TPLF yavuye i Mekelle mu gihe ingabo za Ethiopia n'abafatanya na zo binjiye muri uwo mujyi

Inyandiko gusa
Abarwanyi bo mu mutwe wa Tigray Peace Force (TPF) ushyigikiye ingabo za leta ya Ethiopia bateraniye iruhande rw'imodoka ya pickup ubwo bari bari ku irondo mu mihanda, ubwo ingabo za leta ya Ethiopia n'abafatanya na zo binjiraga mu murwa mukuru Mekelle w'akarere ka Tigray, ku itariki ya 4 Ukwakira (10) mu mwaka wa 2026.

Ahavuye isanamu, AFP via Getty Images

Insiguro y'isanamu, Ingabo za Tigray Peace Force (TPF) zishyigikiye ingabo za leta ya Ethiopia, ubwo zari ziri ku irondo ku cyumweru mu mihanda y'i Mekelle, nyuma yuko ingabo za leta ya Ethiopia n'abafatanya na zo binjiye muri uwo murwa mukuru w'akarere ka Tigray
    • Umwanditsi, Teklemariam Bekit
    • Igikorwa, BBC Tigrinya, i Nairobi
  • Yatangajwe
  • Igihe co gusoma: iminota 3

Ingabo za TPLF, zategekaga akarere ka Tigray zinarwana n'ingabo za leta ya Ethiopia, zavuye mu murwa mukuru Mekelle w'ako karere ko mu majyaruguru y'icyo gihugu, nyuma ingabo za leta n'ingabo zifatanya na zo bigarurira uwo mujyi, nkuko abariyo babibwiye BBC.

Mu itangazo yatangaje ku rubuga nkoranyambaga rwa Facebook, TPLF yavuze ko ibikorwa bya gisirikare byatangijwe mu bice byinshi byari byasatiriye Mekelle muri iyi minsi, bituma habaho kugira impungenge ku mutekano w'abasivile.

Iryo tangazo rigira riti: "Mu gihe intambara yatangijwe kuri twe mu bice byinshi yasatiraga Mekelle, ndetse no mu kuzirikana ko bishoboka ko ibitero bishobora kwibasira abantu [abaturage] bacu n'umujyi wacu nta kurobanura, Guverinoma ya Tigray yafashe icyemezo, kuri ubu, cyo kuva i Mekelle no gukomereza umurimo wayo ahandi hantu."

Abahaye amakuru BBC bavuze ko ingabo za Tigray Peace Force (TPF), zifatanya n'iza leta, zinjiye rwagati muri uwo mujyi ndetse ko zari zirimo kugerageza kuhagarura umutekano, mu gihe ingabo za leta ya Ethiopia zari zagumye mu nkengero ya Mekelle. BBC ntiyashoboye kugenzura mu buryo bwigenga ibyo bivugwa.

TPLF yavuze ko yavuye i Mekelle mu rwego rwo kugabanya ingaruka zishobora kugera ku bahatuye zitewe n'imirwano, ndetse no mu rwego rwo gutuma ingabo zayo zikomereza ibikorwa ahandi hantu.

Umukuru wa TPLF Debretsion Gebremichael ku wa kane yavuze ko ingabo za Tigray zari zirimo kurwanira mu duce twinshi ndetse ko intambara yari ikomeje guhindagurika, akavuga ko ingabo za leta zishoboraga kwigarurira ibice bimwe bya Tigray.

Ariko yasobanuye ibyo nk'amayeri y'urugamba yakozwe ku bushake, agira ati: "Tuzatera umwanzi aho duhisemo, si aho aduhitiyemo."

Amakuru yuko umujyi wa Mekelle wafashwe ni impinduka ikomeye muri iyi ntambara ndetse bishobora kongera impungenge mu bakurikiranira hafi ibibera muri ako karere zuko imirwano ishobora guhungabanya kurushaho akarere k'Ihembe ry'Afurika, ndetse ikaba yakwinjirwamo n'ibihugu bituranye na Ethiopia.

Skip Ibisomwa cane and continue reading
Ibisomwa cane

End of Ibisomwa cane

Abantu batatu ku cyumweru babwiye ibiro ntaramakuru Reuters ko ingabo za leta n'ingabo zifatanya na zo zinjiye muri uwo mujyi, kikaba ari igihombo gikomeye ku butegetsi bwa TPLF bwategekaga ako karere ka Tigray.