IKIBIRIRAHO, Umwuzure w’igihe gito ku mupaka wa Nepal na Tibet wishe abantu barenga 160, ba mukerarugendo amagana baburirwa irengero

Amakuru y'ikibiriraho

Didier Bikorimana na Latifa Mutesi

1. Haciye isaha 1Abantu nibura 12 bishwe n'imiriro y'agasozi mu majyaruguru ya Algeria

   Abantu nibura 12 bamaze kwicwa n’inkongi z’umuriro w'agasozi zibasiye ahantu hanini mu majyaruguru ya Algeria.

   Urwego rushinzwe ubutabazi n’ubwirinzi bw’abaturage rwatangaje ko inkongi nyinshi zafashe mu ntara zitandukanye zikora ku nkombe yo mu majyaruguru y’icyo gihugu.

   Ku wa gatatu nijoro, Minisitiri w’ubutegetsi bw’igihugu, Saïd Sayoud, yavuze ko abantu nibura 54 bakomerekejwe n’inkongi, harimo batandatu bari kuvurirwa mu byumba by’indembe.

   Izi mpfu zibaye mu gihe amajyaruguru y'Afurika akomeje kwibasirwa n’ubushyuhe bukabije, aho Tunisia na Algeria ari bimwe mu bihugu byibasiwe cyane.

   Sayoud yavuze ko abantu batanu bapfiriye mu ntara ya Jijel, bane bapfira muri Béjaïa, naho abandi batatu bapfira muri Tizi Ouzou.

   Minisitiri Sayoud yagiye i Béjaïa ari kumwe na Minisitiri w’ubuzima, Mohamed Seddik Ait Messaoudene, kugira ngo bagenzure uko ibikorwa byo kuzimya umuriro no kwimura abaturage bari mu bice byugarijwe birimo gukorwa.

   Urwego rushinzwe ubutabazi hamwe n'ibitangazamakuru byaho byatangaje ko abaturage benshi bo mu duce twa Bejaia na Jijel bamaze kwimurwa mu ngo zabo.

   Urwo rwego rw'ubutabazi rwavuze ko imiriro yahagaritswe.

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Umuriro wishe barindwi barimo umugore, umugabo n'abana washenguye abatuye i Goma

   Kenya: Polisi ivuga ko abanyeshuri nibura 17 bishwe n'umuriro ku ishuri ribanza

   Inkongi kuri Table Mountain: Inyubako zibumbatiye amateka zashenywe i Cape Town

2. Haciye amasaha 4Hatangajwe itariki y'urubanza rwa Khalid Sheikh Mohammed ushinjwa gucura umugambi w'ibitero byo ku itariki ya 11/9 byibasiye Amerika

   Khalid Sheikh Mohammed, ushinjwa gucura umugambi w’ibitero byo ku itariki ya 11 Nzeri (9) mu 2001 byibasiye Amerika, azaburanishwa muri Kamena (6) mu mwaka wa 2028, nyuma y’imyaka irenga 25 habaye icyo leta y’Amerika yise “igikorwa cy’ubugizi bwa nabi cya mbere kibi cyane gikorewe ku butaka bw’Amerika mu mateka ya none”.

   Umucamanza wa gisirikare yanzuye ko urwo rubanza ruzatangira mu myaka ibiri iri imbere kuko itariki yo mu mwaka wa 2027 abashinjacyaha bashakaga iri bugufi cyane.

   Mohammed yari yarageze ku masezerano n’ubushinjacyaha, aho yari kwemera icyaha, na we akemererwa kuzaburanishwa mu rubanza rudateganywamo igihano cy’urupfu, ariko urukiko rw’ubujurire rwo ku rwego rw’igihugu rwanze ayo masezerano ku mpeshyi yo mu mwaka ushize.

   Uyu watawe muri yombi mu mwaka wa 2003, afungiye muri gereza ya Guantanamo Bay guhera muri Nzeri (9)mu mwaka wa 2006.

   Mbere, Mohammed yavuze ko yateguye “kuva kuri A kugera kuri Z” icyo gitero cyo ku itariki ya 11 Nzeri (9) mu 2001.

   Ku wa gatatu, Liyetona Koloneli (Lt Col) Michael A Schrama, umucamanza wo mu ngabo z’Amerika zirwanira mu kirere, yanzuye ko urwo rubanza rwa Mohammed n’abandi batatu bashinjwa hamwe na we ruzatangira ku itariki ya 5 Kamena (6) mu 2028.

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Umubyeyi wa Osama Bin Laden yavuze ku nshuro ya mbere ukuntu umuhungu we yabyirutse

   Abu Bakr al-Baghdadi: Ikariso ye 'yibwe' yatumye bamenya aho ari

   Itariki y'urubanza rwa Khalid Sheikh Mohammad uregwa gucura umugambi w'ibitero byibasiye Amerika mu 2001

3. Haciye amasaha 5RD Congo: M23 yanenze icyemezo cya leta cyo guhagarika amasomo muri kaminuza z'i Goma n'i Bukavu

   Umutwe w'inyeshyambawa M23 wanenze icyemezo giherutse gufatwa na leta ya Repubulika ya Demokarasi ya Congo (RDC) cyo guhagarika ibikorwa by’amashuri muri za kaminuza nyinshi zo mu mijyi ya Goma na Bukavu, uvuga ko cyafashwe biturutse ku bibazo bikomeje kwiyongera by’umutekano mucye.

   Mu itangazo yasohoye ku wa gatatu, M23 yavuze ko iki cyemezo cyafashwe n’ubutegetsi bwa Kinshasa ku itariki ya 20 Kanama (8) "gihutiyeho" kandi "ntikitaye ku ngaruka zishobora kubaho".

   M23 yakomoje ku ngingo y’itegekonshinga iteganya ko buri muntu afite uburenganzira bwo kwiga, inaburira ko uburezi butagomba gukoreshwa mu nyungu za politiki.

   Mu itangazo yasohoye, M23 yagize iti: “Nta munyeshuri ukwiye guhatirwa guhara [kureka] umwaka w’amashuri, uburezi cyangwa ahazaza he kubera ibihe igihugu kirimo.”

   Yongeyeho ko “ingamba zikwiye zigamije gutuma amasomo akomeza, gutegura ibizamini no kurinda amanota y’abanyeshuri zimaze gufatwa kandi zirimo gushyirwa mu bikorwa ”.

   Mu ntangiriro y’umwaka ushize, M23 yatangije ibitero bikomeye byatumye yigarurira ibice byinshi byagenzurwaga n’ingabo za leta ya Congo, harimo n’imijyi ikomeye ya Goma mu ntara ya Kivu ya Ruguru na Bukavu muri Kivu y’Epfo.

   Nubwo M23 ivuga ko ibice yafashe birimo umutekano, imirwano ikomeje kubaho bya hato na hato hagati yayo n’ingabo za leta igaragaza ko ikibazo cy’umutekano mu bice byo mu burasirazuba bwa Congo kigihangayikishije cyane.

   Minisitiri w’amashuri makuru na kaminuza muri RDC, Prof Marie-Thérèse Sombo Ayanne, yavuze ko umutekano mucye urimo kubangamira imikorere isanzwe y’amashuri.

   Yategetse abayobozi b’ibigo by’amashuri biri mu duce dutekanye kwakira abanyeshuri baturuka mu bice byugarijwe n’umutekano mucye kugira ngo bakomeze amasomo yabo.

   Mu cyumweru gishize, abahagarariye leta ya RDC na M23 bumvikanye ku buryo bw’imikoranire bwo kumenyekanisha igihe habayeho kurenga ku masezerano y'agahenge ndetse no gusuzuma intambwe imaze guterwa n’imbogamizi bikigaragara munzira yo kugera ku mahoro.

   Ariko kuva icyo gihe impande zombi zakomeje gushinjanya ibikorwa byo guhonyora uburenganzira bwa muntu.

   Gahunda nyinshi zabayeho zigamije kugarura amahoro mu burasirazuba bwa RDC ariko kugeza ubu ntibiratanga umusaruro urambye.

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Intambara muri RD Congo yarangira gute?

   Perezida Tshisekedi yemeye ibiganiro bidaheza byo kurangiza intambara

   M23 yamaganye ibihano ivugwamo Amerika yafatiye kompanyi z'amabuye y'agaciro z'u Rwanda

4. Haciye amasaha 6Tanzania: CCM yatanze Minisitiri w'ingufu ku mwanya wa Visi Perezida mushya

   Minisitiri w’ingufu (z’amashanyarazi) wa Tanzania Deogratius Ndejembi yatanzwe n’ishyaka riri ku butegetsi rya CCM ngo abe Visi Perezida mushya w’icyo gihugu nyuma y’iyegura rya Emmanuel Nchimbi.

   Ndejembi, w’imyaka 43, yatanzwe na komite nkuru ya CCM mu nama idasanzwe yabaye ku wa gatatu i Dar es Salaam, yayobowe na Perezida Samia Suluhu.

   Izina rye ryatangajwe n’umunyamabanga mukuru wa CCM Asha-Rose Migiro mu kiganiro n’abanyamakuru cyabaye mu ijoro ryo ku wa gatatu. Yanatangaje icyemezo cy’iryo shyaka cyo kwirukana Nchimbi kubera icyo uwo munyamabanga mukuru yasobanuye ko ari imyitwarire mibi.

   Izina rya Ndejembi ubu rigiye gushyikirizwa inteko ishingamategeko kugira ngo ryemezwe, bijyanye n’ibiteganywa n’itegekonshinga ku kuziba icyuho ku mwanya wa Visi Perezida. Itariki izina rye rizagerezwa mu nteko ishingamategeko ntiyatangajwe.

   Itangwa rye ku mwanya wa Visi Perezida ryabaye hashize umunsi umwe Perezida Samia yemeye ubwegure bwa Nchimbi, buzatangira gushyirwa mu ngiro ku itariki ya 4 Nzeri (9) uyu mwaka.

   Ndejembi ni Depite akaba n’umunyapolitike wo ku rwego rwo hejuru mu ishyaka CCM. Mbere yuko aba Minisitiri w’ingufu, yabanje kuba minisitiri wungirije ndetse nyuma yaho aba mu myanya inyuranye yo ku rwego rwa minisiteri y’umurimo n’ubutaka.

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Icegera c'umukuru wa Tanzania Emmanuel Nchimbi 'yatangaje ko atanze imihoho'

   Samia Suluhu Hassan yatangajwe ko yatsinze amatora ya perezida muri Tanzania n'amajwi 98%

   Iyimikwa aho kuba ihatana – Perezida wa Tanzania wa mbere w'umugore nta we bahatanye ukomeye

5. Haciye amasaha 7Umwuzure w’igihe gito ku mupaka wa Nepal na Tibet wishe abantu barenga 160, ba mukerarugendo amagana baburirwa irengero

   Abantu 162 bamaze gupfa muri Nepal, naho abandi babarirwa mu magana barimo ba mukerarugendo baburiwe irengero, nyuma y’umwuzure ukaze w’igihe gito (flash flood) n’ibyondo bifite imbaraga byamanutse ku bwinshi kubera inkangu.

   Muri ba mukerarugendo baburiwe irengero harimo abarenga 100 baturuka mu Buhinde, 54 bo muri Leta Zunze Ubumwe z’Amerika, 34 baturuka muri Australia ndetse na 33 baturuka mu Bwongereza.

   Abategetsi bavuga ko kandi hari abarenga 100 bo muri Nepal ubwayo baburiwe irengero.

   Ako gace gasurwa cyane n’abajya gusengera ahantu hatagatifu ndetse n’abakora ingendo zo gutembera mu misozi.

   Amerika, Ubushinwa, Umuryango w’Ubumwe bw’Uburayi n’Ubuhinde ni bimwe mu bihugu byasezeranyije gutanga ubufasha cyangwa kohereza ibikoresho by’ubutabazi.

   Hari kandi abapolisi n’abasirikare benshi ba Nepal baburiwe irengero, ndetse n’abakozi bakoraga mu bijyanye n’amashanyarazi.

   Umugore umwe warokotse yabwiye BBC ko “umuryango wanjye watwawe n’amazi ndi kubireba”. Yavuze ko we n’umuhungu we babashije kurokoka nyuma yo kurira hejuru y’inzu.

   Mu ntangiriro, abategetsi bakekaga ko umutingito w’isi waba wabanjirije uwo mwuzure. Ariko ikigo cy’Amerika gikora ubushakashatsi ku miterere y’ubutaka (US Geological Survey) cyatangaje ko “ingufu zo gutigita ahubwo zatewe n’inkangu.”

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Abantu nibura 14 bishwe n'imyuzure n'inkangu muri Koreya y'Epfo

   Imyuzure yabomoye ibohero abanyororo baronka aho baca mu gutoroka muri Nigeria

   Imyuzure yishe abarenga 30 nyuma y'imvura nyinshi yaguye i Kinshasa

6. Haciye amasaha 7Mwaramutse neza!

   Ikaze kuri BBC Gahuzamiryango, aho tubagezaho amakuru yo mu karere no mu mahanga mu buryo mu buryo bw'aka kanya.