چارواکي: بلوچستان کې په دوو بریدونو کې د امنیتي کسانو په ګډون نهه تنه وژل شوي
د عکس سرچینه، ASAD BALOCH
پاکستاني چارواکي وايي چې د بلوچستان په دوو ولسوالیو کې دوه جلا بریدونه شوي چې لږترلږه نهه تنه پکې وژل شوي دي. پرون هم له بلوچستانه د دوو بریدونو خبر ورکړل شوی و.
د بيبيسي اردو د خبر له مخې، په وژل شوو کې درې امنیتي کسان او شپږ عام خلک دي. په دغو بریدونو کې څلور تنه ژوبل شوي هم دي.
د بلوچستان ایالتي اسمبلۍ دا بریدونه غندلي او اعلی وزیر یې میر سرفراز بوګټي ویلي چې عاملانو ته به یې د "خپلو اعمالو سزا ورکړل شي."
لومړی برید
ځايي چارواکي وايي چې لومړی برید ډيورنډ کرښې ته څېرمه چمن ښار ته نږدې شوی او د پاکستان امنیتي کسان پکې په نښه شوي دي.
بيبيسي اردو ته د کوټې یوه لوړپوړي چارواکي د دغه برید پخلی کړی او ویلي یې دي چې د امنیتي کسانو یو موټر پر 'روغاني سړک" تېرېده چې نامعلومو وسلهوالو پرې برید وکړ.
د دغه چارواکي په وینا، په دې پېښه کې درې تنه وژل شوي او یو ژوبل دی چې اوس ځايي روغتون ته وړل شوي دي.
ده ویلي چې د پېښې تر شا انګېزه تر اوسه معلومه نه ده او په اړه یې پلټنې روانې دي.
د دغه برید مسؤلیت تر اوسه چا نه دی منلی خو په تېر کې د دا ډول بریدونو مسؤلیت ځينو هغو وسلهوالو ډلو منلی چې پاکستان کې منع او پرې بندیزونه لګېدلي دي.
دویم برید
د شپږو کسانو د وژلو پېښه د بلوچستان د 'کیچ' ولسوالۍ په 'بلیده' سیمه کې شوې.
بيبيسي اردو د تربت سیمې د پولیسو د یوه چارواکي ظهیر احمد له قوله ویلي چې په دغه برید کې نامعلومو وسلهوالو یو کور په نښه کړی دی.
د مکران سیمې یوه بل لوړپوړي چارواکي هم د نوم نه ښودلو په شرط ورته ویلي چې په دې پېښه کې وسلهوالو د عبدالحمید په نوم د یو سړي کور په درنو وسلو سره په نښه کړی او وروسته یې ډزې هم کړې دي.
د عکس سرچینه، ASAD BALOCH
دغه چارواکي ویلي چې په برید کې د یوې ښځې او دوو ماشومانو په ګډون شپږ کسان وژل شوي او درې نور ژوبل دي.
پر خوالهرسنیو د دغه برید اړوند ځینې ویډیوګانې هم خپرې شوې دي چې ځينې مړي او د کور څو برخې پکې سوځېدلي ښکاري او د یوه مړي ترڅنګ سوې وسله هم پرته ده. خو بيبيسي په خپلواک ډول دا ویډيوګانې نه شي تاییدولی.
که څه هم چارواکو د پېښې د پلټنې خبره کړې خو د لومړنیو شواهدو پرمټ یې دا یوه "هدفي وژنه" بللې ده. نور جزیات یې نه دي ورکړي چې دا سړی څوک و او څه فکر کوي چې په څه دلیل په نښه شوی دی.
د کیچ سیمه د ایران پولې په ۶۰ کیلومترۍ کې پرته ده او له اوږدې مودې راهیسې پکې د بلوڅ بېلتونپالو ډلو وسلهوال فعال دي.
خو د دغه برید مسؤلیت هم تر اوسه چا نه دی منلی.
د بلوچستان ولسي جرګه یا اسمبلۍ کې پر دواړو پېښو خواشيني څرګنده شوه او وغندل شوې.
د یادولو ده چې پرون سېشنبه (کب ۵/فبروري ۲۴) هم له بلوچستانه د دوو پېښو خبرونه ورکړل شول چې په یوه کې د دوو افغان ښځو په ګډون اته تنه وژل شوي او درې نور ژوبل وو.
بله پېښه د ایران پولې ته څېرمه د همدغه پنجګور په چیدګي سیمه کې شوې وه چې د یوه ځايي چارواکي په وینا، شپږ تنه پکې ووژل شول.
دغه چارواکي وژل شوي کسان حاجي داود خان او د هغه ملګري یاد کړي وو او ویلي وو چې نامعلومو وسلهوالو کمین ورته نیولی و او ټول یې وژلي دي. د هغه په خبره، دوی د پنجګور د بېلابېلو سیمو اوسېدونکي او د پاکستان حکومت له ملاتړو بلل کېده چې وسلهوالو یې دوه موټر وسوځول او هغوی یې ووژل.
