આશા ભોંસલે કાર્ડિયેક અરેસ્ટના કારણે મુંબઈની બ્રીચ કૅન્ડી હૉસ્પિટલમાં દાખલ

ખ્યાતનામ સિંગર આશા ભોંસલેને કાર્ડિયેક અરેસ્ટ બાદ મુંબઈની બ્રીચ કૅન્ડી હૉસ્પિટલમાં દાખલ કરવામાં આવ્યાં છે.

બ્રીચ કૅન્ડી હૉસ્પિટલના ડૉક્ટર પ્રતીત સમદાનીએ બીબીસી મરાઠીને આ વાતની પુષ્ટિ કરી છે.

92 વર્ષીય આશા ભોંસલેની સારવાર ઇમર્જન્સી મેડિકલ સર્વિસિઝ યુનિટમાં ચાલી રહી છે.

તેમજ તેમનાં નાનાં બહેન ઉષા મંગેશકરે બીબીસી ન્યૂઝ હિંદીના સહયોગી રવિ જૈનને આશા ભોંસલેને દાખલ કરાયાની વાતની પુષ્ટિ કરી છે.

ઉષા મંગેશકર આ સમાચાર મળ્યા એ સમયે પુણેમાં હતા અને સમાચાર મળ્યા બાદ તેઓ તરત મુંબઈ તરફ રવાના થયાં.

એક પારિવારિક સૂત્રે બીબીસી ન્યૂઝ હિંદીને એવું પણ જણાવ્યું હતું કે તેઓ ફેફસાં અને અન્ય ઉંમર સંબંધિત બીમારીઓથી પણ પીડાઈ રહ્યાં હતાં.

ભજનથી માંડીને કેબરે સુધી દરેક શૈલીમાં અનુકૂળ આવે એવો અવાજ

8 સપ્ટેમ્બર, 1933ના રોજ જન્મેલાં આશા ભોંસલેએ 1943માં દસ વર્ષની ઉંમરે ગાવાનું શરૂ કર્યું હતું.

તેમણે 90 વર્ષની ઉંમર સુધી ગાવાનું ચાલુ રાખ્યું. તેમણે હંસરાજ બહલ, ઓપી નૈયર, મદન મોહન, આરડી બર્મન, ઇલૈયારાજા, અનુ મલિકથી માંડીને એઆર રહેમાન સાથે પણ કામ કર્યું.

તેમણે રફી, મુકેશ અને કિશોરથી માંડીને બૉય જ્યૉર્જ અને આદિત્ય નારાયણ સુધીના ગાયકો સાથે ગાયું છે. ઉસ્તાદ અલી અકબર ખાન સાથેના આલબમ માટે તેમને 1995માં ગ્રેમી માટે નામાંકિત કરવામાં આવ્યાં હતાં.

આશા ભોંસલેએ 10,000થી વધુ ગીતો રેકૉર્ડ કર્યાં છે.

સંગીતના નિષ્ણાત રાજીવ વિજયકરના મતે, "આશા ભોંસલેની ખાસિયત એ રહી છે કે તેઓ સમય સાથે ચાલે છે. તેમણે ક્યારેય એ ન માન્યું કે જૂની વસ્તુઓ જ સારી હોય છે. તેમનો અવાજ ભજનોને એટલો જ સૂટ કરે છે જેટલો કેબરેને સૂટ કરે છે."

તેઓ કહે છે, "વિવિધતા તેમની તાકત છે અને તેમને અહીં સુધી લાવી છે. ઉદાહરણ તરીકે, જો તમે 'આગે ભી જાને ના તુ...' ગીત જુઓ, તો તેમાં એક પ્રકારની ફિલસૂફી છે; તે એક નાઇટ ક્લબ નંબર પણ છે. આશાના આ ગીતમાં એક વિચિત્ર પીડા છે. નાઇટ બારમાં ફિલ્માવવામાં આવેલા ગીતમાં આવી લાગણી લાવવી મુશ્કેલ કાર્ય છે, જે આશા ભોંસલે કરી શક્યાં હતાં."

બીબીસી માટે કલેક્ટિવ ન્યૂઝરૂમનું પ્રકાશન