Ntịwapụ ọrịa Ebola ọhụrụ egbuola mmadụ 65 na DR Congo
Ebe foto si, Getty Images
Ngalaba na-ahu maka mgbochi ọrịa n'Afrịka bụ CDC Africa ekwuola na e nwere ntịwapụ ọrịa Ebola n'obodo Turi dị n'Ọwụwa Anyanwụ mba DR Kongo dị na Sentral Afrịka.
CDC Africa kwuru na mmadụ dị 246 ebutala ọrịa Ebola na nsonso a, ebe mmadụ 65 nwụrụla.
Ebola bụ ọrịa a na-efekesa site mmiri si n'ahụ mmadụ nke na-ebute oke ịgba ọbara nakwa akụkụ ime ahụ mmadụ ịkwụsị ọrụ.
N'ozi CDC Africa wepụtara ụbọchị Fraide, ha kwuru na ha na ndị DR Kongo, Yuganda na Saụt Sudan ga-enwe ọgbakọ iji kpaa etu ha ga-esi ebu agha megide ọrịa ahụ ma hụ na-eme nnychoa n'okeala mba ndị ahụ.
End of Akụkọ gbasara ọrịa nje Ebola ndị ọzọ ga-amasị gị
Nnyocha e mere na ụlọọrụ nnyocha 'Institut National de Recherche Biomédicale' (INRB) dị n'isi obodo DR Kongo bụ Kinshasa, gosiri na nje ahụ dị na sampụlụ 13 n'ime 20 e nyochara dịka Ministrị ahụike mba DR Kongo na ụlọọrụ ahụike ahụ kpachara.
A hụkwara ndị a na-enyo na ha bu ọrịa Ebola na isi obodo Ituri bụ , Bunia, dịka a na-eche mpụtara nnyocha ụlọọrụ nnyocha.
End of Ọrịa ndị ọzọ ụwa na-ebuso agha
A chọpụtara Ebola mbụ n'afọ 1976 n'ebe a na-akpọ DR Congo ugbua bụ ebe e cheburu na ọrịa Ebola sị na ụsụ fee mmadụ.
Njirimara ọrịa Ebola ma o bido gụnyere ahụọkụ, ahụ mgbu, ike ọgwụgwụ, isi ọwụwa na ọnya akpịrị. Ebola enweghị ọgwụgwọ.
Ihe ruru mmadụ 50,000 anwụọla site n'ọrịa ebola n'Afrịka n'afọ 50 gara aga.
N'afọ gara aga (2025) mmadụ 15 nwụrụ na mba ahụ dịka ọrịa Ebola tịwapụtara ọhụrụ agba nke 16 ya.
_____________________________________________________________________________
