது தொடர்பான பிற உடல்நலக் குறைபாடுகளுடனும் போராடி வந்தார்.

திங்களன்று (ஏப்ரல் 13) மாலை 4 மணிக்கு, சிவாஜி பார்க் மயானத்தில் அவரது இறுதிச் சடங்குகள் நடைபெறும் என்று மகாராஷ்டிர கலாசாரத் துறை அமைச்சர் ஆஷிஷ் ஷேலார் தெரிவித்தார்.

இளையராஜா, ரஹ்மானுடன் பணிபுரிந்தவர்

பஜனைகள் முதல் கேபரே பாடல்கள் வரை, அனைத்து வகையான பாடல்களுக்கும் கச்சிதமாகப் பொருந்தக் கூடிய குரல் அவருடையது.

1933-ஆம் ஆண்டு செப்டம்பர் 8-ஆம் தேதி பிறந்த ஆஷா போஸ்லே, தனது 10-வது வயதில், அதாவது 1943-ஆம் ஆண்டில் பாடத் தொடங்கினார்.

தனது 90-வது வயதிலும் அவர் தொடர்ந்து பாடி வந்தார். ஹன்ஸ்ராஜ் பாஹ்ல், ஓ. பி. நய்யார், மதன் மோகன், ஆர். டி. பர்மன், இளையராஜா, அனு மாலிக் முதல் ஏ. ஆர். ரஹ்மான் வரையிலான கலைஞர்களுடன் அவர் பணியாற்றியுள்ளார்.

ஆஷா பாடிய பிரபல தமிழ் பாடல்கள்

ஆஷா போஸ்லே தமிழ், இந்தி உள்பட இந்திய மொழி திரைப்படங்களில் 10,000-க்கும் மேற்பட்ட பாடல்களை பாடியுள்ளார்.

ரஃபி, முகேஷ் மற்றும் கிஷோர் முதல் பாய் ஜார்ஜ் மற்றும் ஆதித்யா நாராயண் வரையிலான கலைஞர்களுடன் இணைந்து அவர் பாடியுள்ளார்.

1995-ஆம் ஆண்டில், உஸ்தாத் அலி அக்பர் கானுடன் இணைந்து வெளியிட்ட ஒரு இசைத் தொகுப்பிற்காக (Album) அவர் கிராமி விருதுக்குப் பரிந்துரைக்கப்பட்டார்.

- இது, பிபிசிக்காக கலெக்டிவ் நியூஸ்ரூம் வெளியீடு