IKIBIRIRAHO, Umukuru w’ubutasi wa Équateur n’Abanyamerika batanu bapfiriye mu mpanuka ya kajugujugu muri Kenya

Amakuru y'ikibiriraho

Didier Bikorimana, Latifa Mutesi na Dinah Gahamanyi

1. Iminota 51 irahezeUwahoze ari Visi Perezida wa Liberia akurikiranyweho gucuruza ibiyobyabwenge

   Uwahoze ari Visi Perezida wa Liberia, Jewel Howard-Taylor,yashizwe ibyaha byo gucuruza ibiyobyabwenge, kunyereza amafaranga n'ibindi byaha, nk'uko iperereza mpuzamahanga ry’ubucuruzi bw’ibiyobyabwenge ryabigaragaje.

   Howard-Taylor yatawe muri yombi ejo mbere yo gufata indege ku kibuga cy'indege mpuzamahanga cya Roberts, mu murwa mukuru Monrovia.

   Umukuru wa polisi ya Liberia, Gregory Coleman, yashinje uyu wahoze ari umuyobozi wungirije mu gufatanwa Cocaine ifite agaciro ka miliyoni 317 z'amadolari mu kwezi gushize.

   Uyu munyapolitiki w'imyaka 63 ntaragira icyo atangaza kuri ibyo birego. Umwunganizi we mu mategeko yabwiye BBC ko adashobora kugira icyo avuga kugeza igihe Howard-Taylor azashyikirizwa urukiko ku mugaragaro kandi agashinjwa.

   Howard-Taylor akurikiranyweho ibyaha birimo kwinjiza mu gihugu, kugurisha no gutwara ibiyobyabwenge bigenzurwa nta ruhushya rufite, gucuruza ibiyobyabwenge, gushishikariza ibyaha no koroshya ibyaha .

   Howard-Taylor yinjiye muri politiki ya Liberiya nyuma y’uko uwahoze ari umugabo we, wahoze ari Perezida wa Liberia Charles Taylor, avuye ku butegetsi. Charles Taylor yahoze ari umuyobozi w’inyeshyamba, akaba yaratorewe kuba perezida wa Liberia kuva mu 1997 kugeza mu 2003.

   Nyuma y'imyaka myinshi, George Weah yahisemo Howard-Taylor nk'umusimbura we. Yabaye visi perezida we mu gihe cy'ubutegetsi bwe kuva mu 2018 kugeza mu 2024.

2. Haciye amasaha 2Zambia: Uwahoze ari Minisitiri yiciwe mu gikorwa cy'isaka ku batavuga rumwe n'ubutegetsi cy'inzego z'umutekano

   Abategetsi bo muri Zambia batangaje ko uwahoze ari minisitiri muri icyo gihugu yiciwe mu isaka ryakozwe n’abashinzwe umutekano mu nzu ifitanye isano n’umukuru w'abatavuga rumwe n’ubutegetsi Brian Mundubile, nyuma y’umunsi umwe habaye amatora ya perezida.

   Umuvugizi wa polisi yavuze ko Mutotwe Kafwaya yakomerekejwe n’abashinzwe umutekano bikamuviramo urupfu, mu cyo abategetsi bavuze ko kwari ukurasana kwabaye mu gikorwa (operation) cy'inzego z'umutekano cyabereye mu murwa mukuru Lusaka ku wa gatanu.

   Muri iryo saka, abantu 11 barafashwe. Abategetsi bashinje ishyaka NRPUP rya Mundubile kuba rifite uruhare mu bikorwa by’ubwigomeke n’ibikorwa by’imitwe yitwaje intwaro.

   Mundubile, umaze igihe yihishe, yahakanye ibyo birego, avuga ko ari “ibihimbano”.

   Ku wa kabiri, ubwo Mundubile yavugaga kuri Kafwaya, yavuze ko nta makuru yari afite ku ho aherereye nyuma yo kuraswa muri iryo saka, yavuze ko ryabereye ku rugo rwe.

   Polisi yemeje urupfu rwa Kafwaya ku mugoroba wo ku wa gatatu, nyuma yuko abantu bari bakomeje gushaka kumenya amakuru ye.

   Polisi yavuze ko Kafwaya, wari ufite imyaka 49, yishwe mu kurasana kwabaye mu isaka ryakozwe n’itsinda rihuriweho ry’inzego zitandukanye z’umutekano.

   Yongeyeho ko abo bashinzwe umutekano bahuye “n’amasasu ndetse n’ababarwanyaga, bituma na bo barasa”.

   Ibyavuye mu matora byatangajwe n'akanama k'amatora bigaragaza ko Perezida wari usanzwe ku butegetsi Hakainde Hichilema yatsindiye manda ya kabiri y’imyaka itanu, aho yabonye amajwi 60%.

   Brian Mundubile, wabaye uwa kabiri n’amajwi 38%, yanze ibyavuye mu matora, avuga ko yabayemo uburiganya. Yatangaje ko azajyana icyo kibazo mu nkiko.

   Indorerezi z'amatora zo mu karere no ku rwego mpuzamahanga zatangaje ko umunsi w'itora muri rusange wagenze neza kandi mu mahoro, ariko zigaragaza impungenge ku ivugururwa ry’amategeko y’amatora ryakozwe ritinze, ku bwisanzure bw’itangazamakuru ndetse no ku buryo abanyapolitiki babaga bafite amahirwe angana yo kugera ku bitangazamakuru mbere y’amatora.

   Mu mpera y'icyumweru gishize, indorerezi z’umuryango w’Ubumwe bw’Uburayi (EU) zavuze ko ibyari bibujijwe ku mashyaka atavuga rumwe n’ubutegetsi mu gihe cyo kwiyamamaza, bishobora kuba byaragize uruhare mu gutuma habaho "ihatana mu buryo butangana".

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Zambia: Hakainde Hichilema yatangajwe ko yatsinze amatora ya perezida n'amajwi 60%

   Akanama k'amatora ka Zambia kasubukuye ibarura ry'amajwi

   Zambia: Leta ishinja umukuru w'abatavuga rumwe na yo kugirana isano no kwigomeka kwitwaje intwaro

3. Haciye amasaha 6Umunya-Uganda ushaka gusimbura Guterres yakomoje kuri Mutagatifu Fransisiko mu kiganiro muri ONU

   Umudipolomate w’Umunya-Uganda Olara Otunnu, umwe mu bakandida umunani bahatanira gusimbura António Guterres ku mwanya w’umunyamabanga mukuru w’Umuryango w’Abibumbye (ONU) umwaka utaha, yasabye ko hakomeza amavugurura muri uwo muryango no kongera kuwusubiza ijambo n’icyizere bishingiye ku ndangagaciro n’ubunyangamugayo, nkuko bitangazwa n’ibiro ntaramakuru Reuters.

   Otunnu, wahoze ari umunyamabanga mukuru wungirije wakoraga nk’intumwa yihariye ishinzwe abana n’ibibazo by'intambara, yifashishije amagambo ya Mutagatifu Fransisiko w'Asizi, avuga ko ONU ikwiye kugira uruhare mu kugabanya amacakubiri agenda yiyongera ku isi.

   Mu ijambo rye ku wa gatatu, yifashishije isengesho rya Mutagatifu Fransisiko w'Asizi, aho agira ati: “Ahari urwango, mpashyire urukundo; ahari amacakubiri, mpashyire ubumwe; ahari ukuyoba, mpashyire ukuri; ahari ugushyidikanya, mpashyire ukwemera; ahari ukwiheba, mpashyire ukwizera; ahari icuraburindi, mpashyire urumuri; ahari agahinda, mpashyire ibyishimo.”

   Otunnu yabivuze mu kiganiro cyo ku ruhande aganira n'ibihugu bigize ONU ndetse n’imiryango itegamiye kuri leta, hagamijwe gusuzuma abazasimbura Guterres, uzava ku mwanya we mu mpera y’uyu mwaka, nyuma yo kuyobora manda ebyiri z’imyaka itanu kuri buri manda.

   Otunnu, w'imyaka 75, ni we mukuru cyane mu myaka mu bakandida barimo guhatanira uwo mwanya.

   Umudipolomate wo muri Équateur, Ivonne Baki, winjiye muri iri hatana ku wa kabiri, na we afite imyaka 75, ariko yavutse nyuma ya Otunnu ho amezi menshi.

   Uzasimbura Guterres yitezwe guhura n’akazi gakomeye ko kongerera imbaraga uyu muryango uri mu makuba ndetse urimo kugenda utakaza igihagararo cyawo, urimo kotswa igitutu ngo uvugurure imikorere.

   Abawunenga basaba ko unoza imikorere yawo bavuga ko itwara amafaranga menshi, no kugabanya amashami yawo menshi arimo amwe agaragara nk’akora imirimo isa.

   Kimwe n’abandi bakandida, Otunnu yashimangiye ko ivugurura rya ONU rigomba gukomeza.

   Yagize ati: “Ivugurura ntirikiri amahitamo. Ni ngombwa. Ritabayeho, uyu muryango ushobora guhura n’akaga gakomeye. Ntidushobora gukomeza gukora ibintu nk’uko byari bisanzwe.”

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Umunya-Uganda Olara Otunnu yinjiye mu bahatanira gutegeka ONU

   Ubumwe bw'Afurika bwanze kandidatire ya Macky Sall ku mwanya w'umukuru wa ONU

   Ibikorwa bya ONU bizakomeza' - Guteres asubiza ku cyemezo gikaze cya Trump

4. Haciye amasaha 8Igikomangoma Harry na Meghan bagiye gusubira gutura mu Bwongereza

   Igikomangoma Harry n’umugore we Meghan Markle, bazwi nka Duke na Duchess ba Sussex, barateganya kwimuka bakava muri Leta Zunze Ubumwe z’Amerika bagasubira gutura mu Bwongereza mu mpera y’uku kwezi.

   Igikomangoma Harry n’umugore we Meghan Markle, bazatura mu rugo rwabo bwite, rutari urw’umuryango w’ibwami, ruherereye hanze y’umujyi wa London.

   Ibi byari byatangajwe mbere n’ibinyamakuru Daily Telegraph na The Sun byo mu Bwongereza.

   Muri Nzeri (9), biteganyijwe ko abana babo babiri, Prince Archie w’imyaka irindwi na Princess Lilibet w’imyaka itanu, bazatangira amasomo mu ishuri ryo mu Bwongereza bamaze kwandikishwamo.

   Umwami Charles III yamenyeshejwe aya makuru ku cyumweru. Kugeza ubu, nta gahunda ihari y’uko Harry cyangwa Meghan basubira mu mirimo bakoraga nk’abagize umuryango w’ibwami.

   Harry, Meghan n’abana babo basuye Umwami Charles III mu rugo iwe i Highgrove muri Nyakanga (7) uyu mwaka.

   Icyakora, amakuru BBC yamenye avuga ko icyo gihe batigeze baganira ku bijyanye no gusubira gutura mu Bwongereza.

   BBC ifite amakuru ko Umwami Charles III atari azi iby’iyi gahunda mbere y’icyumweru gishize, ariko ko yakiriye neza iki cyemezo kuko kizamuha amahirwe yo kujya abona kenshi Harry, Meghan n’abana babo ku giti cye (bitari mu rwego rw'ibwami).

   Nta mpinduka iteganyijwe ku mwanya wabo mu muryango w’ibwami kandi bazakomeza kuba abantu babaho mu buzima bwabo bwite.

   Nanone, Igikomangoma William n’umugore we Princess Catherine (Princess of Wales) bamaze kumenyeshwa iyi gahunda ya Harry na Meghan yo gusubira mu Bwongereza.

   Harry na Meghan bavuye mu Bwongereza mu ntangiriro y’umwaka wa 2020 banahagarika inshingano zabo nk’abagize umuryango w’ibwami bakora akazi kaho. Muri Werurwe (3) uwo mwaka, bahise batangira ubuzima bushya muri leta ya California muri Amerika.

   Kuva icyo gihe, umubano wabo n’abandi bagize umuryango w’ibwami wari warazambye. Ariko uruzinduko rwabo rwo muri Nyakanga (7) rwo gusura Umwami Charles III n’Umwamikazi Camilla rwabaye intambwe ikomeye mu kongera kubaka uwo mubano.

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Igikomangoma Harry yabwiye abanyeshuri muri Nigeria ngo 'ntugahangayike iyo wagize umunsi mubi'

   Imvo n'imvano ku gitabo "Spare", cy'igikomangoma Harry ku buzima bwe bwite

   Prince Harry 'yanditse ko yakubiswe na mukuru we'

5. Haciye amasaha 9Uburusiya bwagabye 'igitero rutura' ku murwa mukuru Kyiv cyishe abantu nibura 15

   Urukurikirane rw'ibitero bya misile Uburusiya bwagabye mu ijoro ryacyeye byishe abantu nibura 15 mu murwa mukuru Kyiv no mu karere kawukikije, nkuko abategetsi bo muri Ukraine babivuga.

   Ikigo cya Ukraine cy'ubutabazi bwihuse (DSNS) kivuga ko inyubako y'amacumbi hamwe n'abahikwa ibikoresho n'ibicuruzwa binyuranye hombi harashweho muri icyo "gitero rutura" cyo ku wa kane.

   Inkuru irambuye hano

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Putin ntagishobora kuvuga ko yatsinze intambara muri Ukraine -Uwatsindiye agashimwe Nobel k'amahoro

   Banderol: Menya iyi misile nshya y'Uburusiya imeze nk'indege zitajamwo umupilote

6. 20 Ukw'umunani 2026Umukuru w’ubutasi wa Équateur n’Abanyamerika batanu bapfiriye mu mpanuka ya kajugujugu muri Kenya

   Umukuru w’urwego rw’ubutasi muri Équateur (Ecuador) n’umugore we bapfiriye mu mpanuka ya kajugujugu yabereye muri Kenya.

   Ku wa gatatu, Michele Sensi-Contugi n’umugore we, Stephany Hollihan, bari mu bantu barindwi bapfiriye muri iyo mpanuka yabereye mu karere ka Samburu, ahagana saa tatu n’iminota 13 za mu gitondo (09:13), ni ukuvuga saa mbili n’iminota 13 za mu gitondo (08:13) ku isaha yo mu Burundi no mu Rwanda.

   Umuvugizi wa minisiteri y’ububanyi n’amahanga y’Amerika yavuze ko abandi bantu batanu bapfuye ari Abanyamerika.

   Ikigo gishinzwe iby’indege za gisivili muri Kenya (KCAA) cyatangaje ko iyo kajugujugu yari mu rugendo rwo kureba ibyiza nyaburanga, aho yari ivuye mu gace kabungabunga inyamaswa ka Loisaba yerekeza ku ruzi Ewaso Nyiro, runyura hafi y’ibice byinshi byagenewe kubungabunga pariki n’inyamaswa muri Kenya.

   Akarere ka Samburu ni ahantu hakunze gusurwa n’abakerarugendo, ikaba irimo ibice byinshi by’abantu ku giti cyabo byo kubungabunga inyamaswa ndetse ikaba izwiho kuba ari ahantu hanogeye ijisho.

   Amashusho yafashwe ahabereye impanuka agaragaza umwotsi uzamuka mu gace k’amashyamba kari ku musozi wa Mount Ololokwe. Abakozi b’umuryango utabara imbabare wa Croix-Rouge, ishami ryawo ryo muri Kenya, bagaragara ubwo bageraga aho byabereye mu bikorwa by’ubutabazi, ibisigazwa by’iyo kajugujugu bikirimo gushya.

   Équateur ntiratangaza amakuru arambuye ku rupfu rw’umukuru w’urwego rw’ubutasi rw’icyo gihugu, Sensi-Contugi, wari ufite imyaka 44.

   Yari yaragizwe umuyobozi mukuru w’icyo kigo gishinzwe gukusanya no gusesengura amakuru y’ubutasi (Strategic Intelligence Centre) mu mwaka wa 2024.

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Indege yahanutse yishe batanu barimwo ingenzi muri Kenya

   Kenya: Indege itwaye abantu 12 yakoze impanuka nyuma gato yo guhaguruka irashya

   Batanu bapfuye mu mpanuka ya kajugujugu ku musozi usumba iyindi muri Afurika

7. 20 Ukw'umunani 2026Mwaramutse neza!

   Ikaze kuri BBC Gahuzamiryango, aho tubagezaho amakuru yo mu karere no mu mahanga mu buryo bw'aka kanya.