'Оташкесим тугади' - АҚШ Эронга яна 'қаттиқ' зарба берди, НАТО Бош котиби Путинни ўзлари билан 'ўйнашмаслик'ка чақирди ва Киевга баллистик ракеталар билан ҳужум

Дунёда нима гап – сўнгги тафсилотлар.

Шу соатларда олинган янгилик: Ўзаро ҳужумлар ортидан Доналд Трамп АҚШ ва Эрон ўртасидаги сулҳ "тугаганлиги"ни эълон қилди.

Янги ҳужумлар

АҚШ Эронга яна "қаттиқ" зарба берди.

Бу ишни Эроннинг ҳужумларига жавобан қилганлигини билдирди.

Америка томонига кўра, Эрон Ҳўрмуз бўғозидаги учта нефт танкерига ҳужум қилган.

АҚШ Марказий Қўмондонлиги бу ҳақда кеча, сешанба куни маълум қилган.

Қўмондонликка кўра, 80 дан ортиқ нишонга зарба берилган.

Эрон Исломий Инқилоб Қўриқчиларининг бўғоздаги 60 дан зиёд қайиқлари ҳам нишонга олинган.

Эроннинг ракета учирувчи сатҳлари ва қўмондонлик марказлари ҳам ҳужумлари нишонидан четда қолмаган.

Аммо АҚШ Марказий Қўмондонлиги аниқ қаерларга зарба берганликлари тафсилотларини очиқламаган.

Эрон давлат оммавий ахборот воситаларининг хабар беришича, АҚШ Кешм ороли, Бандар Аббос ва Сирикка ҳужум қилган.

АҚШ ҳужумлари натижасида одамлар яраланган.

Эрон АҚШнинг янги зарбаларига сабаб бўлган ҳужумга масъулиятни ўз зиммасига олмаган.

Эрон Исломий Инқилоб Қўриқчилари АҚШнинг сўнгги ҳужумларини ҳам бежавоб қолдирмаган.

Бугун, чоршанба куни эрта тонгда Баҳрайн ва Қувайтга ҳужум қилган.

Уларга кўра, АҚШнинг бу икки давлатдаги "85 та ҳарбий иншооти" нишонга олинган.

АҚШ Денгиз-пиёда кучларининг қароргоҳлари ва Қувайтдаги ҳарбий базаси ҳам эътибордан четда қолмаган.

Эрон Ташқи ишлар вазири муовини АҚШнинг ҳужумлари ўтган ой икки ўртада имзонланган меморандумга зид эканини айтган.

У Теҳрон бунга қарши "қатъий чоралар" кўриши билан огоҳлантирган.

Америка томони эса уч нефт танкерига қарши уюштирилган "мутлақ тоқат қилиб бўлмайдиган" ҳужумларнинг бежавоб қолмаслиги билан огоҳлантирган.

Сешанба кунги ҳужумларидан аввал АҚШ Молия вазирлиги Эрон нефтига қўйилган санкцияларни яна тиклаган.

Ўтган ой Вашингтон ва Теҳрон томонидан имзоланган ўзаро англашув меморандумида кўзда тутилган бу ён беришни бекор қилган.

Эрон Ташқи ишлар вазирлиги ушбу қадамни ҳам меморандумнинг бузилиши, деб атаган.

Вазирлик бу АҚШ ҳукуматининг "ёмон ниятли, тутуруқсиз ва ишончсизлигининг исботи" эканини айтган.

Шунингдек, Теҳрон "ўз миллий манфаатлари ва миллий хавфсизлигини ҳимоя қилиш учун зарур, деб билган барча чораларни кўриши"ни ҳам баён қилган.

Қатар ҳам, Саудия Арабистони ҳам ҳужумларни қоралаган.

Икковлон ҳам бўғоз ёки унинг яқинида ўзларига тегишли танкер ҳужумга учраганлигини айтишган, бунда Эронни айблашган.

НАТО нимадан хавотирда?

Дунёдаги энг йирик ҳарбий иттифоқ умумий қиймати қарийб $50 миллиард долларлик янги ракета дастурига қўл урмоқчи.

Буюк Британия илова ўндан ортиқ давлат янги дастур ёрдамида Европани ҳимоя қилмоқчи.

Бу иш учун келаси 10 йил давомида худди шунча маблағ харжламоқчи.

Хабарларга кўра, янги лойиҳа бугун, чоршанба куни кечга яқин НАТОнинг Туркия пойтахти Анқарадаги саммитида муҳокама қилинади.

Узоқ масофага мўлжалланган ракеталар НАТОнинг энг илғор қуролларидан бири сифатида эътироф этилади.

Улар тахминан 300 чақирим узоқликдаги нишонларга аниқлик билан зарба беришга мўлжалланган ва кучи бундан бир неча бор олисликдаги нишонларга ҳам етиши мумкин.

Кир Стармер НАТОнинг Анқарадаги саммитида сўнгги бор Британия Бош вазири сифатида иштирок этмоқда.

Аммо, унга кўра, Буюк Британия бошчилигидаги ушбу ташаббус "келгусида НАТОнинг хавфсизлиги таъминлаш учун европалик иттифоқчиларини бирлаштириш"га ёрдам беради.

Саммитда сэр Кир Стармер Россия томонидан Буюк Британия ва НАТОга солинаётган таҳдидга алоҳида урғу бериши кутилмоқда.

Буюк Британия Бош вазири НАТО Россия билан қарама-қаршиликка интилмаса-да, ҳар бир иттифоқчини ҳимоя қилишга тайёр туриши шартлигини ҳам таъкидлаши мумкин.

НАТО билан "ўйнашиб" бўлмайдими?

НАТО Бош котиби Россия президентини иттифоқ билан "ўйнашмаслик"ка чақирди.

НАТО дунёдаги энг йирик ҳарбий иттифоқ бўлади.

Марк Рютте бу ҳақда Анқарадаги саммитнинг иккинчи куни арафасида гапирди.

У матбуот анжуманида финландиялик журналистнинг "Россия ва Путинга тилагингиз", деган саволига худди ана шундай жавоб берди.

Марк Рюттега кўра, НАТО "ўзининг демократияси ва ҳудудини ҳимоя қилади".

"Менинг айтмоқчи бўлганим шуки, Европа, Канада ва Қўшма Штатларда яшовчи бир миллиард кишини бирлаштирган ушбу иттифоқ ҳудудимизнинг ҳар бир қаричини ҳимоя қилади. НАТОни енгиб бўлмайди. Биз мудофаа иттифоқимиз; ҳеч қачон ҳеч кимга ҳужум қилмаймиз. [Аммо] биз ўз турмуш тарзимизни, демократиямизни ва ҳудудимизни ҳимоя қиламиз. Шу боис, бизга тегишга уринманг, биз билан ўйин ўйнашманг", — деди Рютте.

НАТО Бош котибининг BBC Рус хизматига айтишича, "Анқара саммити декларациясида Россия НАТО учун узоқ муддатли таҳдид сифатида белгиланишини кутмоқда".

Хабарларга кўра, Россия Украинага яна баллистик ракеталари билан зарба берган, бешта ракетасини ишга солган.

Ҳозирча бир кишининг қурбон бўлгани ва яна икки нафарининг яралангани маълум.

Украина Қуролли кучларининг билдиришича, яна бу ракеталардан бирортасини уриб тушира олишмаган, Россиянинг фақат 100 дан ортиқ дронни йўқ қилишган.

Россия томони ҳам худди шу манзарада Украинанинг ўнлаб дронларини уриб туширганликларини айтиб чиққан.

Украина президенти бундан аввал АҚШнинг Patriot русумидаги ракетадан ҳимоя тизимларига жуда эҳтиёжлари борлигини билдирган.

Володимир Зеленский ушбу масаланинг айнан НАТОнинг Анқарадаги саммитида муҳокама қилинишини билдирган.

Аммо унинг ўзи мазкур саммитда иштирок этмаётир.