Ko Bukayo Saka ya dawo kan ganiyarsa?

Ƙoƙarin Bukayo Saka a wasan farko na wannan kakar, wanda Arsenal ta samu gagarumar nasara, wanda ya sa wasu magoya bayan kungiyar suka fara yarda cewa Gunners za ta iya kare kambunta na Premier League, ta sake ɗaukar kofin karo na biyu a jere.

Ɗan wasan mai shekara 24 bai samu wata dama ba ta musamman a lokacin da yake bugawa Arsenal a ƙarshen kakar wasan da ta gabata, haka kuma lokacin da yake tare da tawagar Ingila a gasar Kofin Duniya, saboda raunin jijiyar da ya samu a watan Maris.

Saka bai buga wasannin ƙasa da ƙasa na watan Maris ba, da kuma wasa bakwai da Arsenal ta yi, amma daga baya ya dawo ya taimaka wa ƙungiyar lashe kofin Premier League karo na farko cikin shekaru 22.

Daga nan kuma an cire shi a wasan ƙarshe na Champions League lokacin da Arsenal ta sha kashi a hannun Paris Saint-Germain a Budapest, kuma an ta sukar yadda ya taka leda a wannan wasa.

Kocin Ingila, Thomas Tuchel, shi ma ya rage masa lokacin wasa a gasar Kofin Duniya. Amma lokacin da aka tambaye shi ko yana jin takaici idan ba ya samun damar buga wasanni alhali bai gama murmurewa dari bisa dari ba, Saka ya ce buga wasa da sauran rauni "hadari ne" da ya yarda ya dauka.

A bayyane yake hutun da ya samu bayan gasar ya taimaka masa wajen fara wannan kakar wasa cikin mafi kyawun yanayi.

Ya taka leda sosai a wasan da suka doke sabuwar ƙungiyar da ta samu ɗaukaka zuwa Premier League, Coventry, ranar Juma'a. Ya wahalar da mai tsaron baya Jay Dasilva tare da zura ƙwallo ta biyu a wasan da Arsenal ta yi nasara da ci 3-0.

Ganin Saka yana rige-rigen kai hare-hare a gefen dama kuma yana da hannu a yawancin hare-haren Arsenal abu ne da zai faranta ran magoya bayan ƙungiyar.

Domin duk da cewa kakar wasan da ta gabata ta kasance mai cike da kwan-gaba kwan-baya saboda rauni, Saka ya buga wasa 49 a dukkan gasa ga Arsenal, kuma kason nasarorin ƙungiyar ya fi kyau sosai idan yana cikin tawagar.

Ko wasanni Kofin Duniya sun taimaka masa?

Saka ya fara wasa ne kawai a wasa uku daga cikin wasa takwas da Ingila ta buga a gasar Kofin Duniya, ciki har da wasan da ya ci ƙwallo uku a nasarar da suka yi da ci 6-4 kan Faransa a wasan neman matsayi na uku.

Wannan sakamakon ya tabbatar da Ingila ta samu mafi kyawun matsayinta a gasar Kofin Duniya da aka gudanar a wajen ƙasarta.

Sai dai kuma an bar Saka a benci a wasan kusa da na ƙarshe da Ingila ta sha kashi a hannun Argentina, duk da cewa ya fara wasa a nasarar da suka yi kan Mexico a zagayen 'yan 16 da kuma kan Norway a wasan kwata-fainal.

Bayan nasarar da suka samu a kan Mexico, Saka ya ce da ma yana fatan ya shiga gasar cikin cikakken ƙoshin lafiya, amma ya amince cewa "hakan bai kasance ba".

Saka ya buga minti 357 kacal a gasar Kofin Duniya, wanda ya kai kashi 48 cikin 100 na jimillar mintunan da Ingila ta taka a wasanni takwas na gasar.

Duk da ƙarancin lokacin wasa, ya nuna hazaƙarsa da ƙwarewarsa a lokuta da dama, inda ya bayar da taimako aka zura ƙwallo uku, adadin da ya yi daidai da na Anthony Gordon kuma mafi yawa a cikin 'yan wasan Ingila. Haka kuma ya zura ƙwallo uku.

Wasanni share fage da kuma komawa ganiya

Saka ya dawo daga gasar Kofin Duniya, kuma bayan ya yi ɗan hutu sai ya koma cikin tawagar Arsenal. Ya buga mintunansa na farko a wannan kakar wasa ne a wasan Community Shield, inda ya shiga fili lokacin da Gunners tuni ta ci Manchester City 3-0.

Saurinsa da kaifin motsinsa a wannan ɗan gajeren lokacin tasa sun nuna wani abu da aka rabu da gani tun a ƙarshen kakar wasan da ta gabata, lokacin da yake ƙoƙarin taimaka wa ƙungiyarsa ta cimma burinta.

Bayan ƙoƙarin da ya yi a wasan Coventry wanda shi ne na farko a Premier bana, Saka ya bayyana cewa ƙarancin mintunan da ya buga a Kofin Duniya tare da hutun bazara sun taimaka masa ya dawo cikin mafi kyawun yanayinsa.

Da yake magana bayan nasarar, Saka ya ce "Na yi atisaye sosai domin in kasance a shirye don farkon kakar wasa kuma in taimaka wa ƙungiyar ta hanyar da na san zan iya."

Ya ƙara da cewa "Abin ya fi danganta da daidaita lokacin hutuna da kuma kauce wa yin hutu mai tsawo. Na yi kwana bakwai ne kacal ina hutawa sannan na koma atisaye."

"Tun daga lokacin na yi aiki tuƙuru kuma ina jin jikina cikin ƙoshin lafiya. Burina shi ne in dawo cikin kyakkyawar yanayi, saboda haka ina kula da jikina sosai."

Da alama wannan ƙwazo ya samo asali ne daga takaicin rashin cimma burin da Ingila ta sa gaba a Kofin Duniya, inda Saka ya koma atisaye kwanaki kaɗan kafin lokacin da aka tsara.

Ya ce "Gasar Kofin Duniya ba ta tafi yadda nake so ba, ba wai ga kaina kaɗai ba har ma ga ƙasata. Bayan Kofin Duniya da kuma ƙarshen kakar wasa, na ji ƙwarin gwiwa sosai. Ina ɗaukin fara wannan sabuwar kakar wasa."