ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
ඊශ්රායල-ඇමරිකානු ප්රහාරයකින් සිය බුද්ධි අංශ ප්රධානියා මිය ගිය බව IRGC පවසයි
ඉරානයේ ඉස්ලාමීය විප්ලවවාදී ආරක්ෂක බලකාය (IRGC) ඔවුන්ගේ බුද්ධි අංශ ප්රධානී මජිඩ් කදෙමි ඝාතනය වූ බව ඉරාන ප්රවෘත්ති ආයතන විසින් ප්රසිද්ධ කරන ලද ප්රකාශයකින් ප්රකාශයට පත් කර තිබේ.
අද (අප්රේල් 06) උදෑසන ඔහු ඝාතනයට ලක් වූ බව එම ප්රකාශයේ සඳහන් වන අතර ඊශ්රායලය සහ එක්සත් ජනපදය ඔහු ඉලක්ක කරමින් සිටි බවට චෝදනා කර තිබේ.
දින 12 ක ඉරාන-ඊශ්රායල යුද්ධයේදී 2025 ජුනි 15 වන දින ඊශ්රායල ප්රහාරයකින් මියගිය මොහොමඩ් කසෙමි වෙනුවට කදෙමි පත් කරන ලදී.
ජනවාරි මාසයේ ඉරානයේ පැවති මාරාන්තික විරෝධතාවලින් පසුව, පෙබරවාරි මාසයේදී, මරණ වැඩි කිරීමට සහ විදේශීය හමුදා ක්රියාමාර්ග සාධාරණීකරණය කිරීමට ප්රචණ්ඩත්වය දිරිමත් කරන බවට කදෙමි විසින් ජනාධිපති ඩොනල්ඩ් ට්රම්ප්ට චෝදනා කළේය.
කදෙමි කියා සිටියේ ඊශ්රායලයේ 8200 ඒකකය ඇතුළු විදේශීය බුද්ධි අංශ 10 කට වැඩි ප්රමාණයක් ඉරානයේ විරෝධතාවලට සම්බන්ධ වූ බවයි.
එක්සත් ජනපදය පදනම් කරගත් මානව හිමිකම් ක්රියාකාරීන්ගේ ප්රවෘත්ති ඒජන්සියට අනුව, ජනවාරි මාසයේ සිදුවූ ඉරාන විරෝධතා මර්දනයේදී අවම වශයෙන් පුද්ගලයින් 7,000 ක් මිය ගොස් තිබේ.
IRGC බුද්ධි අංශ ප්රධානියා ඝාතනය කිරීමේ වගකීම ඊශ්රායලය භාර ගනියි
ඉරාන බුද්ධි අංශ ප්රධානී මජිඩ් කදෙමි ඝාතනයට ලක් වූ අතර, ඊශ්රායල ආරක්ෂක අමාත්ය ඊශ්රායල් කැට්ස් සහ ඊශ්රායල හමුදාව පැවසුවේ තමන් ඊට වගකිව යුතු බවයි.
ඔහුගේ ඝාතනය ඉරාන විප්ලවවාදී ආරක්ෂක බලකායට (IRGC) "තවත් දරුණු පහරක්" බව IDF ටෙලිග්රෑම් හි සඳහන් කර තිබේ.
මෑත කාලයේ යුද්ධයේදී ඉරානය සාමාන්යයෙන් තම ඉහළම අණ දෙන නිලධාරීන්ගේ මරණ තහවුරු කළේ ඊශ්රායලය හෝ එක්සත් ජනපදය ඒ පිළිබඳව ඔවුන් විසින් මුලින්ම ප්රකාශ කිරීමෙන් පසුව පමණි. නමුත් මෙවර ඉරානය එය කලින්ම නිවේදනය කළේය.
මජිඩ් කදෙමි යනු කවුද?
2025 ජුනි 15 වන දින ඊශ්රායල ප්රහාරයකින් ඔහුගේ පූර්වගාමියා වූ මොහොමඩ් කසෙමි මිය ගොස් දින හතරකට පසු කදෙමි IRGC බුද්ධි කණ්ඩායමේ අණදෙන නිලධාරියා බවට පත්විය.
මජිඩ් කදෙමි මාධ්ය තුළ නම් දෙකකින් පෙනී සිටියේය. ඇතැම්විට ඔහු මජිඩ් කදෙමි ලෙසත් ඇතැම් විට මජිඩ් හොසෙයිනි ලෙසත් හඳුන්වා දෙන ලදී.
ඔහු සිය ආරක්ෂක තනතුරු හේතුවෙන් හමුදාමය චරිතයක් ලෙස ප්රසිද්ධව සිටියේය.
මජිඩ් කදෙමි ආරක්ෂක අමාත්යාංශයේ බුද්ධි අංශයේ සිට ඉරාන විප්ලවවාදී ආරක්ෂක බලකායේ (IRGC ) බුද්ධි අංශයට මාරු වූ නමුත් ඔහු මීට පෙර IRGC හි සේවය කර තිබිණි.
IRGC බුද්ධි සංවිධානය පිහිටුවීමෙන් පසු, අවම වශයෙන් 2014 දක්වා මජිඩ් කදෙමි (හොසේනි) හොසේන් තායිබ්ගේ අනුප්රාප්තිකයා ලෙස ලෙස නම් කරන ලදී.
පසුගිය වසරේ අගෝස්තු මාසයේදී, ඉරානයේ 'මාර්ගගත ස්වාධීනත්වය ආරක්ෂා කිරීම' අවශ්ය බව පවසමින්, දේශීය අන්තර් ජාල ක්රමවේදයක් හඳුන්වා දීමට ප්රමුඛතාවය ගන්නා ලෙස කදීමි පාර්ලිමේන්තුවට පැවසීය.
පෙබරවාරි 28 වන දින යුද්ධය ආරම්භ වූ දා සිට ඉරානය තුළ තවමත් අන්තර්ජාල විසන්ධි කිරීමකට ලක් කර ඇති අතර ඇතැම් දේශීය වෙබ් අඩවි සහ ජංගම දුරකථන යෙදුම්වලට රට තුළදී පමණක් ප්රවේශ විමට හැකියාව පවතී.
