ټرمپ: امریکايي او نایجیریايي ځواکونو د داعش یو مهم مشر وژلی دی

د امریکا ولسمشر ډونلډ ټرمپ وايي، امریکايي او نایجیریايي ځواکونو په افریقا کې په ګډو پوځي عملیاتو کې په نړیواله کچه د اسلامي دولت یا داعش د مشرتابه دویم جګپوړی کس وژلی دی.

ټرمپ پر خپله خواله رسنۍ ټروت سوشل لیکلي چې "په نړۍ کې تر ټولو د فعال ترهګر ابو بلال المنوکي لمنځه وړلو" لپاره دا ګډ پوځي ماموریت له کومې ستونزې او خنډ پرته ترسره شوی دی.

واشنګټن په ۲۰۲۳ کال کې المنوکي د ترهګرو ځانګړي نړیوال لیست ته اچولی و.

دا په ۲۰۱۹ کال کې د اسلامي‌ دولت یا داعش د مخکیني مشر ابو بکر البغدادي له وژل کېدو راوروسته پر دې ډلې تر ټولو سخت ګوزار دی.‌

د ټرمپ پیغام کې د المنوکي وژلو لپاره د ترسره شویو عملیاتو د وخت او څرنګوالي په اړه نور جزییات نه دي شریک شوي.

بي بي سي د امریکا او نایجیریا له چارواکو سره په دې تړاو د نورو جزییاتو غوښتنه کړې ده.

المنوکي، چې د ابو بکر ابن محمد ابن علي المنوکي په نوم هم پېژندل کېږي، په ټوله افریقا کې د داعش اړوندو شبکو مشري کوله.

په دغو شبکو کې لوېدیزې افریقا لپاره د اسلامي دولت څانګه هم شامله ده، چې د چاد جهیل په سیمه او ساحل کې یې پښې ټینګې او په ګاونډ کې نیجر، چاد او مالي ته هم ریښې غځولې دي.

د امریکا ولسمشر ډونلډ ترمپ د المنوکي وژل کېدل افریقا کې د داعش پر څانګې او د دې ډلې پر نړیوالو شبکو لوی ګوزار بللی، چې د نوموړي په وینا د مالي تمویل لارې او د قوماندې جوړښتونه به یې ګډوډ کړي.

هغه د نایجیریا له حکومته د "همکارۍ" مننه کړې او ویلي یې دي چې منوکي به "نور د افریقا خلک نه وېروي او نه به هم د امریکایانو خلاف د بریدونو پلانونه جوړوي."

نایجیریا د توندلارۍ له اړخه د تاوتریخوالي پر وړاندې د مبارزې پر پیاوړتیا بوخت دی او په دې لړ کې یې له متحدو ایالتونو سره هم پوځي همکاري زیاته کړې ده.

د روان کال اپرېل میاشت کې د نایجیریا په شمال ختیځ اداماوا ایالت کې د فوټبال پر یوه لوبغالي د خونړي برید مسوولیت داعش منلی و.

په دغه برید کې لږترلږه ۲۹ کسان وژل شوي وو.‌

تر هغې ورمخکې د ۲۰۲۵ کال وروستیو شپو ورځو کې امریکا او نایجیریا په ګډه د دغه هېواد په سوکوتو ایالت کې هوايي برید ترسره کړ چې هدف یې د داعش پورې تړلې ډلې وې.