Abantu nibura 13 biciwe mu bitero by'Uburusiya i Kyiv mu gihe Ukraine yugarijwe n'ubucye bw'ubwirinzi bw'ikirere

Minisitiri w'intebe wa Ukraine yavuze ko abantu nibura 13 bishwe naho abandi 40 barakomereka mu bitero bishya by'Uburusiya byibasiye umurwa mukuru Kyiv, mu gihe Ukraine ikomeje guhura n'ikibazo cy'ubucye bwa misile zo kurinda ikirere.

Ikigo cya Ukraine gishinzwe ubutabazi bwihuse cyavuze ko inyubako z'amacumbi hamwe n'ahabikwa ibikoresho harashweho muri icyo gitero cyo mu ijoro ryacyeye.

Minisiteri y'ingabo y'Uburusiya yavuze ko yakoresheje intwaro zo mu kirere, ku butaka no mu nyanja mu kurasa ku bigo bya gisirikare no ku bubiko bwa gisirikare.

Perezida wa Ukraine Volodymyr Zelensky yavuze ko izo mpfu zatewe n'ubucye bwa misile zo kurinda ikirere. Ukraine icungira ku nshuti zayo zo mu burengerazuba bw'isi kugira ngo izibone.

Aganira na BBC News ari ahari inyubako y'icumbi yangiritse cyane i Kyiv, umukuru w'uwo mujyi Vitali Klitschko yavuze ko Ukraine icyeneye "amasasu, ubwirinzi bwo kurwanya misile - ducyeneye ubufasha bw'abafatanyabikorwa bacu".

Ubwo yari arimo guhura n'abaturage basenyewe inzu aho mu karere ka Solomianskyi, uwo mukuru w'umujyi wa Kyiv yagize ati: "Ni ingenzi cyane kubona ubufasha bw'abafatanyabikorwa bacu."

Depite w'Umunya-Ukraine Oleksiy Goncharenko yabwiye BBC ko Ukraine "ntirinzwe na gato" ku bitero bya misile 'ballistic' by'Uburusiya ndetse avuga ko "nta kintu na kimwe" ishobora gukora idafite intwaro zo gusama izo misile.

Ubwo yavuganaga n'ikiganiro Today cyo kuri BBC Radio 4, yagize ati: "Uburusiya burimo gukoresha ibi mu kugerageza gusenya ibikorwa-remezo byinshi bishoboka.

"Kuri twe birababaje cyane kuko turimo gupfa hano buri munsi kubera kutagira ibi byo gusamisha [izo misile]."

Mu butumwa Zelensky yanditse ku rubuga nkoranyambaga rwa Telegram, yavuze ko "igihe cyose Ukraine idafite ibihagije byo kwirinda [misile za] 'ballistics', Uburusiya ntibuzatekereza bukomeje [bubishyizeho umutima] ku mahoro ".

Yongeyeho ati: "Ibyo gusamisha bya [misile za] Patriots ntibirasimbuzwa, kandi biracyenerwa buri munsi. Buri misile y'inyongera [itanzwe] irokora ubuzima bw'abaturage bacu."

Ukraine yakomeje gucungira kuri misile za Patriots ihabwa n'Amerika mu kurwanya misile za 'ballistic' z'Uburusiya, ariko Amerika yakoresheje bwinshi mu bubiko bwayo bw'intwaro mu kurwana intambara yo mu Burasirazuba bwo Hagati ndetse imaze igihe iha Ukraine nkeya.

Amakuru mashya yatangajwe mu gitondo cyo ku wa kane n'ingabo za Ukraine zirwanira mu kirere yumvikanishije ko nta n'imwe muri misile 'ballistic' Uburusiya bwakoresheje mu ijoro ryacyeye yashoboye gusamwa.

Umukuru w'umujyi wa Kyiv, Vitali Klitschko, yavuze ko ibitaro by'abana byangirikiye muri ibyo bitero byo mu ijoro ryacyeye, amadirishya akaba yamenetse ndetse n'imodoka zigashya hafi aho.

Yavuze ko agace k'inganda ko mu karere ka Solomyanskyi, mu majyepfo ashyira uburengerazuba bwa Kyiv, na ko karashweho ibisasu bya misile.

Guverineri w'akarere ka Kyiv, Tymur Tkachenko, yavuze ko igitero mu karere ka Brovary, kari mu karere kagutse ka Kyiv, cyishe umugabo umwe ndetse gikomeretsa undi.

Mbere yaho nijoro, ubutegetsi bw'akarere bwari bwasohoye ubutumwa bwo kuburira abahatuye bubasaba kujya ahagenewe kwikinga. Ubwo butumwa bwakomeje bugira buti: "Ibikorwa byo kurinda ikirere birashoboka muri aka gace."

Ibyo bitero byo mu kirere by'Uburusiya bwaraye bitumye ingo zibarirwa mu bihumbi zibura umuriro w'amashanyarazi, ibice bimwe bya Kyiv bijya mu mwijima. Abasana ibyangiritse bari barimo gusiganwa no kongera gutuma umuriro ugaruka.

Mu byumweru bya vuba aha bishize, Kyiv yagiye yibasirwa n'ibitero hafi buri joro, amajoro amwe akicirwamo ndetse agakomerekeramo cyane abantu bose hamwe babarirwa muri za mirongo.

Ibitero bibiri, byabaye mu bihe bitandukanye, Ukraine yagabye ku Burusiya muri iki cyumweru byishe abantu nibura 16, barimo umwana umwe.

Nubwo ibitero ku Burusiya ku ruhande rumwe bigamije kongera igitutu kuri Moscow ngo ijye mu biganiro by'amahoro byo kurangiza iyi ntambara imaze imyaka ine n'igice, nta ntambwe nini yatewe mu bikorwa bya dipolomasi bigamije kugera ku masezerano y'agahenge.

Impande zombi zishinjanya kugaba ibitero ku basivile.

Uburusiya bwatangiye igitero gisesuye kuri Ukraine muri Gashyantare (2) mu mwaka wa 2022, ndetse ubu bugenzura hafi kimwe cya gatanu cy'ubutaka bwa Ukraine – ahanini mu turere tw'umupaka two mu burasirazuba.