Clach-mhìle chudromach ann an leasachadh Cala Stafainn

Tha an obair coimhearsnachd gus Cala Stafainn a leasachadh air clach-mhìle chudromach eile a ruighinn an dèidh mar a chaidh am prìomh thogalach fhosgladh.

'S e a' chiad teanant a' chompanaidh ionadail Corran Coffee aig am bi cùmhnant fad còig bliadhna café a ruith far am bi cuideachd taighean-beaga poblach agus frasairean.

'S e an goireas as ùire aig a' phort a chaidh fo shealbh Urras an Taobh Sear bho chionn dà bhliadhna.

Tha grunn ghnothachasan eile a-nis stèidhichte air an làraich an dèidh mar a chaidh seachd seadaichean-obrach a thogail an-uiridh - sauna, tursan-mara agus cur-seachadan air a' bhlàr a-muigh sa Ghàidhlig nam measg.

'S ann le Andi Dunkel agus Paul Milne a tha Corran Coffee agus tha seachdnar ag obair dhaibh.

Bidh iad a' ròstadh nam pònairean cofaidh bho air feadh an t-saoghail aig a' chala fhèin.

Thuirt Mgr Dunkel: "Tha luchd-turais agus muinntir an àite air innse dhuinn cho toilichte 's a tha iad gu bheil café beag ann, gu h-àraid nuair a smaoineachas tu nach robh goirisean idir ann bho chionn beagan bhliadhnaichean."

Bha cruaidh fheum air barrachd ghoireasan dhan phoball leis gum bi na mìltean a' tadhal air a' Chorran a h-uile bliadhna feuch am faic iad na lorgan coise dìneasair air a' chladach.

'S e obair leasachaidh air Cala Stafainn fear de na rudan as motha a bha muinntir ear-thuath an Eilein Sgitheanaich ag iarraidh fad 20 bliadhna.

Tha Urras an Taobh Sear air còrr is £3m not de dh'airgead phoblach fhaighinn airson na h-obrach.

Thuirt cathraiche na buidhne Calum Dòmhnallach gun robh iad "air an dòigh glan gnothachas ionadail eile fhaicinn aig a' chala a' cumail taic ri obraichean."

Thuirt e: "Tha e a' cumail taic ris a' chala agus leis a sin ri coimhearsnachd Stafainn air fad."

Bidh an t-urras a-nis a' sireadh maoineachaidh airson na h-ath-ìre den obair leasachaidh gus balla-fasgaidh, lamraig agus pontùnaichean ùra a thogail.

Thuirt manaidsear Cala Stafainn, Lachaidh MacGill'Ìosa: "Bhiodh sin a' fosgladh chothroman do bharrachd bhàtaichean cho math ri cothroman do ghnothachasan eile is obraichean ura an ceann a tuath an Eilein Sgitheanaich."