TOOS, Maraykanka oo qaaday duqeymo cusub oo ka dhan ah Iiraan, iyadoo Trump uu ka digay aargoosiga dilki askarta Maraykanka

Tebin toos ah

1. 26 Daqiiqadood ka horIiraan oo codsi iyo farriin u dirtay dunida

   

   Xigashada Sawirka, Tasnim news agency

   Iiraan ayaa ugu baaqday beesha caalamka in aysan u dulqaadan wax weerar ah oo lagu qaado xarumaha nukliyeerka ee loo isticmaalo ujeeddooyin nabadeed, iyadoo sheegtay in ilaalinta xarumahaas ay tahay mas’uuliyadda beesha caalamka oo dhan.

   Bayaan ay soo saartay Ergada Iiraan u qaabilsan Hay’adda Caalamiga ah ee Tamarta Nukliyeerka (IAEA), ayay ku sheegtay in Mareykanku subaxnimadii 18-ka Luulyo uu gantaallo ku garaacay goobta dhismaha warshadda tamarta nukliyeerka ee Karun (Darkhovin).

   Bayaanku wuxuu xarunta ku tilmaamay “astaan muujinaysa sharafta iyo isku-filnaanshaha cilmiyeed ee shacabka Iiraan.”

   Waxay intaas ku dartay in inkastoo Iiraan ay diyaar u tahay inay qaaddo dhammaan tallaabooyinka lagama maarmaanka u ah ilaalinta danaha qarankeeda iyo xuquuqdeeda madaxbannaanida, haddana ka hortagga weerarrada lagu qaado xarumaha nukliyeerka ee hoos yimaada kormeerka IAEA ee loo adeegsado ujeeddooyin nabadeed ay tahay mas’uuliyad saaran beesha caalamka oo dhan.

   Dhanka kale, Taliska Dhexe ee Mareykanka (CENTCOM) ayaa sheegay inuu weeraray dhowr goobood oo militari oo ku yaalla Iiraan, oo ay ku jiraan saldhigyada gantaallada, diyaaradaha aan duuliyaha lahayn (drones), iyo hantida ciidamada badda ee Ilaalada Kacaanka Islaamiga ah (IRGC), balse ma uusan xusin xarunta Darkhovin.

   Dhankeeda, IAEA waxay sheegtay inay baarayso wararka sheegaya in warshadda tamarta nukliyeerka ee Darkhovin ee dhismaheedu socdo la weeraray, hase yeeshee weli ma aysan soo saarin warbixin madax-bannaan oo xaqiijinaysa waxa dhacay.

   Sidoo kale akhri

   Lacag intee la eg ayaa la siiyaa cidda Koobka Adduunka ku guuleysata?

   walaalka yar ee Lamine Yamal ee indhaha caalamka soo jiitay iyo dabaaldagii uu xalay sameeyay

   Lix-iyo-toban koob muddo shan sano ah; sidee ayay kubadda cagta Isbaanishku u noqotay mid aan lala tartami karin?

2. Saacad ka horIiraan oo weerartay markab shidaal oo marayay Marinka Hormuz

   

   Xigashada Sawirka, Getty Images

   Iiraan ayaa weerartay markab shidaal oo marayay Marinka Hormuz, taas oo ku qasabtay shaqaalihii markabka inay ka baxsadaan, iyadoo uu weli socdo loollanka lagu doonayo in lagu xakameeyo marin-biyoodkaas.

   Ilaalada Kacaanka ee Iiraan ayaa sheegay inay sidoo kale weerareen goobaha difaaca cirka ee Maraykanku ku leeyahay Baxrayn iyo Kuweyt.

   Dhanka kale, ciidamada Maraykanka ayaa fuliyay habeenkii tobnaad oo xiriir ah weerarro cirka ah, kuwaas oo looga gol lahaa in lagu wiiqo awoodda Iiraan ee ay ku carqaladayn karto maraakiibta maraysa badda.

   Iyadoo dagaalladu sii xoogaysanayaan, dhexdhexaadiyeyaashu waxay laba jibaareen dadaallada lagu soo nooleynayo heshiiskii ku-meelgaarka ahaa ee nabadda ee la gaaray bishii hore.

   Wasiirka Arrimaha Gudaha ee Iiraan ayaa u safray Baakistaan si uu halkaas ugala yeesho wadahadallo.

   Sidoo kale akhri

   Xuutiyiinta Yemen oo ku dhawaaqay 'go'doomin dhanka badda ah' oo lagu soo rogay Sacuudi Carabiya

   Waa kuma Khalil al-Xayya, ninka ay Xamaas u magacowday hoggaamiyaheeda guud?

   Trump oo xaqiijiyay in Iiraan si xooggan loo duqeynayo taas oo aargoosi u ah askarta Mareykanka ee la dilay

3. 2 Saacadood ka horLacagta la siiyay Argentina waa imisa?

   

   Xigashada Sawirka, Getty Images

   Spain ayaa si xarago leh ugu guuleysatay Koobka Adduunka. Laakiin dad badan ayaa isweydiinaya talow lacag intee le’eg ayay ka helayaan guushaas?

   Waxay sidoo kale gurigeeda ula laabatay in ka badan 51 milyan oo doollar. Taasina waa ka hor inta aan ciyaartoydu helin gunnooyinkooda.

   Kadib 120 daqiiqo oo aad u adkaa oo lagu ciyaaray garoonka MetLife Stadium, ayuu Ferran Torres ku ayaa noqday geesiga Spain isagoo dhaliyay daqiiqaddii 106-aad ee waqtiga dheeriga ahaa, isla markaana u horseeday Spain koobkeedii labaad ee Koobka Adduunka, 16 sano kadib guushii ay ka gaartay Koonfur Afrika sannadkii 2010.

   Koobka marka laga tago, Spain waxay gurigeeda ula laabatay in ka badan 51 milyan oo doollar. Xiriirka kubadda cagta Spain ayay FIFA akoon ugu shubaysaa lacagtaas oo ah tii ugu badnayd ee abid la siiyo waddan ku guuleysta Koobka Adduunka.

   Sannadkan, FIFA waxay sidoo kale soo bandhigtay abaalmarin cusub.

   Markii ugu horreysay taariikhda, ayaa la guddoonsiiyay faraanti ka sameysan dahab saafi ah oo 18 karat ah, laguna qurxiyay dheeman iyo dhagaxyo sayfar ah. Madaxweynaha FIFA, Gianni Infantino, ayaa 30 ka mid ah faraantiyadan guddoonsiiyay ciyaartoyda iyo tababarayaasha Spain.

   Dhanka Argentina, guuldarradu waxay u ahayd mid aad u xanuun badan laakiin ay ku heleen abaalmarin dhan 34 milyan oo doollar oo kaalinta labaad ah.Lacagta

   England ayaa iyaduna kaalinta 3aad tartanka kusoo gabagabeysay si xarago leh. Waxay 6-4 kaga adkaatay France, taasoo ay ku heleen qiyaastii 30 milyan oo doollar, isla markaana noqotay natiijadoodii ugu fiicneyd ee Koobka Adduunka ay ka gaaraan tan iyo markii ay ku guuleysteen sanadkii 1966.

   Lacagta abaalmarinta ee laga heli karo Koobka Adduunka 2026 waa $871 milyan (£662 milyan), waana tii ugu badnayd abid.

   FIFA waxay markii hore ku dhawaaqday in wadarta lacagta abaalmarintu ay noqon doonto $727 milyan (£552 milyan), taas oo horeba u ahayd koror 50%, marka loo eego lacagtii la bixiyay tartankii Koobka Adduunka 2022 ee Qadar.

   Laakiin bishii Abriil waxay ansixiyeen kordhin kale oo lagu sameeyay wadarta lacagta, iyagoo kordhiyay lacagta aasaasiga ah ee ka qaybgalka iyo kharashka diyaar-garowga, taas oo wadarta gaadhsiisay lacagta cusub.

   Lacagta abaalmarinta waxa loo qaybiyaa abaalmarinno ku salaysan waxqabadka iyo taageero dhaqaale oo aan ku salaysnayn waxqabadka.

   Sidoo kale akhri

   Lacag intee la eg ayaa la siiyaa cidda Koobka Adduunka ku guuleysata?

   walaalka yar ee Lamine Yamal ee indhaha caalamka soo jiitay iyo dabaaldagii uu xalay sameeyay

   Lix-iyo-toban koob muddo shan sano ah; sidee ayay kubadda cagta Isbaanishku u noqotay mid aan lala tartami karin?

4. 2 Saacadood ka horKu dhowaad 100 ciidamo Mareykanka ah oo lagu dhaawacay weerarada Iiraan

   

   Xigashada Sawirka, US Central Command

   Saraakiil Maraykan ah ayaa u sheegay warbaahinta CBS oo ay bah-wadaag yihiin BBC-da, in ku dhowaad 100 askari oo ka tirsan ciidamada Maraykanka ay dhaawacmeen ka dib weerarro dhowr ah oo dhinaca cirka ah oo ay Iiraan ku qaaday saldhigyada Maraykanka ee Bariga Dhexe bishan.

   Sean Parnell, oo ah afhayeen sare oo ka tirsan Wasaaradda Difaaca Maraykanka (Pentagon), ayaa xaqiijiyay tiradaas isagoo xogtan la wadaagay CBS News

   Wuxuu sheegay in ilaa 7-da Luulyo 2026, ku dhowaad 100 qof ay soo gaareen "heerar kala duwan oo dhaawacyo ah," halka 96% ka mid ah ay dib ugu laabteen shaqadoodii ciidamada.

   Afhayeen u hadlay Pentagon-ka ayaa yiri:

   "Waxay muujiyeen go'aan adag oo ay ugu laabanayaan howlaha ciidanka. Inta badan dhaawacyada soo gaarayna waxay ahaayeen gariir ama jug ka soo gaartay dhanka oo fudud.

   Dhaawacyadan ayaa la soo sheegay xilli ay sii kordhayaan xiisadaha u dhexeeya Maraykanka iyo Iiraan, kadib burburkii xabbad-joojin socotay bilooyin badan.

   Ciidamada Maraykanka ayaa sheegay inay muddo 10 habeen oo xiriir ah weerarro ku hayeen bartilmaameedyo ku yaalla Iiraan, iyagoo sheegay in ujeeddadu tahay in laga hortago weerarrada Iiraan ay ku beegsanayso maraakiibta ganacsiga.

   Dhankeeda, Iiraan ayaa weerarro ku qaaday saldhigyada Maraykanka ee ku yaalla Urdun, Kuweyt, Baxrayn, iyo dalal kale oo xulafo la ah Maraykanka oo ku yaalla gobolka.

   Sida ay sheegeen Pentagon-ka iyo hadallo laga soo xigtay Donald Trump, weerarradan ayaa ilaa hadda sababay ugu yaraan afar dhimasho.

   Sidoo kale akhri

   Xuutiyiinta Yemen oo ku dhawaaqay 'go'doomin dhanka badda ah' oo lagu soo rogay Sacuudi Carabiya

   Waa kuma Khalil al-Xayya, ninka ay Xamaas u magacowday hoggaamiyaheeda guud?

   Trump oo xaqiijiyay in Iiraan si xooggan loo duqeynayo taas oo aargoosi u ah askarta Mareykanka ee la dilay

5. 3 Saacadood ka horDagaal dhex maray ciidamo ka tirsan dowladda federaalka Soomaaliya iyo kuwa Puntland

   

   Xigashada Sawirka, Ciidamada PSF

   Wararka ka imaanaya degmada Laag ayaa sheegaya inu halkaas iska hor imaad ku dhex maray ciidamo la sheegay inay ka tirsan yihiin dowladda federaalka ee Soomaaliya iyo kuwa Puntland.

   Wararka ayaa sheegaya in ciidamadan la sheegay inay ka tirsan yihiin dowladda federaalka ay shalay ka soo baxeen magaalada Bosaaso, balse lagu hor istaagay degmada Laag, taas oo 30 kilomitir u jirta magaalada Bosaaso .

   Khasaare kooban ayaa ka dhashay iska hor imaadka dhex maray labada dhinac.

   Xogo aan ka helnay saraakiil ka tirsan ciidamada amaanka Puntland ayaa sheegaya, in hal qof uu ku dhintay dhowr kalena ay ku dhaawacmeen dagalka isla markaana ay ciidamada Puntland la wareegeen gaadiidkii ay wateen ciidankaas federaalka oo ay ku safrayeen.

   Ciidamadan lagu hor istaagay Laag ayay wararku sheegayaan inay ku sii jeedeen magaalada Gaalkacyo, iyagoo ku safrayay wadada dheer ee isku xirta Bosaaso ilaa iyo Galkacyo.

   Ilo xog ogaal ah ayaa sheegay in ciidamadan ay ku jeedeen magaalada Gaalkacyo, halkaas oo ay doonayeen inay ka soo qaadaan saraakiil kale oo iyaga ka tirsan.

   BBC-du weli wx xog ah kama helin dhanka dowladda federaalka oo lagu xaqiijinayo dagaalkan dhacay.

   Weli waan la xiriireynaa dowladda, hadii aan jawaabtooda helno, waa idiin soo gudbin doonaa.

6. 3 Saacadood ka horWaa imisa lacagta la siiyo wadanka ku guuleysta Koobka Adduunka?

   

   Xigashada Sawirka, Getty Images

   Lacagta abaalmarinta ee laga heli karo Koobka Adduunka 2026 waa $871 milyan (£662 milyan), waana tii ugu badnayd abid.

   FIFA waxay markii hore ku dhawaaqday in wadarta lacagta abaalmarintu ay noqon doonto $727 milyan (£552 milyan), taas oo horeba u ahayd koror 50%, marka loo eego lacagtii la bixiyay tartankii Koobka Adduunka 2022 ee Qadar.

   Laakiin bishii Abriil waxay ansixiyeen kordhin kale oo lagu sameeyay wadarta lacagta, iyagoo kordhiyay lacagta aasaasiga ah ee ka qaybgalka iyo kharashka diyaar-garowga, taas oo wadarta gaadhsiisay lacagta cusub.

   Lacagta abaalmarinta waxa loo qaybiyaa abaalmarinno ku salaysan waxqabadka iyo taageero dhaqaale oo aan ku salaysnayn waxqabadka.

   Haddaba, sidee ayaa loo kala qaybiyaa abaalmarinnada?

   Abaal-gudka qaab ciyaareedka ku saleysan

   Kooxuhu mar kasta oo ay meel fog ka gaadhaan tartanka, waxay helayaan abaalmarin dhaqaale oo intaas ka badan.

   Fifa waxay kooxaha ku dhammaysanaya boos kasta u kala abaalmarin doontaa sidatan:

   • Guuleystayaasha (Koobka):$51m (£38m)
   • Kaalinta labaad:$34m (£25m)
   • Kaalinta 3-aad: $30m (£22m)
   • Kaalinta 4-aad:$28m (£20m)#
   • Kaalinta 5-aad ilaa 8-aad:$20m (£14m)
   • Kaalinta 9-aad ilaa 16-aad: $16m (£11m)
   • Kaalinta 17-aad ilaa 32-aad: $12m (£8m)
   • Kaalinta 33-aad ilaa 48-aad:$10m (£7m)

   Lacagahan la bixinayo waxay qayb ka yihiin $703m oo ka mid ah $871m oo si guud loo qoondeeyey sanduuqa abaalmarinta, iyadoo $168m (£152m) ee soo hartayna loo qaybin doono kooxaha iyado aan la fiirinayn qaab-ciyaareedkooda iyo natiijada ay keenaan.

   Sii akhri

7. 4 Saacadood ka horIsraa’iil oo xarig ugu hanjabtay duqa New York

   

   Xigashada Sawirka, Getty Images

   Danjiraha Israa'iil u fadhiya Qaramada Midoobay, Danny Danon ayaa ka hadlay hadal uu dhawaan yiri duqa magaalada New York, Zohran Mamdani.

   Mamdani, ayaa dhawaan sheegay in talada ay ku jirto suurtagalnimada in la xiro Ra'iisul Wasaaraha Israa'iil, Benjamin Netanyahu, marka uu yimaado New York si uu uga qaybgalo shirka Qaramada Midoobay.

   Dony ayaa sheegay in tallaabadan ay tahay isku day lagu marin habaabinayo dareenka shacabka, si looga jeediyo fashilka duqa magaalada.

   “Qofka ay tahay in la xiro ma aha Ra'iisul Wasaarahayaga; waa adiga, Mudane Mamdani. Haddaba aan arrinta si cad u sheego. Waa isla duqii magaaladaas oo komishinarkiisa isku dayay inuu la kulmo wakiilka Iiraan u jooga Qaramada Midoobay, xilli Maraykanku dagaal kula jiray isla nidaamkaas shar-wadayaasha. Nasiib wanaag, Wasaaradda Arrimaha Dibadda ee Maraykanka ayaa arrintaas joojisay.

   Isagoo hadalkiisa sii wata ayaa waxaa uu yiri:

   “Waa isla duqii magaaladaas oo u baroordiiqay xubin ka tirsanaa Xamaas, kuna tilmaamay saxafi rayid ah oo aan waxba galabsan. Waa isla duqii magaaladaas oo weli sii hurinaya naceybka ka dhanka ah Yuhuudda ee ka jira guud ahaan New York”.

   “Haddana waa isla duqii magaaladaas oo ku hanjabaya inuu xiro Ra'iisul Wasaaraha Israa'iil, isagoo adeegsanaya awood uusan lahayn. Ra'iisul Wasaare Netanyahu wuu iman doonaa New York, wuxuu ka hadli doonaa isla madashan. Wuxuu ku hadli doonaa magaca Dowladda Israa'iil. Wuxuu difaaci doonaa shacabka Israa'iil, mana jirto wax aad samayn karto oo aad uga hor istaagi karto”, ayuu hadalkiisa ku soo gabagabeeyay.

   Duqa magaalada New York, Zahran Mamdani, ayaa sheegay in talada ay ku jirto suurtagalnimada in la xiro Ra'iisul Wasaaraha Israa'iil Benjamin Netanyahu marka uu yimaado New York si uu uga qaybgalo shirka Qaramada Midoobay.

   Isagoo Sabtidii ka hadlayay barnaamijka 'podcast'-gaa ee wargeyska The New York Times, Mamdani wuxuu sheegay in xafiiskiisu uu eegayo tallaabooyin suurtagal ah oo lagu xiri karo "dambiilaha dagaalka" marka uu yimaado magaalada New York bisha Sebtembar.

   Mamdani wuxuu ballan-qaadkan sameeyay xilligii ololihiisa doorashada.

   Sidoo kale akhri

   Suuragalnimada in Nentanyahu lagu xiro New York marka uu yimaado September oo la bidhaamiyay

   Xuutiyiinta Yemen oo ku dhawaaqay 'go'doomin dhanka badda ah' oo lagu soo rogay Sacuudi Carabiya

   Lix-iyo-toban koob muddo shan sano ah; sidee ayay kubadda cagta Isbaanishku u noqotay mid aan lala tartami karin?

8. 5 Saacadood ka horwalaalka yar ee Lamine Yamal ee indhaha caalamka soo jiitay iyo dabaaldagii sameeyay

   Inkastoo ciyaaryahanka reer Spain ee Lamine Yamal uu qaaday Koobka Adduunka, haddana walaalkiis yar ee Kenye ayaa u muuqda inuu soo jiitay dareenka dadweynaha.

   Wiilkan saddex-jirka ah ayaa si degdeg ah caan uga noqday internet-ka ka dib markii muuqaallo laga duubay isagoo si xamaasad leh u dabaaldegaya guushii 1-0 ahayd ee Spain ay ka gaartay ciyaartii Argentina ay Axaddii ku faafeen baraha bulshada.

   Iyadoo Yamal, oo isaguna 19 jir ah, uu sii waday guulihiisa isagoo ka caawinaya Spain inay ku guuleysato abaalmarinta ugu weyn kubadda cagta, ayaa dareenka dadku si degdeg ah ugu wareegay falcelinta farxadda leh ee walaalkiis yar oo garoonka dhinaciisa ka daawanayay ciyaarta.

   Laga soo bilaabo inuu carrabka soo saaro isagoo shaashadda weyn ka muuqda ilaa uu si xooggan u dhiirrigeliyo walaalkiis ka weyn, Kenye waxaa taageerayaashu ku tilmaameen mid ka mid ah xiddigaha aan la filayn ee sida lama-filaanka ah u soo shaac-baxay tartankii 2026-ka.

   Spain ayaa guul ka gaartay tartan adag oo u baahday dulqaad iyo adkaysi, iyadoo Argentina kaga badisay gool la dhaliyay daqiiqaddii 106-aad ee ciyaarta oo ka dhacday garoonka New York New ee Jersey Stadium.

   Guushan oo ahayd tii labaad ee kooxdu ku guuleysato Koobka Adduunka ayaa ka dhigtay Yamal ciyaaryahankii ugu da'da yaraa ee abid ku guuleysta labadaba Koobka Qaramada Yurub iyo Koobka Adduunka.

   Walaalkiis yar ee Kenye ayaa noqday qof si joogto ah uga dhex muuqda garoonka dhexdiisa iyo dibaddiisaba - isagoo inta badan ka soo muuqda muuqaallada TikTok-ga ee Yamal, isla markaana soo jiita taageerayaasha daafaha dunida.

   Sii akhri

9. 21 Luulyo 2026Madaxda caalamka oo hambalyo u diray Andy Burnham

   Madaxweynaha Ukraine, Volodymyr Zelensky, Madaxweynaha Faransiiska, Emmanuel Macron iyo Madaxweynaha Maraykanka, Donald Trump ayaa ka mid ah hoggaamiyeyaasha caalamka ee Raysalwasaaraha cusub ee Britain, Andy Burnham, la hadlay maalintiisii ugu horreysay ee uu xilka qabtay.

   Sida uu sheegay xafiiska Downing Street, Burnham ayaa galinkii dambe ee maanta la hadlay Zelensky, isagoo dib u xaqiijiyay isaga iyo Boqortooyada Midowday in ay si adag u garab taagan yihiin shacabka Ukraine.

   Afhayeen u hadlay Downing Street ayaa sidoo kale sheegay in Burnham uu Zelensky ku casuumay inuu booqdo Boqortooyada Midowday “fursadda ugu horreysa ee suurtagalka ah”.

   Fiidnimadii ayuu Burnham sidoo kale la hadlay Macron, isagoo sheegay inuu sii xoojin doono xiriirka adag ee u dhexeeya Britain iyo Faransiiska. Downing Street ayaa sheegtay in labada hoggaamiye ay ka wada hadleen taageerada Ukraine, dib u furista marin-biyoodka Hormuz iyo iskaashiga dhinacyada tamarta iyo difaaca.

10. 21 Luulyo 2026War deg deg ah, Ciidammada Maraykanka oo ku dhawaaqay weerarro cusub oo lagu qaaday Iiraan

    Taliska Dhexe ee Ciidamada Maraykanka (CENTCOM) ayaa daqiiqado ka hor ku dhawaaqay in ciidammada Maraykanku ay bilaabeen wareeg cusub oo weerarro ah oo lagu beegsanayo bartilmaameedyo ku yaalla Iiraan, iyagoo fulinaya amar uu bixiyay Madaxweynaha Maraykanka ahna Taliyaha Guud ee Ciidammada, Donald Trump.

    Sida uu sheegay CENTCOM, ujeeddada weerarradan ayaa ah in la wiiqo awoodda millatari ee Iiraan, taas oo uu ku eedeeyay in loo adeegsanayo weerarrada lagu qaado maraakiibta ganacsiga ee marinka Hormuz.

    Ku dhawaaqista CENTCOM ayaa timid daqiiqado kaddib markii warar ka soo baxay Iiraan ay sheegeen in qaraxyo laga maqlay agagaarka magaalooyinka Bandar Abbas iyo Sirik.

11. 21 Luulyo 2026Angela Rayner oo loo magacaabay xoghayaha arrimaha guryeynta.

    Angela Rayner ayaa loo magacaabay xoghayaha arrimaha guryeynta ee xukuumadda Andy Burnham. Waxay xil hore uga soo qabatay dowladdii Keir Starmer.

    Waxay iska casishay xilalkii raysalwasaare ku xigeenka iyo xoghayaha arrimaha guryeynta bishii Sebtembar 2025.

12. 20 Luulyo 2026Maxaan ka og nahay weerarrada Maraykanku uu ku qaaday marinnada gaadiidka ee Bandar Abbas?

    Burburka ka dhashay weerarrada Mareykanka kuma ekayn oo kaliya bartilmaameedyada ku yaalla xeebta koonfureed ee Iiraan. Todobaadkii la soo dhaafay, warbaahinta Iran waxay sheegtay in lix buundo la duqeeyay kuwaas oo ku yaalla magaalada 'Khamir' ee gobolka Hormozgan saacadaha hore ee Jimcihii, July 17.

    Habeennimadii Jimcaha ee isla maalintaas, warbaahinta ayaa mar kale sheegtay in labo god iyo labo buundo lagu weeraray gobolka Hormozgan.

    Warbaahinta Iiraan iyo mas'uuliyiinta dawladda hoose waxay sheegeen in weerarrada Mareykanku ay bartilmaameadsadeen xarumaha korontada, meelaha biyaha lagu sifeeyo, buundooyinka, waddooyinka iyo khadadka tareenka ee koonfurta Iiraan.

    Afhayeen u hadlayay Aqalka Cad oo ka jawaabayay su'aal ay weyddiisay BBC-da, ayaa diiday in kaabayaasha dhaqaalaha ee rayidka la bartilmaameadsaday, isaga oo intaas raaciyay weerarrada ka dhan ah Iiraan in Washington uga gol leedahay in la wiiqo awoodaha millatari iyo gaadiid ee Ciidanka ilaalada Kacaanka.

13. 20 Luulyo 2026Urdun oo qabatay saddex gantaal oo laga soo riday Iiraan

    Telefishinka dawladda Urdun ayaa sheegay in ciidammada qalabka sida ee dalkaasi ay qabteen saddex gantaal oo laga soo riday Iiraan.

    Tan iyo markii uu billowday wareegga cusub ee iska horimaadyada u dhexeeya Iiraan iyo Maraykanka, Urdun waxay noqotay mid ka mid ah meelaha ugu waaweyn ee ay beegsadaan weerarrada Ciidanka Ilaalada Kacaanka Islaamiga ah ee Iiraan.

    Wargeyska The New York Times oo soo xiganaya sarkaal ka tirsan millitariga Maraykanka ayaa sheegay in tobannaan askari ay ku dhaawacmeen, islamarkaana dhowr diyaaradood oo nooca qummaatiga u kaca ah ay waxyeello ka soo gaadhay weerarradii ay Iiraan toddobaadkii hore ku qaadday saldhig millatari oo Maraykanku ku leeyahay Urdun.

14. 20 Luulyo 2026Madaxweyne Trump: Iiraan "waa ay ka qoomamayn doontaa" haddii la dilo askari qudha oo Mareykan ah

    Madaxweynaha Mareykanka Donald Trump ayaa sheegay in Iiraan ay bixin doonto qiimo labanlaaban haddii ay disho askari Mareykan ah.

    Qoraal uu Isniintii ku daabacay bartiisa Truth Social ayuu Madaxweyne Trump ku sheegay in uu tilmaamahan u gudbiyay Wasiirka Dagaalka Pat Hegseth, Madaxa Taliyeyaasha Iskudhafka ah ee Ciidanka Mareykanka Dan Kaine, iyo dhammaan saraakiisha ciidanka.

15. 20 Luulyo 2026Trump: Marnaba Maraykanka lagu ma xidhi karo Netanyahu

    

    Xigashada Sawirka, Getty Images

    Madaxweynaha Mareykanka Donald Trump ayaa sheegay in Raysalwasaaraha Israa'iil Netanyahu aan si walba oo ay tahay loo xidhi doonin inta uu ku sugan yahay dalka Mareykanka.

    Qoraal uu ku daabacay bartiisa bulshada ee Truth Social, ayuu Madaxweyne Trump ku sheegay in Netanyahu uu dagaal kula jiro Iiraan oo ah tii dhowaan dishay 52,000 oo dibad-baxayaal ah oo aan waxba galabsan, islamarkaana muddo 47 sano ah wadday dilka askarta Mareykanka iyo dad kale.

    Wuxuu sheegay in haddii cid la xidhayo ay tahay oo keliya in la xidho dadkii Iiraan u horseeday dhibaatadan ba'an ee dhimashada iyo burburka leh.

    Waxaa xusid mudan in Maayarka Magaalada New York, Zohran Mamdani uu sheegay in xafiiskiisu uu raadinayo talo sharci oo ku saabsan xadhigga Netanyahu marka uu yimaaddo kulanka Qaramada Midoobay.

16. 20 Luulyo 2026Iran ayaa ku eedeysay Mareykanka in uu dagaal weyn u diyaargaroobayo isagoo dhanka kalena nabad sheegaya

    

    Xigashada Sawirka, REUTERS

    Madaxweynaha Iran Masoud Pezeshkian ayaa sheegay in Iran ay "dagaal buuxa" kula jirto Maraykanka, halka Baxrayn ay ku eedeysay Tehran in ay bartilmaameedsatay qalabka hagista duulimaadyada rayidka.

    "Xaqiiqdu waxay tahay in Jamhuuriyadda Islaamiga ah ee Iran ay ku jirto dagaal buuxa", ayaa lagu yiri qoraal ka soo baxay xafiiska madaxweynaha oo intaas ku daray, “Waa in aan xaqiiqada wajahnaa oo aan aqbalnaa cawaaqibka ka dhalanaya iska caabbintan."

    Dhanka kale, afhayeenka baarlamaanka Iran, Mohammad Baqer Qalibaf, ayaa ku eedeeyay Maraykanka in uu iska dhigayo dal nabad raba hadana oo uu dhanka kale xoojinayo militeriga u jooga gobolka.

    Mr. Qalibaf, oo ah madaxa wada-xaajoodyada Iran ee Maraykanka, ayaa bartiisa X ku qoray sidan, "Maraykanku si joogto ah ayuu gobolka u keenayaa qalab militari oo cusub, isagoo haddana sheeganaya in uu doonayo in dagaalka la joojiyo. Waxay ku tiirsan yihiin sirdoonkooda iyo garaadkooda xaddidan. Annaguna waxaan gaarnay heer aan si buuxda u garan karno xeeladahooda, waxaana u diyaargarownay. Ficilladu iyo hadallada waa in aysan iska hor’imaan”.

    Hadalka Qalibaf ayaa soo baxay xilli qaar ka mid ah warbaahinta Maraykanka ay sheegayaan in Maraykanku uu gobolka u dirayo diyaarado dagaal oo dheeraad ah, iyadoo lagu tilmaamay in ay qayb ka yihiin diyaar-garowga "dagaal buuxa" oo ka dhan ah Iran.

    Sidoo kale akhriso

    Sida uu Lamine Yamal heerkan kusoo gaaray iyo maca-salaameynta Messi

    Masar iyo Eritrea oo cambaareeyay "isku-dayada lagu doonayo in si sharci-darro ah lagu maamulo Badda Cas"

    Lacag intee la eg ayaa la siiyaa cidda Koobka Adduunka ku guuleysata?

17. 20 Luulyo 2026Toban qof ayaa ku geeriyooday markab ganacsi oo lagu weeraray Badda Madow

    

    Xigashada Sawirka, Andrii Sybiha

    Tirada dadka ku dhintay weerar Ruushku ku qaaday markab xamuul oo ku sugnaa meel ka baxsan xeebta magaalada Odesa ee dalka Ukraine ayaa gaartay 10 qof.

    Ciidanka cirka ee Ukraine ayaa sheegay in markabka, oo watay calanka dalka Guinea-Bissau, lagu dhuftay gantaallo Ruushku soo riday maalintii Axadda, taas oo sababtay in uu dab qabsado markabka.

    Hawlgal baadi-goob iyo samatabixin ah ayaa isla markiiba la bilaabay, wuxuuna socday habeenkii oo dhan.

    Hay'adda dekedaha ee Ukraine ayaa saakay sheegtay in sagaal ka mid ah shaqaalaha markabka ay dhinteen, sidoo kalena uu geeriyooday mid ka mid ah shaqaalaha haga maraakiibta ee dekedda.

    Weerarrada Ruushka ee lagu beegsanayo maraakiibta xamuulka ee maraya Badda Madow ayaa sidoo kale sii kordhay.

    Weerarkii Axaddii lagu qaaday markabka Golden Leo, oo watay calanka Guinea-Bissau, ayaa noqday kii ugu dhimashada badnaa.

    Sidoo kale akhriso

    Sida uu Lamine Yamal heerkan kusoo gaaray iyo maca-salaameynta Messi

    Masar iyo Eritrea oo cambaareeyay "isku-dayada lagu doonayo in si sharci-darro ah lagu maamulo Badda Cas"

    Lacag intee la eg ayaa la siiyaa cidda Koobka Adduunka ku guuleysata?

18. 20 Luulyo 2026Xuutiyiinta ayaa ku dhawaaqay in ay “badda ka go’doominayaan” Sacuudiga

    

    Xigashada Sawirka, bbc

    Xuutiyiinta Yemen ayaa sheegay in ay ku soo rogeen go'doomin dhinaca badda ah Sacuudiga. Qoraal ay soo saareen kooxda ayaa lagu sheegay in go'doomintaasi ay ku salaysan tahay mabda'a "In aan ku sameyno wixii ay nagu sameeyeen" isla markaana si degdeg ah loo dhaqan gelin doono.

    Xiisadda u dhexeysa labada dhinac ayaa sii korortay tan iyo markii Sacuudigu ay isku dayeen in ay ka hor istaagto diyaarad laga leeyahay Iran in ay ka degto Garoonka Caalamiga ah ee Sanca.

    Dhanka kale, Iran iyo Maraykanka ayaa muujiyay calaamado ah in ay diyaar u yihiin xal diblomaasiyadeed, iyagoo weli sii wada weerarrada ay is-weydaarsanayaan.

    Iran ayaa sheegtay in ay heshay soo jeedinno ka yimid dhexdhexaadiyeyaal, waxaana la filayaa in wasiirka arrimaha gudaha ee Jamhuuriyadda Islaamiga uu maanta booqdo Pakistan.

    Sidoo kale akhriso

    Sida uu Lamine Yamal heerkan kusoo gaaray iyo maca-salaameynta Messi

    Masar iyo Eritrea oo cambaareeyay "isku-dayada lagu doonayo in si sharci-darro ah lagu maamulo Badda Cas"

    Lacag intee la eg ayaa la siiyaa cidda Koobka Adduunka ku guuleysata?

19. 20 Luulyo 2026Khalil al-Hayyah ayaa loo doortay hoggaamiyaha cusub ee Xamaas

    

    Xigashada Sawirka, Reuters

    Ururka Xamaas ayaa u magacowday in uu noqdo hoggaamiyahooda cusub Khalil al-Hayya, oo hore u ahaa madaxa wadaxaajoodyada ururka.

    Waa qofkii ugu horreeyay ee loo magacaabo jagadan tan iyo markii Yahya Sinwar ay ciidamada Israel ku dileen Gaza laba sano ka hor. Waxaa la sheegay in doorasho gudaha ah ay ka dhacday Gaza, Daanta Galbeed ee la haysto iyo meelo kale oo xubno ku sugnaayeen.

    Inta badan hoggaanka sare ee Xamaas waxaa lagu dilay duqeymo ay Israel fulisay kaddib weerarradii dadka badan ku dhinteen ee dhacay intii uu socday dagaalka.

    Mr. Al-Hayyah waxa uu ku dhashay sanadkii 1960-kii Daanta Galbeed, wuxuuna xubin ka ahaa Xamaas laga soo bilaabo markii la asaasay sanadkii 1987-dii.

    Sidoo kale akhriso

    Sida uu Lamine Yamal heerkan kusoo gaaray iyo maca-salaameynta Messi

    Masar iyo Eritrea oo cambaareeyay "isku-dayada lagu doonayo in si sharci-darro ah lagu maamulo Badda Cas"

    Lacag intee la eg ayaa la siiyaa cidda Koobka Adduunka ku guuleysata?

20. 20 Luulyo 2026New York Times: Tobanaan askari oo Mareykan ah ayaa ku dhaawacmay weerarkii Iran ee Urdun, dhowr helikobtarna waxyeelo ayaa soo gaartay

    

    Xigashada Sawirka, Getty Images

    New York Times oo soo xiganeysa sarkaal Mareykan ah ayaa sheegtay in tobanaan askari ay dhaawacmeen iyadoo dhowr helikobtarna ay waxyeelo ka soo gaartay weerarada Iran ee lagu qaaday saldhiga militeriga Mareykanka ee Urudun toddobaadkii la soo dhaafay.

    Wargeyska oo xiganaya ilo militeri ayaa shegay in saddex weerar oo kale oo la mid ah kuwan ay dhaceen ka hor weerarkii Iran ee Jimcihii, kaas oo ay ku dhinteen saddex askari oo Maraykan ah.

    Sarkaalka militeriga Mareykanka ee ka hadlay arrintan oo magaciisa aan la sheegin ayaa sheegay in aan Taliska Dhexe ee Mareykanka looga baahneyn in uu soo saaro macluumaad ku saabsan askarta dhaawacmay hadii ay degdeg uga soo laabanayaan shaqada.

    Sarkaal kale oo sare oo ka tirsan milatariga Maraykanka ayaa u sheegay The New York Times, “Maxay Wasaaradda Difaaca Maraykanka u soo saareysaa macluumaad ka caawin kara Iran in ay si ka saxsan u beegsato bartilmaameedkeeda iyo weerarradeeda diyaaradaha aan duuliyaha lahayn ee dilaaga ah ee ka dhanka ah Urdun iyo saldhigyada kale ee Maraykanka ee Bariga Dhexe, halkaas oo kumannaan askari oo Maraykan ah ay ku sugan yihiin?”

    Sida uu sheegay taliska dhexe ee ciidamada Mareykanka in ka badan 400 oo askari oo Maraykan ah ayaa ilaa hadda ku dhaawacmay iska dagaalka lagula jiro Iran.

    Dhanka kale, war ay soo saareen, Ciidanka Ilaalada Kacaanka Iran ayaa “uga mahadceliyay” “shacabka Urdun” “macluumaad sax ah oo ku saabsan 20 god oo difaac ah oo ay ku sugan yihiin ciidamada Maraykanka.”

    Sidoo kale akhriso

    Sida uu Lamine Yamal heerkan kusoo gaaray iyo maca-salaameynta Messi

    Masar iyo Eritrea oo cambaareeyay "isku-dayada lagu doonayo in si sharci-darro ah lagu maamulo Badda Cas"

    Lacag intee la eg ayaa la siiyaa cidda Koobka Adduunka ku guuleysata?