Abubuwan da ke faruwa a Najeriya da sassan duniya 14/10/2026

Rahoto kai-tsaye

Aisha Aliyu Jaafar da Nabeela Mukhtar Uba

1. 14 Oktoba 2026Kotu ta ɗaure wata mata shekaru biyu bisa laifin safarar yarinya ƴar shekara 16

   

   Asalin hoton, Getty Images

   Babbar kotu a jihar Borno da ke Maiduguri ta yanke wa Fatima Sanda, mai shekaru 37, hukuncin ɗaurin shekaru biyu a gidan yari bisa laifin safarar wata yarinya ’yar shekara 16 da tursasa mata shiga harkar karuwanci.

   Kotun, ƙarƙashin jagorancin Mai shari’a Aisha M. Ndume, ta same ta da laifin kai yarinyar ga wasu mutane domin cin zarafinta ta hanyar lalata da ita.

   Hukumar yaƙi da safarar mutane ta Najeriya (NAPTIP) ce ta sanar da hukuncin a shafinta na sada zumunta.

   Ta ce hukuncin ya yi daidai da sashe na 16(1) na dokar hana safarar mutane da gudanar da ayyukan yaƙi da ita ta shekarar 2015, wadda aka yi wa kwaskwarima.

   Baya ga hukuncin ɗaurin, kotun ta umarci Fatima Sanda da ta biya yarinyar diyyar naira 500,000.

2. 14 Oktoba 2026An kashe ƴan Bangladesh 20 a yaƙin Ukraine da Rasha

   

   Asalin hoton, Reuters

   Bangladesh ta ce an kashe ƴan ƙasarta 20 a Ukraine, bayan da aka yi safararsu zuwa Rasha da alkawarin bogi na samar musu da ayyukan yi, kafin daga bisani a tilasta musu zuwa fagen yaƙi.

   Ƴan sanda sun ce an yi amfani da matasan a fagen daga a matsayin abin da suka kira “tarko” domin jawo hankalin abokan gaba.

   Ƴan sanda sun shaida wa manema labarai a Dhaka, babban birnin Bangladesh, cewa 17 daga cikin matasa 30 da aka yi safararsu zuwa Rasha a watan Mayu, an kashe su ne a ranar farko da aka tilasta musu shiga yaƙin Rasha a Ukraine, wasu 3 sun mutu a asibiti.

   Ƴan sandan sun ce matasan, waɗanda ba su samu wani horon soja ba, an kai su wuraren da jirage marasa matuƙa ke kai hare-hare da gangan, domin tona asirin inda sojojin Ukraine suka ɓuya.

   Har yanzu shida daga cikin matasan suna fagen daga, ind biyu kuma suna asibiti a Moscow, yayin da wasu biyu suka tsere suka koma Bangladesh.

   Bayanai sun ce ɗaya daga cikinsu, wanda rabin jikinsa ya shanye, ya ja jikinsa har tsawon kilomita huɗu kafin ya isa wani sansani.

   An kuma samu irin waɗannan rahotanni kan wasu ’yan Kudancin Asiya, ciki har da ƴan Indiya, Nepal da Sri Lanka, waɗanda aka yaudare su zuwa Rasha da alƙawarin ayyukan yi da albashi mai tsoka, sannan aka tura su yaƙin Ukraine.

3. 14 Oktoba 2026Yara sama da 87,000 na fama da ƙarancin abinci mai gina jiki a Katsina – MSF

   

   Asalin hoton, Getty Images

   Ƙungiyar likitocin agaji ta ƙasa da ƙasa ta Médecins Sans Frontières (MSF) ta ce ta yi wa yara sama da 87,000 masu fama da matsanancin ƙarancin abinci mai gina jiki magani a jihar Katsina tsakanin watan Janairu da Agustan 2026.

   A wata sanarwa da kakakin MSF Abdulkareem Yakubu ya fitar, ƙungiyar ta ce duk da an ɗan samu raguwar yaran da aka yi wa magani idan aka kwatanta da shekarar da ta gabata, har yanzu yawan yaran da ke fama da matsalar yana da matuƙar yawa.

   MSF, wadda ke gudanar da shirye-shiryen jinyar yara masu fama da ƙarancin abinci mai gina jiki a arewacin Najeriya, ta ce Katsina ce jihar da take gudanar da babban shirinta na kula da irin waɗannan yara.

   A jihar, ƙungiyar na gudanar da ayyukan jinya da ciyar da yara a cibiyoyi huɗu domin taimaka wa waɗanda matsalar ta shafa.

   Sai dai MSF ta yi gargaɗin cewa ƙarancin abinci mai gina jiki na ci gaba da zama babbar matsala a faɗin yankin, duk da nasarorin da aka samu wajen kula da yaran da ke fama da ita.

   Ta ce akwai buƙatar gwamnatin tarayya da gwamnatocin jihohi, masu ba da tallafi na ƙasa da ƙasa da ƙungiyoyin agaji su ci gaba da zuba maƙudan kuɗaɗe a shirye-shiryen yaƙi da matsalar.

   A cewar ƙungiyar, ci gaba da samar da isassun kuɗaɗe da tallafi shi ne zai taimaka wajen rage wannan matsala, wadda ke taimakawa wajen haddasa mutuwar dubban yara a kowace shekara.

4. 14 Oktoba 2026Kenya ta tabbatar da mutum na biyu da ya kamu da Ebola

   

   Asalin hoton, AFP via Getty Images

   Ƙasar Kenya ta tabbatar da samun mutum na biyu da ya kamu da cutar Ebola, kwanaki 10 bayan wani ɗan kasuwa ya mutu sakamakon cutar bayan ya yi tafiya daga Jamhuriyar Dimokuraɗiyyar Kongo zuwa Nairobi.

   Ma’aikatar Lafiya ta Kenya ta bayyana cewa sabon marar lafiyar, wani mutum ne mai shekaru 39 a duniya, ɗan uwa ne na kusa da mutum na farko da ya kamu da cutar.

   Kuma tun da fari an killace shi domin lura da lafiyarsa, amma daga bisani ya fara nuna alamun rashin lafiya a ranar Talata.

   Cutar Ebola na ɗaukar akalla ƙwanaki biyu zuwa ashirin kafin ta fara bayyana a jikin wanda ya kamu da ita, wanda ke nufin cewa mutanen da sukai mu'amala da mutum na cikin haɗari.

   Ma’aikatar lafiya a Kenya ta yi kira ga jama'a su ɗauki matakan da suka dace domin kare kan su da iyalai daga kamuwa da Ebola.

   “Dukkan waɗannan mutane biyu da suka kamu da cutar suna da alaƙa da juna, kuma babu wata hujja da ke nuna cewa cutar ta bazu a cikin al’umma gaba ɗaya,” in ji hukumomi.

5. 14 Oktoba 2026Faransa da Chadi sun rattaba hannu kan yarjejeniyar tsaro

   Kasashen Chadi da Faransa sun rattaba hannu kan wata yarjejeniya domin ƙarfafa haɗin gwiwa a fannin tsaro, kusan shekaru biyu bayan N'Djamena ta kawo ƙarshen yarjejeniyar soji da Paris.

   Ministocin tsaron ƙasashen biyu ne suka sanya hannu kan yarjejeniyar a wani biki da aka gudanar a Fadar Élysée ranar Talata.

   Hakan ya kuma zo daidai da ziyarar aiki da Shugaban Chadi, Mahamat Deby, ya kai Faransa, inda shi da takwaransa na Faransa, Emmanuel Macron, suka shaida sanya hannu kan shirin haɗin gwiwar.

   Har yanzu ba a fitar da cikakkun bayanai game da yarjejeniyar ba, amma fadar shugaban ƙasar Chadi ta ce yarjejeniyar za ta taimaka wajen ƙarfafa ƙarfin ƙasar a fannin tsaro.

   A nasa ɓangaren, Shugaban Faransa Emmanuel Macron ya bayyana wannan mataki a matsayin wani sabon ci gaba na ƙarfafa haɗin gwiwar tsaro da zumunci tsakanin ƙasashen biyu, wanda ya ce ya dace da sabon tsarin dangantakarsu.

   A watan Nuwambar shekarar 2024, Chadi ta kawo ƙarshen tsohuwar yarjejeniyar tsaro da tsohuwar gijiyarta Faransa, lamarin da ya haifar da janye sojojin Faransa daga ƙasar.

6. 14 Oktoba 2026Ba kowace jiha zan iya zuwa yaƙin neman zaɓe ba – Tinubu

   

   Asalin hoton, Bwala Daniel/X

   Shugaban Najeriya, Bola Ahmed Tinubu, ya ce ba zai iya raka mambobin kwamitin yaƙin neman zaɓen shugaban ƙasa na jam’iyyar APC zuwa dukkan wuraren da za su gudanar da kamfen gabanin zaɓen 2027 ba.

   Tinubu ya ce akwai abubuwan da suke buƙatar ya mayar da hankali kan gudanar da su a lokacin da ake yawon kamfe din.

   Tinubu ya bayyana hakan ne ranar Laraba a Abuja, yayin ƙaddamar da kwamitin yaƙin neman zaɓen shugaban ƙasa na APC, inda ya buƙaci mambobinsa su kai saƙon jam’iyyar ga ƴan Najeriya a faɗin jihohi da ƙananan hukumomi.

   Shugaban ya ce ya amince da shawarar cewa bai kamata yaƙin neman zaɓe su ɗauke masa hankali daga gudanar da mulki ba, yana mai cewa Najeriya na buƙatar kulawarsa a halin yanzu.

   “Kun gargaɗe ni da kada wahalhalun yaƙin neman zaɓe su ɗauke min hankali daga gudanar da mulki, kuma na amince da wannan shawara. Najeriya na buƙatar kulawa sosai a yanzu,” in ji shi.

   Tinubu ya buƙaci mambobin kwamitin su fahimci cewa ba zai iya kasancewa tare da su a dukkan wuraren da za su gudanar da kamfen ba, saboda gwamnati na da wasu kuɗaɗen da za ta biya da kuma wajibai na kuɗi ga ƙasashen waje.

   Ya ce: “Don haka, ku yi haƙuri idan ba zan iya zuwa ko’ina tare da ku ba. Muna da kuɗaɗen da za mu biya, kuma masu bin mu bashi daga Amurka ba za su jira ba.”

   Shugaban ya kuma ce gwamnatinsa na buƙatar jawo hankalin masu zuba jari da za su zuba kuɗaɗensu a Najeriya na dogon lokaci domin samar da kyakkyawar makoma ga ’ya’yan ƙasar.

   Ya ce yana son masu zuba jarin su zo Najeriya su zauna, su kuma zuba jari domin amfanin al’umma da kuma makomar yara.

7. 14 Oktoba 2026An kai ƙarar mutumin da ke ƙwaiƙwayon muryar jagoran addinin Iran

   

   Asalin hoton, Instagram/saeedshakiiba

   Ofishin Babban Mai Shigar da Ƙara na birnin Tehran, ya shigar da ƙara a kan wani fitaccen mai rubutu a shafin Instagram kan zargin ya wallafa abubuwa masu masu tayar da hankali da tunzura jama'a a shafin na sa.

   Wannan matakin ya biyo bayan yaduwar wani bidiyo na barkwanci da Saeed Shakiba, ya wallafa, inda ya ƙwaiƙwayi Jagoran jamhuriyar musuluncin Iran marigayi Ayotallah Ali Khamenei, jagoran Jamhuriyar Musulunci ta Iran.

   Mista Shakiba ya ƙwaiƙwayi yadda Ali Khamenei ke gudanar da tarurrukansa da mawaƙa, inda yake cewa: “Ku zo, ku zo,” sannan yana neman a kawo masa “shayi tare da ganyaye.”

   Jim kaɗan ɓullar bidiyon da aike sammaci ga Mista Shakiba ya gaggauta sauke shi daga Instagram, mai mabiya miliyan ɗaya.

   A baya ma ya taba suka ga gwamnati da kuma halin ƙuncin tattalin arziƙin Iran bayan zanga-zangar da aka yi a watan Janairu.

8. 14 Oktoba 2026Hare-haren ƴan Houthi sun yi ɓarna a Dhahran a Saudiyya

   Rahotanni sun ce hedikwatar kamfanin man fetur na Saudiyya, Aramco, da ke Dhahran ta samu gagarumar barna, sakamakon harin da aka kai mata a daren Talata.

   Harin na zuwa ne yayin da ƙungiyar Houthi ke ci gaba da kai hare-hare da makamai masu linzami da jirage marasa matuƙa daga Yemen zuwa Saudiyya.

   Wakilin BBC ya ce, Majiyoyi sun shaida wa Reuters cewa wuta ta bazu a rassan ginin da dama da ke Dhahran.

   Sai dai duk da wannan ɓarna, ayyukan Aramco bai tsaya ba, ma’aikata na aiki daga gida.

   A halin da ake ciki yanzu kuma, an sake jin ƙarar fashe-fashe a Riyadh, yayin da mayaƙan Houthi masu samun goyon bayan Iran suka yi barazanar ci gaba da kai hare-hare kan cibiyoyin man fetur da filayen jiragen saman Saudiyyar.

9. 14 Oktoba 2026Dalilin INEC na cire sunan wasu ƴantakarar gwamna a zaben 2027

   

   Asalin hoton, INEC

   Hukumar Zaɓe Mai Zaman Kanta ta Kasa (INEC) ta yi ƙarin haske kan matakinta na cire sunayen wasu ‘yan takara daga jerin sunayen ƙarshe na ‘yan takarar gwamna a zaɓen 2027 inda ta ce ta yi haka ne saboda jam’iyyunsu sun kasa gabatar da kundin rajistar mambobinsu kamar yadda doka ta tanada.

   Wannan bayani ya zo ne bayan martanin da jam’iyyu da ‘yan takarar da abin ya shafa suka yi bayan fitar da jerin sunayen da ya tsame fitattun ƴan takara ciki har da ‘yan takarar gwamna na jam’iyyar PDP da NDC a jihohin Gombe da Kano, wato Isa Pantami da Kwamared Abdusalam Gwarzo.

   A wata sanarwa da jami'in kula da wayar da kan jama'a Muhammad Kudu Haruna ya sanya wa hannu, INEC ta ce cire sunan ya faru ne sakamakon hukuncin da kotun koli ta yanke a ranar 24 ga watan Satumba a shari'ar INEC da jam'iyyar ZLP, inda hukuncin kotun ya tabbatar da sahihancin sashe na 77(5) zuwa sashe na 77(7) na dokar zaɓe ta 2026.

   Tanade Tanaden dokar na nufin dole ne jamiyyun siyasa su gabatar da kundin rijistar mambobinsu ga hukumar cikin wa'adin da aka ƙayyade.

   Kotun ta kuma amince da jadawalin INEC, wanda ya tanadi cewa jamiyyu su gabatar da sunan ƴan takararsu tsakanin 21 ga Afrilu zuwa 10 ga watan Mayun 2026.

   A cewar sanarwar, a hukuncin kotun ƙolin duk jamiyyar da ta gaza cika wannan sharaɗi ba ta cancanci tsayar da ɗan takara a zaɓe ba, kuma INEC ta yi amfani da wannan hukunci wajen kammala tattara sunayen.

   A ƙarshe INEC ta ce duk wata jamiyyar da ke ganin an cire ɗan takarar ta bisa kuskure, tana da kwanaki 14 ta sanar da INEC a hukumance, wato nan da ranar 24 ga watan Oktoba.

10. 14 Oktoba 2026Ƴar Najeriya mai shekara 15 da ta ƙware a zane

11. 14 Oktoba 2026Ƴan kasuwar Yamai sun koka kan tsadar kuɗaɗen hayar shaguna

    

    Asalin hoton, Getty Images

    A jamhuriyar Nijar 'Yan kasuwa a babbar kasuwar birnin Yamai (Grand Marché) sun bayyana damuwa kan karin kudaden hayar shaguna da suke zargin shugabannin kasuwar da aiwatarwa.

    Ana ci gaba da tada jijiyoyin wuya, inda 'yan kasuwar ke nuna tsananin rashin amincewarsu da karin kudin hayar shaguna da ya yi yawa sosai kuma ba zato ba tsammani.

    Wannan mataki wanda ya samo asali daga sabbin umarnin gudanarwa ya sanya karin kudade da masu hayar ke ganin ba za su iya biya ba.

12. 14 Oktoba 2026Najeriya ta buƙaci a yi bincike kan mutuwar wani ɗan ƙasar a Afirka ta Kudu

    Gwamnatin Najeriya ta buƙaci hukumomin Afirka ta Kudu su gudanar da cikakken bincike kan mutuwar wani ɗan Najeriya da jami'an ofishin jakadancin ƙasar a Johannesburg suka ce ya mutu bayan da ake zargin wasu 'yan sanda sun azabtar da shi.

    A wata sanarwa da Ofishin Jakadancin Najeriya da ke Johannesburg ya fitar, an ce Odueze Chimezie Odueze ya mutu ne a ranar 9 ga Oktoba a yankin Parklands da ke birnin Cape Town.

    Sanarwar ta ce an kama shi ne a wani rukunin shaguna bisa zargin mallakar hodar iblis, sannan aka tasa ƙeyarsa zuwa gidansa domin gudanar da bincike, sai dai ba a samu wata ƙwaya ba.

    Ofishin jakadancin ya yi zargin cewa jami'an 'yan sandan da suka kama shi sun azabtar da shi, inda daga bisani ya mutu.

    Sai dai rahoton ya ce ba a samu wata hujja mai zaman kanta da ta tabbatar da yadda ya mutu ko kuma zargin da ake yi wa jami'an 'yan sandan ba.

    Sanarwar ta bukaci 'yan Najeriya mazauna Afirka ta Kudu su kasance masu bin doka, su kwantar da hankalinsu tare da kula da tsaronsu.

    Lamarin na zuwa ne a lokacin da ake ci gaba da nuna damuwa kan tsaron 'yan Najeriya a Afirka ta Kudu, sakamakon yadda ake nuna ƙyamar baƙi.

13. 14 Oktoba 2026Ɗalibai masu zanga zanga sun cinna wuta a ma'aikatar ilimi ta Albania

    

    Asalin hoton, Reuters

    Ɗalibai masu zanga-zanga a ƙasar Albaniya sun banka wa wani sashe na ma'aikatar Ilimi ta ƙasar wuta, yayin da suke neman a inganta yanayin jami'o'i da kuma samar musu da damarmakin samun aikin yi.

    Rahotanni sun ce masu zanga-zangar sun jefa kwalaben wuta da wasu abubuwa kan jami'an tsaro, haka kuma sun cire wasu shingayen ƙarfe tare da amfani da su wajen toshe hanyoyi a babban birnin ƙasar Tirana.

    'Yan sandan kwantar da tarzoma sun yi amfani da hayaki mai sa hawaye domin tarwatsa masu zanga-zangar.

    Zanga-zangar ta haɗe da wata babbar fafutuka da ake kira "Juyin Juya Halin Flamingo", wadda ke samun goyon baya a sassan ƙasar.

    Masu wannan fafutuka suna neman Firaministan Albaniya, Edi Rama, ya sauka daga mulki.

14. 14 Oktoba 2026Kullen Allah ta yi kira ga INEC ta tsawaita wa'adin bayar da katin zaɓe

    

    Asalin hoton, INEC

    Ƙungiyar Makiyaya ta Kulen Allah (KACRAN) ta yi kira ga hukumar zaɓen Najeriya (INEC) ta tsawaita wa'adin bayar da katinan zaɓe na dindindin da mako guda, daga ranar 15 zuwa 22 ga Oktoban 2026.

    Cikin wata sanarwa da shugaban ƙungiyar na ƙasa, Hon. Khalil Mohd Khalil, ya sanya wa hannu, Kullen Allah ta ce akwai ɗimbin ƴan Najeriya musamman mazauna ƙauyuka da yankunan karkara da har yanzu ba su san ana gudanar da aikin rabon katunan zaɓen ba, duk da muhimmancinsa gabanin babban zaɓen shekarar 2027.

    KACRAN ta ce ta shafe watanni tana wayar da kan mambobinta su yi rajistar zaɓe, amma yanzu da ake rabon katunan, mutane da dama musamman a arewacin ƙasar ba su da masaniyar lokacin da aka fara aikin ko kuma lokacin da zai ƙare.

    Ƙungiyar ta kuma nuna damuwa kan dubban mutanen da ke zaune a matsugunan wucin gadi ko sansanonin ƴangudun hijira da ka iya rasa damar karɓar katunansu saboda rashin bayanai.

    Moh'd Khalil Bello ya yi gargaɗin cewa rashin tsawaita wa'adin na iya janyo wa miliyoyin ƴan ƙasa damar kaɗa ƙuri'a.

    "Kowace ƙuri'a na da muhimmanci a tsarin dimokuraɗiyya, kuma ƙarin mako ɗayan zai ba da damar ci gaba da sanar da al'umma halin d ake ciki'', in ji shi.

    Haka kuma ƙungiyar ta yi kira ga gwamnoni 19 na arewacin Najeriya su ayyana ranakun 19 da 20 ga Oktoba a matsayin ranakun hutu, domin gudanar da gangamin wayar da kai.

15. 14 Oktoba 2026Iran ta mallaki sabbin manyan makamai bayan yaƙin baya bayan nan - IRGC

    

    Asalin hoton, EPA

    Dakarun juyin juya hali na Iran (IRGC) sun ce ƙasar ta samu sabbin manyan makamai bayan yaƙin da aka yi baya bayan nan da Amurka da Isra'ila.

    Kakakin rundunar, Hossein Mohebi, ya ce a lokacin yaƙin da aka shafe kwanaki 40 ana gwabzawa, Iran ta dogara ne galibi kan tsofaffin makaman da take da su.

    "Amma tun bayan yaƙin, Iran ta samu manyan makamai da suka fi waɗanda take da su a baya," in ji shi.

    Sai dai Mista Mohebi bai bayyana nau'in waɗannan makamai ko kuma yadda Iran ta same su ba.

    Jami'in na IRGC ya kuma yi gargaɗin cewa Iran a shirye take ta mayar da gagarumin martani ga duk wani sabon hari da aka kai mata.

    Ya ce, "A wannan karon, sakamakon da Amurka za ta fuskanta zai fi na baya muni."

    Mohebi ya kuma yi watsi da iƙirarin wasu jami'an Amurka cewa akwai saɓani da rashin haɗin kai tsakanin shugabannin Iran.

16. 14 Oktoba 2026Shirin ƴan hamayyar Najeriya na haɗewa kafin 2027

17. 14 Oktoba 2026IMF ya shawarci Najeriya kan kar ta dawo da tallafin man fetur

    

    Asalin hoton, Getty Images

    Asusun Ba da Lamuni na Duniya (IMF) ya shawarci Najeriya da kada ta dawo da tsarin tallafin man fetur, maimakon haka ya ba da shawarar a mayar da hankali wajen tallafa wa marasa ƙarfi domin rage tasirin hauhawar farashin makamashi.

    IMF ta ce tallafin fetur na bai daya yana da tsada sosai, kuma galibi masu samun kuɗaɗen shiga masu yawa ne suka fi amfana da shi.

    Haka kuma, asusun ya ce irin wannan tsarin na iya ƙara wa gwamnati nauyin kashe kuɗi a lokacin da farashin rance ke ƙaruwa.

    Daraktan sashen harkokin kasafin kuɗi na IMF, Rodrigo Valdés, ne ya bayyana hakan yayin wani taron manema labarai game da rahoton sa ido kan harkokin kasafin kuɗi a taron shekara-shekara na IMF da Bankin Duniya na shekarar 2026 da ake gudanarwa a Bangkok na ƙasar Thailand.

    Shawarwari 4 da IMF ya bai wa Najeriya don sauƙaƙa wa ƴanƙasar raɗaɗin cire tallafi

18. 14 Oktoba 2026Akwai buƙatar a ƙara ƙarfafa na'urorin kare sararin samaniyar Ukraine - NATO

    Babban Sakataren ƙungiyar tsaro ta NATO, Mark Rutte, ya ce akwai buƙatar ƙasashe mambobin ƙungiyar su ƙara ƙaimi wajen ƙarfafa na'urorin kariyar sararin samaniyar Ukraine.

    Da yake jawabi a ƙasar Estonia, Rutte ya ce hare-haren Rasha kan Ukraine na ci gaba ba tare da sassautawa ba, kuma lokacin hunturu na gabatowa.

    Rutte ya kuma ce hare-haren da ake kai wa wasu ƙasashen Turai, waɗanda ake zargin Rasha da hannu a cikinsu, alama ce ta raunin Moscow ba ƙarfinta ba.

19. 14 Oktoba 2026Jihohin Najeriya da suka fi fama da talauci

    Kimanin mutane miliyan 123 ne ke barazanar faɗawa cikin matsanancin talauci a Najeriya, kamar yadda wani rahoto na Bankin Duniya ya nuna a 2026.

20. 14 Oktoba 2026Ƴan sanda sun kama robot bisa zargin ya cakumi mazaunan wata yarinya a Jamus

    

    Asalin hoton, North Rhine Westphalia Police Cologne

    Ƴan sanda a Jamus sun ƙaddamar da bincike kan wasu matasa biyu da ake zargi da sarrafa wani mutum-mutumi wanda ake zargin ya ci zarafin wata yarinya mai shekara 16.

    Yan sanda a birnin Cologne sun kuma ƙwace mutum mutumin mai launin ja da zinare bisa zargin ya cafki mazaunan matashiyar sannan ya nanuƙe ta, kafin ta kwarma ihu, ta ja da baya.

    Ƴan sandan jihar North Rhine-Westphalia sun ce ana zargin mai mutum mutum, ɗan shekara 16 da wani abokinsa mai shekara 19 sun watsa lamarin kai tsaye a shafukan sada zumunta.

    Baya ga ƙwace na'urar, 'yan sanda sun kuma karɓe wayoyin hannu guda biyu mallakin waɗanda ake zargin.

    Masu bincike na ƙoƙarin gano ko akwai wanda ya ke sarrafa motsin mutum-mutumin da gangan a lokacin da lamarin ya faru.