KALLATTIIN, Tiraamp Ulaan Hormuz 'yeroo dhihootti' qaama US akka ta'u dubbatan

Haguuggii Tamsaasa Kallattii

1. Daqiiqaa 47 duraMariin Biyyaalessaa ‘boqonnaa ijoorra gaheera’ – Komishinii

   

   Madda suuraa, Komishinii Marii Biyyaalessaa

   Mariin Biyyaalessaa Itoophiyaa dhibdee biyyattii bubbule mariin furuuf kaayyeffate magaalaa Finfinneetti itti fufeera.

   Marii ji’a tokkoof ture kanarratti kutannoon lammiilee Itoophiyaa dhimma waloorratti mul’isan ‘’abdii namatti hora’’ jedhe komishinichi ibsa Jimaata galgala baasen.

   Marii kanarratti wal kabajuufi wal hubachuun akkuma mul’ate adeemsicha qormaatnis akka mudatee ture ibse.

   ‘’Wantoonni dhibdee fakkaatan mul’ataniiru,’’ jedheera. Kanammoo dursee akka hubate ibseera.

   Yeroo ammaas mariin kuni ‘’boqonnaa ijoorra gaheera’’ jedhe. Ta’us, oduuwwan sobaa akka isa qoraa jiran irra deebiin ibseera.

   ''Odeeffannoo komishinichi baasu akkasumas odeeffannoo miidiyaaleen bakkicha jiran baasan alatti'' akka hin hordofne hawaasa gaafate.

   BBC'n hirmaattotarraa akka odeeffatetti, dhimmoota tokko tokkoorratti mariirratti hirmaattota gidduu wal dura dhaabbannaan mul'ateera.

   Keessumaa dhimmi Finfinnee dhimma falmii jabaa kaase akka ta'e dubbatan.

   Marii biyyaalessaa irratti waa'ee Finfinnee qabxiileen falmisiisoon ka'an maali?

2. Sa'aatii tokko duraPiroofessarri Kaambiriij waabeffachuu dhabuun himataman du'anii argaman

   

   Madda suuraa, ITV/Shutterstock

   Pirofeesarri duraanii Yunivarsitii Kaambiriij Jeesan Ardeey gaafa Jimaataa Waaree booda kibba Landanitti du'anii argaman.

   Ardeey torban darbe ture Yunivarsitii Kaambiriij keessatti hojii isaanii pirofeesara Soshiyolojii turanirraa osoo hin waabeffatin akka waan ofitti dhiheessuun himannaa jedhufi milkaa'ina isaanirratti gaaffii ka'en hojii kan gadhiisan.

   Himannaa isaanirratti ka'u waakkataniiru.

   Maatiin Ardeey ibsa baasaniin miseensi maatii isaanii du'uutiin gadduu ibsan.

   ''Odeeffannoo sobaa itti duulame Jeesaniif itti baay'ate'' jechuun nama gaarii ta'uu isaa himan.

   Poolisiin Metroppolitaan ibsa baasen ''yeroo kanatti duuni isaa waan hin eegamneefi garuu wanti shakkisiisaa jira jedhame hin amanamu'' jedheera.

3. Sa'aatii tokko duraIndoneezhiyaatti kirkirri lafaa namoota 14 galaafate

   

   Madda suuraa, BASARNAS

   Balaa kirkira lafaa Sambata ganama Indoneezhiyaatti qaqqabeen yoo xiqqaate namootni 14 du'uu aanga'oonni himan.

   Kikrirri lafaa maagnitiyuudii 7.7 ta'e kun bulchiinsa Nusa Tenggara jedhamu keessatti mudate.

   Hojjettootni gargaarsaa nama tarii gamoo jijjige keessatti danqamee hafe baraaruuf yaalaa jiru.

   Kirkira lafaa kanaan gamoowwan hedduun miidhamaniiru. Yaaddoon balaa Sunaamii labsamee kan ture ta'us sa'aatii sadii booda kaafameera.

4. Sa'aatii 2 duraTiraamp yeroo dhihootti Ulaan Hormuuz qaama US jechuun labsuuf

   

   Madda suuraa, Getty Images

   Pirezidantiin US Donaald Tiraamp 'yeroo dhihootti' Ulaa Hormuuz qaama Yunaayitid Isteet akka taatu akka labsan dubbatan.

   Dubbiin isaanii kuni yeroo Ameerikaafi Iraan gidduu muddamni cimetti dhagahame.

   Tiraamp dubbii kana gaafa Jimaataa kan dubbatan yoo ta'u Ameerikaanonni gatii gaazii olaanaa ta'e amananii fudhachuu akka qaban dhaaman.

   Kunis, gatii Iraan akka nikulara hin qabaanne gochuuf gatii kaffalamu akka ta'e himan.

   ''Erga Iraan moonee xumurre booda, [silaayyuu] akka malee mo'amaniiru. Yeroo dhihootti Ulaan Hormuuz daangaa Yunaayitid Isteet ta'u nan labsa,'' jechuun dubbatan.

   Yaadi isaanii kuni jijjiirama imaammataa yoo ta'ee jiraate hin baramne.

   Guyyaa Kamisaa Ameerikaafi Iraan Ulaan Hormuz to'annoo kiyya jala jira jechuun dubbataa turan.

   Ameerikaan dhorkaa ulaawwan Iraaanirra keesse yeroo hin murtoofneef akka dheeressuu dandeessuus beeksifteetti.

   Ulaan Hormuz Iraan ittiin addunyaa doorsiftu maali? Eessatti argama?

   Iraan maaf Ulaa Hormuuzif balaaa hedduu keessummeessaa jirti?

5. Sa'aatii 2 duraAshamaa!

   Tamsaasa kallattii BBC Afaan Oromoo guyyaa Sambataa eegalle.

   Dhimmoota biyya keessaafi alaa jala jalaan isin biraan geenya.

   Odeessaalee keenya karaa Instagram, Marsariitii, YouTube, WhatsApp, Facebook fi TikTok keenyaa argachuu dandeessu.

   Lafa nagaa oolaa!