په دې وروستيو کې دا دويم ځل دى چې د بلخ په ولايت کې پر نړيوالو سوله ساتو ځواکونو بريد کيږي .

دا سړک چې د استوگنې له يوې سيمې نه تير شوى ، په اوږدو کې يې د ايساف د گزمې په يو موتړ يو ماين چې په څنډه کې يې ښځ شوي وه چاودلى.

د مزارشريف د پوليسو مشر شيرجان دراني بي بي سي ته ويلي دي د ورځې د څلور څلور نيمو بجو په شا و خوا کې دغه چاودنه وشوه او له کبله يې څلور تنه سويدني عسکر ټپيان شول ، چې د دريو ټپ يې شديد ښوول شوى .

عسکر اوس په يوه نړيوال روغتيايي مر کز کې تر درملنې لاندې نيول شوي دي .

له چاودنې وروسته امنيتي ځواکونو د بريد کوونکو د نيولو په هيله د چاودنې په شاو خوا کې ټوله سيمه وتړله چاته يې کورونو نه د وتلو او يا هم د ورتللو اجازه نه ورکوله .

تر اوسه پورې ددغې پيښې مسووليت چاپه غاړه نه ده اخستې خو د بلخ د پوليسو مشر ښاغلى درانى وايي چې دا د هيواد د دښمنانو کار دى .

څه موده مخکې هم د مزارشريف په ښار کې د ايساف په يوې برتانيوۍ ډلۍ بريد شوى وه چې له کبله يې يو تن مړ پنځه تنه نور ټپيان شول.