President Tinubu sign 68 trillion naira 2026 budget, extend operation of 2025 budget

Read am in 3 mins

Nigeria President Bola Tinubu don sign di 2026 appropriation bill wey provide for how dem go spend 68.32 trillion naira ($50bn).

Dis na according to di statement by di President tok tok pesin, Bayo Onanuga, wey e release on Friday 17 April, 2026.

Oga Tinubu also sign di bill wey extend di implementation period for di 2025 budget from March 31, 2026, to June 30, 2026.

Dis dey come less dan one year to di 2027 general election, wey go mark di end of im term for office.

Rememba say President Tinubu bin present 2026 budget to a joint session of di National Assembly for December 2025.

Oga Tinubu call am di "Budget of Consolidation, Renewed Resilience and Shared Prosperity wia e present di budget wey worth 58.18 trillion naira [wey be about $41.5 billion] to di lawmakers on Friday 19 December, 2025.

Skip content and continue reading

End of content

Highlights of 2026 budget

According to Onanuga, dis na how di 2026 budget of 68.32 trillion go take waka:

  • From di budget 4.799 trillion naira ($3.5bn) go be for statutory transfers,
  • 15.8 trillion naira ($11.6bn)go be for debt service
  • Dem allocate 15.4 trillion naira ($11.1bn) to recurrent expenditure
  • 32.2 trillion naira ($23.9) go be for Capital Expenditure

"Wit capital expenditure accounting for about 50 per cent, di 2026 budget show di administration commitment to economic stability, national security, infrastructure development, and inclusive growth."

E say di budget allocation go drive productivity and improve di life of Nigerians.

On why di President extend di 2025 budget, e say na to ensure say di appropriated funds dey used well well for important infrastructure and development projects wey dey go on across di kontri.

" E go enable Ministries, Departments, and Agencies (MDAs) to consolidate dia ongoing works, enhance project completion rates, and maximise value for public expenditure."

According to Onanuga statement, di 2026 Appropriation Act go come into force on April 1.

Meanwhile, President Tinubu don direct ministries, departments and agencies to ensure say dem use di resources wey dey allocated to dem well, and make dem dey transparent so dat Nigerians go get value for di money wey dem use do di projects.

President Tinubu clap hand give di National Assembly on how dem pass di budget promise to collabo more between di executive and legislative arms of govment.

Oga Tinubu say im administration go give more attention to projects and investments wey go help grow di economy.

Di 2026 budget don take time bifor e come, according to pipo but now, kwesion remain ontop wetin go be di effect of dis budget on Nigerians.