سلمان، عامر نے اپیل دائر کردیں

پاکستان کرکٹ ٹیم کے سابق کپتان سلمان بٹ اور فاسٹ بولر محمد عامر نے سپاٹ فکسنگ کے سکینڈل میں ملی سزا کے خلاف ثالثی عدالت میں اپیل دائر کردی ہے۔

انٹرنیشنل کرکٹ کونسل نے سلمان بٹ پر دس سال اور محمد عامر پر پانچ سال کی پابندی عائد کی ہے۔

سلمان بٹ نے ایک بیان میں کہا ’میں اس بات کی تصدیق کرتا ہوں کہ میرے وکلاء نے ثالثی عدالی میں اپیل دائر کردی ہے۔‘

محمد عامر کے وکیل شاہد کریم نے کہا کہ انہوں نے فاسٹ بولر کی اپیل جمعہ کے روز دائر کی تھی۔

ابھی یہ معلوم نہیں ہو سکا کہ محمد آصف نے بھی اپیل دائر کی ہے کہ نہیں۔

واضح رہے کہ آئی سی سی کے ٹریبونل نے کہا تھا کہ سلمان بٹ اور محمد آصف کی پابندی کی مدت میں سے بالترتیب پانچ اور دو سال کی کمی کا امکان موجود ہے۔ انھوں نے کہا کہ ان کھلاڑیوں نے قواعد کی کوئی اور خلاف ورزی نہ کی تو ان کی پابندی کی مدت پانچ سال بعد ختم ہو سکتی ہے۔